VOV4.Sêdang - Kơxê lơ 18/8, pôa Phạm Minh Chính, Ngế pro xiâm hnê ngăn tơnêi têa hiăng ai roh pêi cheăng bâ Khu xiâm pơtâng tối mơhnhôk kuăn pơlê. Teăng mâ Chin phuh, Ngế pro xiâm hnê ngăn tơnêi têa mơnê Khu xiâm pơtâng tối mơhnhôk kuăn pơlê, Măt trâ̆n tơnêi têa mâu râ, mâu khu cheăng kal kí – rêh ối pơlê pơla hiăng mơ-eăm tâi ivá tung pơla kố nah tung tơdroăng hbrâ mơdât pơreăng. Tung tơdroăng hbrâ mơdât pơreăng, Khu xiâm pơtâng tối mơhnhôk kuăn pơlê, Măt trâ̆n Tơnêi têa, mâu khu râ kal kí – rêh ối pơlê pơla hiăng veăng pêi kơtăng, pêi xêh, tiô troăng ngăn ivá, châ chăn dêi kuăn pơlê cho má môi.

Tâi tâng a roh pêi cheăng

Tơdroăng pơtâng tối mơhnhôk kuăn pơlê tung kơ koan pơkuâ tơnêi têa hiăng pêi tiô hnê mơhno dêi Đảng, Tơnêi têa, veăng kum pro pơ’lêh ó rơdêi, thăm pêi kơtăng ‘na tơdroăng pơtâng tối mơhnhôk kuăn pơlê. Ngế pro xiâm hnê ngăn tơnêi têa pơkâ thế, pin hiăng mơ-eăm mê mơ-eăm hên tâ mê nếo, hiăng rŭm môi tuăn mê rŭm môi tuăn tâ mê nếo, hiăng thăm pêi mê pêi thăm kơtăng tâ mê nếo vâ djâ tơnêi têa chiâng tơniăn lĕm nếo, mơnhông mơdêk cheăng kâ – rêh ối pơlê pơla, kum pêi pro ƀlêi trâng Pơkâ hneăng hôp roh má XIII dêi Đảng.

A Sa Ly tơplôu ƀă tơbleăng