VOV4.Sêdang - Pôa Vũ Đức Đam, Ngế pro xiâm phŏ hnê ngăn tơnêi têa nếo ai roh pêi cheăng ƀă kong pơlê Bình Dương ‘na tơdroăng hbrâ mơdât pơreăng COVID 19. Tiô kăn pơkuâ kong pơlê Bình Dương, ki hên mâu pơreăng xông tâ tú tung pơlê pơla hiăng châ mơdât. Kong pơlê Bình Dương dế pêi kơtăng tơdroăng pơkuâ rêm tơring, mâu tơring thăm séa ngăn, pơxâu phak kơtăng mâu ngế pro xôi. Kheăn kơdeăn tơdroăng mơ-eăm dêi khu râ kăn pơkuâ ƀă kuăn pơlê kong pơlê Bình Dương tung tơdroăng hbrâ mơdât pơreăng ƀă pơlât mâu ngế tro tâ COVID 19.

Kuăn pơlê Bình Dương phiu ro drêng châ pâk vaccine pơlât COVID 19

Pôa Vũ Đức Đam tối phiu ro drêng khu râ kăn pơkuâ mâu khu râ ƀă kuăn pơlê Bình Dương rơtế mơ-eăm troh hâi lơ 15/8  kâi mơdât pơreăng a 5/9 tơring, pơlê krâm, pơlê kong kơdrâm. Troh hâi lơ 30/8, mê kâi mơdât pơreăng a 4 pơlê krâm, pơlê kong kơdrâm ki ê ki tơkăng ƀă Pơlê kong kân Hồ Chí Minh, ôh tá tối troh mâu tíu hiăng châ mơdât ôh tá ăm mot lo pa gong, pơtối hbrâ mơdât pơreăng tâi tâng, mê kong pơlê Bình Dương kô vêh tơniăn tơdroăng rêh ối nếo.

A Sa Ly tơplôu ƀă tơbleăng