VOV4.Sêdang - Xông tơpui a roh pêi cheăng ƀă mâu ngế cheăng khoa hok, mâu tíu cheăng, khu tê mơdró veăng  hnê mơhno kơmăi kơmok, hriăn plĕng, mơjiâng pro vaccine hbrâ mơdât Covid 19 vâ pơtối tah lôi mâu tơdroăng pá puât, tơvâ tơvân, thăm mơnhông tơdroăng cheăng kố tơkŭm po tung hâi lơ 12/8, a tíu pêi cheăng Chin phuh, pôa Phạm Minh Chính pơkâ, tâi tâng rêm kơ koan, ngế krê ai hnoăng thế khŏm mơ-eăm, mơ-eăm hên tâ mê nếo, tơrŭm krá tơniăn, châ tơƀrê tâ nếo xua pơkâ ai vaccine mơjiâng pro tung tơnêi têa rĕng má môi. Xông tơpui pơxiâm  po roh pêi cheăng, pôa Phạm Minh Chính, Ngế pro xiâm hnê ngăn tơnêi têa tối nhên, Chin phuh, Ngế pro xiâm hnê ngăn Chin phuh, Khu hnê mơhno tơnêi têa hiăng hnê mơhno kơtăng, kuăn pơlê tâi hiêm mơno tơmâng tơdroăng pêi pro ton xŏn ‘na vaccine. Ngế pro xiâm hnê ngăn tơnêi têa tối rơdêi ‘’thế tơpui tơno ƀă khŏm chiâng pêi’’ tơdroăng mơjiâng pro vaccine tung tơnêi têa. A roh pêi cheăng, mâu kăn teăng mâ xuân môi tuăn ó rơdêi troăng tơmiêt pêi dêi Ngế pro xiâm hnê ngăn tơnêi têa cho pơtối tơdâng tơ’mô ƀă tâi tâng vaccine, ‘’túa vaccine lem má môi cho vaccine châ ăm phêp, châ pâk rĕng má môi, rĕng má môi, teăm tơdrêng má môi’’ . Ai vaccine ki lâi mê pâk vaccine ki mê. Mâu ngế cheăng khoa hok mơnhên ki châ tơƀrê dêi tâi tâng mâu vaccine hiăng châ ăm phêp.

A Sa Ly tơplôu ƀă tơbleăng