VOV4.Sêdang - Kơxê măng hâi lơ 26/8, klêi kơ’nâi séa ngăn hnoăng cheăng hbrâ mơdât pơreăng a pơlê kong kân, pôa Phạm Minh Chính, Ngế pro xiâm hnê ngăn Chin phuh, kăn Hnê mơhno cheăng tơnêi têa ‘na hbrâ mơdât pơreăng COVID-19 pêi cheăng ƀă Pơlê kong kân Hồ Chí Minh ‘na tơdroăng ki mơdêk klâ ối krê pơlê pơla ƀă mâu troăng hơlâ hbrâ mơdât pơreăng COVID-19 a pơlê kong kân.

Hdrối mê, sap ing apoăng chôu kơxo má troh kơxê rơtế tung hâi, Ngế ki pơkuâ Chin phuh hiăng troh a hên hĭn tíu a Pơlê kong kân vâ séa ngăn tơdroăng ki pêi pro klâ ối krê, pêi pro châ tơdroăng ki rơhêng vâ má môi ăm tơdroăng rêh ối kuăn pơlê tiô hiâm mơno ôh tá ai ngế ki lâi ôh tá ai kế kâ, ôh tá ai ếo xâp, ăm tơdroăng khăm pơlât troh achê ƀă kuăn pơlê rĕng má môi a cheăm, bêng, pơlê kân, rak tơniăn ăm kuăn pơlê châ xúa rĕng má môi, a mâu rôh ki lâi drêng kal.

Tơpui a rôh pêi cheăng, pôa Phạm Minh Chính tối nhên, rôh lăm pêi dêi hnoăng cheăng kố, cho vâ mơnhên tối tơdroăng ki tối tơbleăng mơdêk klâ ối krê pơlê pơla ƀă mâu troăng hơlâ hbrâ mơdât pơreăng COVID-19 a pơlê kong kân sap ing hâi lơ 23/8. Ngế pro xiâm hnê ngăn tơnêi têa pơkâ thế mâu kăn tơpui tơno, mơnhên tối mâu troăng hơlâ ki pơkâ mơ’no, tối mâu troăng hơlâ kố tro ƀă tơdroăng ki ai khât, tơniăn mê pơtối tơkŭm pêi pro ó rơdêi, tơƀrê tâ, ‘mot tơ’nôm pêi klêi mâu tơdroăng ki trâm tung tơdroăng ki ai khât.

Katarina Nga tơplôu ƀă tơbleăng