VOV4.Sêdang - Kơxo lơ 5/8, Khu kăn Chin phuh xua pôa Vũ Đức Đam, Ngế pro xiâm phŏ hnê ngăn tơnêi têa pro kăn xiâm djâ mâu kăn lăm séa ngăn tơdroăng hbrâ mơdât pơreăng a kong pơlê Bình Phước. Khu kăn hiăng troh lăm ngăn tơdroăng pơlât mâu ki tâ COVID-19 a Hngêi pơkeăng pơtân tơring Đồng Phú, kong pơlê Bình Phước. Hngêi pơkeăng mê ai 150 to xoăng koi pơlât, pơxiâm xúa khăm pơlât sap hâi lơ 30/7 troh nôkố ƀă dế pơlât ăm 43 ngế. Hdrối mê, Hngêi pơkeăng pơlât ăm 3 ngế  ƀă hiăng ăm hlo vêh a hngêi.

Pôa Vũ Đức Đam, Ngế pro xiâm phŏ hnê ngăn tơnêi têa pro kăn xiâm djâ mâu kăn lăm séa ngăn tơdroăng hbrâ mơdât pơreăng a kong pơlê Bình Phước

Pôa Vũ Đức Đam tối ƀă khĕn kơdeăn ki mơ-eăm dêi mâu ngăn pơkeăng, ƀok thái pơkeăng , mâu điều dưỡng hiăng pơlât ăm mâu ngế ki tâ COVID-19. Ngế pro xiâm phŏ hnê ngăn tơnêi têa tối nhên, pakĭng tơdroăng pơkâ pơlât tro tiô dêi Khu xiâm ngăn pơkeăng, kong pơlê ối kal tơmâng troh tơdroăng tơrŭm pơlât  Đông Tây y cho pơlât băng pơkeăng loăng nhâ, pơkeăng pŭm   ƀă vâ pro ăm tuăn ngoâ mâu ngế châi tamo mê ôh tá tơchĕng hên hlối ăm rĕng prêi lê̆m.

Nôkố Bình Dương ƀă Pơlê kong kân Hồ Chí Minh ai kơxô̆ mơngế tâ tú hên, xua mê Bình Phước ôh tá chiâng tơngôu, tung tơdroăng hbrâ mơdât pơreăng lơ tâ tú.