VOV4.Sêdang - Kơxê lơ 10/9, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơdah jâ Elsbeth Akkerman. A roh tơdah, Kăn teăng mâ kong têa Hà Lan mơnhên Chin phuh Hà Lan nhuô̆m tơrŭm cheăng tŭm têk, Tơrŭm cheăng ton xŏn ‘na kong prâi hơ’lêh ƀă pơkuâ tơnêi têa ƀă pêi chiâk deăng krá tơniăn ƀă Việt Nam, ngăn mê cho xiâm kối krá tơniăn, kum djâ tơrŭm cheăng pơla péa Chin phuh ƀă khu tê mơdró péa tơnêi têa pơtối mơnhông mơdêk trâu hơhngế ƀă châ tơƀrê.

Pôa Phạm Minh Chính, Ngế pro xiâm hnê ngăn tơdah Kăn teăng mâ kong têa Hà Lan

Pôa Phạm Minh Chính pơkâ thế Kăn teăng mâ pâ thế ƀă Chin phuh, mâu kơ koan ki tơdjâk ƀă khu tê mơdró dêi Hà Lan pơtối veăng kum Việt Nam rĕng châ rôe vaccine ing hên troăng môi tiah ăm mung lơ tê ăm, xuân môi tiah tŏng kum pơkeăng pơlât COVID-19 ƀă kế tơmeăm khăm pơlât ăm Việt Nam. ‘Na tơdroăng têa kơxĭ Biển Đông, kăn teăng mâ kong têa Hà Lan tối ăm ‘nâi, Hà Lan môi tuăn mâu troăng tơmiât pêi dêi ASEAN, mơnhên pói vâ rak hơniâp lĕm, tơniăn, kring vế, gak ngăn tơniăn ƀă tơ’lêi hlâu pơto tơmeăm khoăng drô têa kơxĭ ƀă a troăng tơƀai, tơleăng mâu tơdroăng tơxup tơbriât ƀă mâu troăng hơniâp lĕm, tiô luât lâp plâi tơnêi, tung mê ai Mơ-éa tơkêa Khu lâp kong têa ‘na Luât têa kơxĭ 1982.

A Sa Ly tơplôu ƀă tơbleăng