VOV4.Sêdang - Kơmăng lơ 9/8, pôa Phạm Minh Chính, Ngế pro xiâm hnê ngăn Chin phuh  veăng hôp ƀă tơpui tơbleăng tơdroăng kal tung hneăng hôp tơpui tơno po to Kăn xiâm mơ’no tơdrêng tung hyôh internet ƀă Hô̆i đong kring vế Khu lâp kong têa ƀă tơdroăng pơxá “Mơdêk pro tơniăn a têa kơxĭ: Môi tung tơdroăng tơrŭm cheăng ƀă lâp plâi tơnêi’’. Kố cho rôh apoăng Hô̆i đong kring vế Khu lâp kong têa tơkŭm po hôp krê tơpui tơdroăng pro tơniăn a têa kơxĭ tung lâp plâi tơnêi ƀă tung kơpong.

Tung ƀai tối tơbleăng dêi tơná a Hô̆i đong kring vế, pôa Phạm Minh Chính, Ngế pro xiâm hnê ngăn Chin phuh tối mâu troăng rơhlâ, tơdroăng pơkâ tŏng kum dêi Đảng ƀă Tơnêi têa ’na têa kơxĭ, tung mê ai tá tơdroăng mơnhông cheăng kâ a têa kơxĭ Việt Nam, thế mơdêk tơrŭm tung lâp plâi tơnêi vâ tơleăng mơnhên mâu tơdroăng pơloăng mơnúa tơchoâm ‘na pro tơniăn a têa kơxĭ, mơdêk nhoăm mơnê, pêi pro tro tiô luât lâp plâi tơnêi, malối ‘na tơdroăng Tơhrâ Khu lâp kong têa ‘na Luât têa kơxĭ hơnăm 1982  ƀă tơniăn hnoăng pơkuâ, ki pơxúa dêi mâu kong têa ‘na têa kơxĭ.

Ing mê mơhno hnoăng cheăng veăng ‘no dêi Việt Nam ƀă tơdroăng cheăng dêi Hô̆i đong Kring vế tối krê ƀă troăng rơhlâ tung pơla tơpui tơno ‘na têa kơxĭ tung hên tơdroăng tối tơchoâm. 

Gương tơplôu ƀă tơbleăng