VOV4.Sêdang - Pêi pro tiô tơdroăng trâm mâ kuăn pơlê klêi rôh hôp má môi, Kuô̆k hô̆i hneăng má 15, kơxo  lơ 5/8, pôa Vương Đình Huệ, Kăn xiâm hnê ngăn Kuô̆k hô̆i ƀă Khu kăn Kuô̆k hô̆i pơlê kong kân Hải Phòng hiăng trâm mâ kuăn pơlê tiô tơdroăng mơ’no tơdrêng tung um tơvi troh mâu pơlê krâm, tơring, pơlê kân a pơlê kong kân Hải Phòng ƀă lối 200 tíu hrik mơ’no ƀă 5 rơpâu ngế kuăn pơlê veăng hôp.

Môi tuăn ƀă khĕn kơdeăn tơdroăng tối tơbleăng a rôh hôp, mâu kuăn pơlê tối tiah kố, rôh hôp má môi, Kuô̆k hô̆i hneăng 15 hiăng mơhno ki rơkê ‘na tuăn ngôa dêi Pôa Hồ Chí Minh, Kăn xiâm hnê ngăn tơnêi têa ki apoăng cho “hbrâ rơnáu pêi pro ‘’. Kuô̆k hô̆i  hiăng rơkê ƀeăn , ‘nâi nhên tơdroăng tung tơnêi têa, ai hnoăng cheăng pêi drêng tơ’nôm pơkâ rôh hôp má môi ƀă tơdroăng ki hâi chói hlo, pơcháu ăm Chin phuh, Ngế pro xiâm hnê ngăn Chin phuh troăng rơhlâ ki kal vâ pêi rơkê tâ tung hnê mơhno, pơkuâ hbrâ mơdât pơreăng kân COVID-19.

Tiâ kơ-êng dêi kuăn pơlê tơdroăng mơnhông ôm hyô ƀă cheăng kâ a têa kơxĭ Bạch Long  Vĩ ƀă Cát Bà, pôa Vương Đình Huệ ai tối tiah kố, tơdroăng kô ai pơxúa khât troh tơdroăng cheăng lêng ‘na kring gak tơniăn, mê thế rơtế mơnhông cheăng kâ a têa kơxĭ ƀă kring gak tơkăng kong, kring vế nhâ loăng, kuăn kiâ, ki pơxúa dêi nhâ loăng kong kế  kuăn kiâ ki kơnía.

Gương tơplôu ƀă tơbleăng