VOV4.Sêdang - Kơxê lơ 19/8, pôa Phạm Minh Chính, Ngế pro xiâm hnê ngăn Chin phuh hiăng ai rôh tơpui phôn ƀă pôa Pascal Soriot, kăn xiâm pơkuâ Grup pro pơkeăng AstraZeneca. A rôh tơpui phôn, Ngế pro xiâm hnê ngăn tơnêi têa tối nhên vaccine AstraZeneca cho môi tung mâu túa vaccine châ xúa hên má môi tung lâp plâi tơnêi, châ lối 65% kơxô̆ vaccine ki Việt Nam hiăng châ xo troh nôkố, veăng kum kal khât tung ivá mơ-eăm hbrâ mơdât pơreăng tung lâp plâi tơnêi ƀă a Việt Nam.

Pôa Phạm Minh Chính, Ngế pro xiâm hnê ngăn tơnêi têa

Tung pơla pơreăng kân COVID-19 pơtối tâ tú ôh tá tơniăn, Ngế pro xiâm hnê ngăn tơnêi têa pơkâ thế kăn xiâm pơkuâ AstraZeneca tơmâng ngăn, hnê mơhno mơdêk rĕng tơdroăng ki pơcháu vaccine ăm Việt Nam, ki hdrối tâ cho pêi klêi tơdroăng tơhrâ pơcháu 8 rơtuh klŏng vaccine ăm Việt Nam tơdrêng hlối a khế 9 hơnăm 2021 ƀă túa pơkâ troh mơ’nui hơnăm 2021.

Ngế pro xiâm hnê ngăn tơnêi têa pơkâ mơ’no ƀă rơhêng vâ AstraZeneca séa ngăn, tơpui tơno ƀă mâu kong têa ki ê vâ châ mung, kum kơxô̆ vaccine nôkố tá hâi ai tơdroăng ki vâ pâk; tơdrêng amê hnối pơkâ mơdêk mâu tơdroăng tơkêa vaccine ăm vâi hdrêng ƀă mâu ngế ki pá xôp 18 hơnăm, mâu ngế ki mơni kô tơ’lêi tâ pơreăng, ai hiăng pơreăng tung châ sap ing hdrối nah.

Katarina Nga tơplôu ƀă tơbleăng