VOV4.Sêdang - Hnoăng cheăng hbrâ mơdât pơreăng a Pơlê kong kân Hồ Chí Minh xuân u ối tung ton hâi khế, xua mê, mâu khu ki ai tơdjâk tơbleăng hên troăng hơlâ ki rơkê vâ khu mơdró kâ châ mơjiâng pro kế tơmeăm ƀă tíu pêi cheăng pơto chơ kế tơmeăm, tê mơdró pêi cheăng tơtro ƀă tơdroăng nôkố, rak tơniăn tơdroăng rêh ối ăm kuăn pơlê.

Kố cho rơkong tối nhên dêi pôa Vũ Đức Đam, Ngế pro xiâm phŏ hnê ngăn tơnêi têa, kăn Khu hnê mơhno cheăng tơnêi têa hbrâ mơdât pơreăng COVID-19 a rôh séa ngăn hnoăng cheăng hbrâ mơdât pơreăng a mâu tíu cheăng mơjiâng pro kế tơmeăm, tê mơdró hâi lơ 6/8 a Pơlê kong kân Hồ Chí Minh.

Vâ rak tơniăn tơdroăng cheăng mơjiâng pro kế tơmeăm pơtối, Ngế pro xiâm phŏ hnê ngăn tơnêi têa pơkâ thế Pơlê kong kân Hồ Chí Minh rĕng pâk tâi vaccine ăm mâu ngế pêi cheăng a mâu tíu mơdró kâ mơjiâng pro kế tơmeăm ki kal. Mâu khu mơdró kâ hbrâ rơnáu kĭ tơkêa ƀă tíu cheăng khăm pơlât vâ pêi pro séa ngăn, ivá rêm hâi.

Katarina Nga tơplôu ƀă tơbleăng