VOV4.Sêdang - Kơxê lơ 27/7, a Hà Nội, pôa Phạm Bình Minh, Ngế cheăng tung tíu xiâm kal kí, Ngế pro xiâm phŏ hnê ngăn tơnêi têa veăng hôp a rôh hôp khu kăn xiâm ‘no tơdrêng ing troăng hyôh rơ’jiu, internet hbrâ ăm hneăng hôp kân ‘na Khu pơkuâ kế kâ hơnăm 2021 (UNFSS)ƀă ai ƀai pơchuât a rôh hôp tơpui tơno a kơƀeăng. Hneăng hôp pơkâ tơdroăng ki châ pêi klêi tăng hlo tơdroăng pêi pro nếo vâ tŏng kum hơ’lêh troăng hơlâ kế kâ, mơdêk mâu troăng hơlâ kăch măng ƀă tơdroăng ki tơrŭm dêi mâu khu ki tŏng kum, mơhnhôk mâu kơxô̆liăn ‘no tơdjuôm ƀă ‘no cheăng krê vâ pơkuâ djâ tung pơkâ hơ’lêh kố.

Hneăng hôp hbrâ cho hneăng hôp kân Khu kăn xiâm rak ngăn kế kâ lâp plâi tơnêi hiăng pơxiâm po a tíu pêi cheăng Tơrŭm kế kâ ƀă pêi chiâk deăng Khu lâp kong têa (FAO) a pơlê kong xiâm Rome, kong têa Italia tiô tơdroăng ki ‘no tơdrêng ing rơ’jiu, um tơvi,internet. Po tung pơla 3 hâi sap ing hâi lơ 26 – 28/7, tơdroăng kố cho hvêa chêng vâ hbrâ ăm Hneăng hôp kân ki păng ‘nâng, tiô tối châ tơkŭm po a tíu pêi cheăng Khu lâp kong têa a New York,Mih a khế 9 la ngiâ.

Katarina Nga tơplôu ƀă tơbleăng