VOV4.Sêdang - Tơdroăng kal pêi pro tơdrêng nôkố athế tơbriât ƀăng chôu, ƀă phut vâ hbrâ mơdât pơreăng. Pin athế veăng kum liăn ngân, kuăn pơlê pleăng dêi tơdroăng ki hơniâp ro tơná, athế pá puât tung pơla hâi khế ki ai pơreăng vâ kâi hbrâ mơdât pơreăng. Tâng pro tơ’lêi hlâu, kô trâm tơdroăng ki xơpá kân. Mê cho rơkong tối nhên dêi pôa Vũ Đức Đam, Ngế pro xiâm phŏ hnê ngăn tơnêi têa, Kăn xiâm hnê mơhno Tơnêi têa ‘na hbrâ mơdât pơreăng COVID-19 a rôh séa ngăn hnoăng cheăng hbrâ mơdât pơreăng, pơlât pơreăng COVID-19 a Hngêi pơkeăng Quân y 175 (ối tung khu xiâm pơkuâ ngăn lêng) a hâi lơ 27/7.

A rôh pêi cheăng, Thiê̆u tươ̆ng Nguyễn Hồng Sơn, kăn pơkuâ Hngêi pơkeăng Quân y 175 pâ thế ăm phêp hngêi pơkeăng mơjiâng mâu túa pơkâ pơlât COVID-19 a mâu râ ki kân, hbrâ rơnáu kơxô̆ ngế tâ pơreăng kô tâk. Hngêi pơkeăng xuân pơkâ thế Pơlê kong kân Hồ Chí Minh tŏng kum kế tơmeăm xúa tung khăm pơlât, mơdêk tơ’nôm ăm hngêi pơkeăng kơxô̆ liăn vâ pơlât ăm mâu ngế ki tâ COVID-19, tơdroăng ki rơhêng hên má môi cho kơdroh kơxô̆ mơngế hlâ. Măng tĭng hdrối, kơxô̆ mơngế tâ rêm hâi a Pơlê kong kân Hồ Chí Minh xuân ối lối 4 rơpâu ngế, hên má môi tung lâp tơnêi têa.

Katarina Nga tơplôu ƀă tơbleăng