VOV4.Sêdang - Pôa Phạm Minh Chính, Ngế pro xiâm hnê ngăn tơnêi têa nếo ai roh trâm mâ kăn teăng mâ ngế ai hnoăng ƀă kăch măng, nhŏng o mô đô̆i hlâ tung tơplâ xâ klăng roh leh tơbâ 74 hơnăm hâi Mô đô̆i rong râ – Hlâ hía (27/7/1947 – 27/7/2021). A roh trâm mâ, 50 ngế kăn teăng mâ mơngế ai hnoăng ki kơhnâ rơkê mơ-eăm xông tơtêk, mơ-eăm hên tơkâ hluâ pá puât tung tơdroăng rêh ối, kum tâi hiâm mơno tơná tung mơjiâng ƀă mơnhông mơdêk tơnêi têa teăng mâ ăm lối 9,2 rơtuh ngế ai hnoăng tung lâp tơnêi têa hiăng rơtế vêh tơbâ mâu tơdroăng ton nah ‘na roh tơplâ tơleăng lĕm hdroâng mơngế.

Pôa Phạm Minh Chính, Ngế pro xiâm hnê ngăn tơnêi têa trâm mâ kăn teăng mâ mơngế ai hnoăng ƀă kăch măng, nhŏng o mô đô̆i hlâ tung tơplâ xâ.

Xông tơpui a roh trâm mâ, pôa Phạm Minh Chính, Ngế xiâm hnê ngăn tơnêi têa teăng mâ khu râ kăn pơkuâ, Tơnêi têa, pơtroh mâu ngế pêi cheăng kăch măng, mâu Nôu Việt Nam khên tơnôu, mâu Ngoh khên tơnôu khu lêng kuăn pơlê, mâu mô đô̆i tro rong râ, nhŏng o mô đô̆i hlâ tung tơplâ xâ, mâu ngế ai hnoăng ƀă kăch măng tơdroăng tơbâ ƀă pâ mơnê trâu hơngế.

Ngế pro xiâm hnê ngăn tơnêi têa tối rơdêi tơdroăng pâ mơnê ƀă pôu râng hnoăng cheăng đi đo cho tơdroăng tá păng lôi tung tuăn tơmiât ƀă pêi pro dêi mâu khu râ kăn pơkuâ, tung kuăn pơlê ƀă kố xuân cho khôi túa lĕm dêi tro dêi hdroâng mơngế pin.

A Sa Ly tơplôu ƀă tơbleăng