VOV4.Sêdang –“Tây Ninh mơdêk séa ngăn mâu kơpong ki mơni kô trâm tơdroăng ôh tá tơniăn, rĕng pro chiâng mâu tơdroăng ki lĕm tro tơniăn, vâ kuăn pơlê rĕng vêh ƀă tơdroăng rêh ối tiah hmâ”. Kố cho tơdroăng pơkâ thế dêi pôa Vũ Đức Đam, Ngế pro xiâm phŏ hnê ngăn tơnêi têa, kăn pơkuâ Khu hnê mơhno cheăng Tơnêi têa ‘na hbrâ mơdât pơreăng COVID-19 a rôh pêi cheăng ƀă kong pơlê Tây Ninh ‘na hnoăng cheăng hbrâ mơdât pơreăng nôkố.

Sap ing pơreăng COVID-19 xông tâ tú nah troh nôkố, kong pơlê ai 3 rơpâu 296 ngế tâ COVID-19. Nôkố, kong pơlê ai 2 kơpong ki mơni kô tro pơreăng xông tâ tú mê cho cheăm Trảng Bàng ƀă tơring Dương Minh Châu.

Xuá mâu hâi khế ki klâ ối krê pơlê pơla tiô pơkâ 16, kong pơlê tơkŭm tí tăng, pâk ngăn mơheăm vâ ai tơdroăng ki rah xo ƀă hiâm mơno rak vế po rơdâ kơpong ki mơni tâ tú, vê hdró kơpong séa ngăn tung lâp lu hbrâ mơdât pôi tá ăm pơreăng châ tâ tú troh a kơpong ki ê. Nôkố, Tây Ninh hbrâ rơnáu mơjiâng túa pơkâ pơlât 5 rơpâu troh 10 rơpâu ngế tâ vâ ai túa pơkâ pơlât ăm tơtro. Tung mê, mơjiâng pro 5 to hngêi pơkeăng lêng.

Katarina Nga tơplôu ƀă tơbleăng