VOV4.Sêdang - Tiô rơkong krếo thế dêi pôa Thoungloun Sisoulith, kăn xiâm pơkuâ ngăn Đảng, kăn xiâm hnê ngăn kong têa Lếo, mê pôa Nguyễn Xuân Phúc, kăn xiâm hnê ngăn tơnêi têa prếi kơdrâi pôa pơkuâ djâ khu kăn xiâm Việt Nam lăm pôu păng ‘nâng tơnêi têa Kŏng hoa Yân chuh Nhân yân Lếo sap ing hâi lơ 9 troh lơ 10/8/2021.

Hâi lơ 9/8, a Tíu pêi cheăng kăn xiâm hnê ngăn tơnêi têa, pôa Thoungloun Sisoulith, kăn xiâm pơkuâ ngăn Đảng, kăn xiâm hnê ngăn kong têa Lếo prếi kơdrâi pôa hiăng pơkuâ po leh tơdah pôa Nguyễn Xuân Phúc prếi kơdrâi pôa ƀă mâu tơdroăng tơkŭm po ki kơnía má môi ăm kơ kăn xiâm hnê ngăn tơnêi têa.

A rôh tơpui tơno, Péa ngế kăn xiâm pơkuâ tối, phiu ro ‘na tơdroăng ki mơnhông tơniăn lĕm dêi tơrŭm cheăng pơla péa tơnêi têa tung pơla hdrối nah ƀă mơdoh hên chôu tơpui ‘na mâu troăng hơlâ vâ tŏng kum dêi rơpó pơkâ tơleăng mâu tơdroăng ki xơpá xua pơreăng COVID-19 pro ƀă rêm kong têa ƀă tơdroăng tơrŭm cheăng pơla Việt Nam –Lếo; tơdrêng amê hnối môi tuăn rơtế mơdêk tơrŭm tung tâi tâng mâu kơvâ cheăng, sap ing tơdroăng kal kí, tơpui tơno, gak kring pơlê pơla cheăm bêng, gak kring, troh hnê hriâm, cheăng kâ, tê mơdró, ‘no liăn cheăng, on tơhrik, mơhno túa lĕm tro, khoa hok kih thuât ƀă hên ki ê vâ rơtế ƀă dêi rơpó tơkâ luâ mâu tơdroăng pơloăng mơnúa, xúa mâu tơdroăng ki lĕm tro mâu rôh tơ’lêi xua kăch măng kơmăi kơmok 4.0 djâ ăm.

Katarina Nga tơplôu ƀă tơbleăng