VOV4.Sêdang - Kơxo lơ 17/8, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i pơkuâ po ƀă tơpui a rôh pơxiâm po hneăng hôp má 2 dêi Vi ƀan pơkuâ Kuô̆k hô̆i. Tơpui pơxiâm po rôh hôp, pôa Vương Đình Huệ, kăn xiâm hnê ngăn Kuô̆k hô̆i pơkâ thế ‘mâi rơnêu ăm tơdroăng ki khĕn kơdeăn tiô túa kơtâu tiô inâi tơ’noăng khĕn kơdeăn. Vi ƀan pơkuâ Kuô̆k hô̆i xuân pơkâ thế Chin phuh kal pơtối séa ngăn ‘na tơdroăng ki ‘mot tơ’nôm tơdroăng ki khĕn kơdeăn “Me dái Droh rơtăm djâ troăng ahdrối khên tơnôu” tung kơxop hlá mơ-éa Luât tơ’noăng, khĕn kơdeăn ‘mâi rơnêu.

Ăm rơkong veăng tơpui tối ‘na hlá mơ-éa tối tơbleăng dêi Chin phuh ‘na pêi pro mâu tơdroăng pơkâ, troăng hơlâ ‘na Ƀaoh hiêm pơlê pơla, rak ngăn ƀă xúa liăn ƀaoh hiêm pơlê pơla hơnăm 2020, Vi ƀan pơkuâ Kuô̆k hô̆i pâ thế Kuô̆k hô̆i pơtối mơdêk séa ngăn tơdroăng ki pêi pro troăng hơlâ, luât ‘na ƀaoh hiêm pơlê pơla, ƀaoh hiêm ôh tá ai cheăng pêi.

A peăng kơxê, Vi ƀan pơkuâ Kuô̆k hô̆i séa ngăn, tơdroăng pơkâ ƀă pơkâ kơlo ‘mot tơ’nôm liăn ki hmâ hrê liăn ngân tơnêi têa hơnăm 2022 ƀă séa ngăn tơdroăng ki pâ thế séa ngăn dêi Hô̆i đong Hdroâng kuăn ngo ‘na tơdroăng xing xoăng peăng kong ngo, kơpong a ‘ngêi.

Katarina Nga tơplôu ƀă tơbleăng