VOV4.Sêdang - Ô vâi krâ nhŏng o ƀă pú hmâ! Văn Lem cho cheăm ối tung rơpŏng pá puât, lâp cheăm ai vâ chê 2.900 pơ’leăng mâ mơngế, vâi krâ hdroâng kuăn ngo châ 98% pơ’leăng mâ mơngế. Pêi pro tơdroăng pro nhŏng o tiô Pơkâ 04 dêi Khu pơkuâ hnê ngă Đảng ủy Kon Tum, 5 hơnăm hiăng hluâ, rơtế ƀă tơdroăng tŏng kum cheăm pro nhŏng o pơkuâ, rak ngăn ƀă mơnhông pêt kong, Khu pơkuâ rak ngăn ƀă mơnhông pêt kong dêi kong pơlê Kon Tum xuân hiăng tơrŭm krá tơniăn ƀă Khu pơkuâ Đảng ủy, khu râ kăn pơkuâ ƀă khu râ dêi cheăm mơjiâng mâu tơdroăng pơ’lêh hên tung mơnhông mơdêk cheăng kâ – rêh ối pơlê pơla, rak tơniăn tung rak ngăn ƀă pơ’lêh tơdroăng rêh ối kuăn pơlê.

On veăng ngoh A Vinh ƀă Y Vân a pơlê Đăk Xanh, cheăm Văn Lem, tơring Đăk Tô ai troh 8 ngế kuăn. Xua krâm kuăn ‘nĕng pêi lo liăn bu kơnôm to ƀăng deăng pôm loăng, chiâk báu xua mê rơpŏng plâ hơnăm kơklêa. Hơnăm 2018 cho môi tung 5 rơpŏng kuăn pơlê châ Khu râng liăn Rak ngăn ƀă Mơnhông pêt kong dêi kong pơlê Kon Tum rah xo vâ mơjiâng túa pêi ‘’Tŏng kum, hnê mơhno rơpŏng păn chu kơdrâi’’ mơnhông cheăng kâ.

Châ Khu pơkuâ kơxô̆ liăn tŏng kum 2 to chu hdrê, 1 to chu pŏng rơtế châ hnê kih thuât păn, liăn rôe tơmeăm pro kơdroăng, tơmeăm chĕm apoăng, troh nôkố khu chu dêi rơpŏng ngoh A Vinh đi đo păn châ chât to. Nôkố mê khu chu cho tơmeăm tê châ liăn dêi rơpŏng. Rế hbrâ ăm khu chu kâ, ngoh A Vinh phiu ro, tối ăm ‘nâi tơdroăng păn chu dêi rơpŏng tơná:

‘’Hdrối nah, tá hâi kơnâng meăm mê ko pơ-ôú, pơlái klêi mê kâng pro rơtâ tá. Apoăng ăm gá kâ pôm loăng ƀă hrốu pế chên ăm gá kâ ƀă tâk. Xuân to ton tê vâ xo liăn rôe po, ƀôt ngŏt tiah mê tê’’.

Ing mâu tuá pêi châ Khu pơkuâ râng liăn mơhá hnoăng rak ngăn ƀă mơnhông pêt kong dêi kong pơlê Kon Tum mơjiâng a cheăm Văn Lem ki pro nhŏng o, môi tiah: ‘’Hriâm tâp ƀă pêi pro tiô troăng tơdjâ, hiâm mơno Pôa Hồ Chí Minh’’; ‘’Tŏng kum, hnê mơhno rơpŏng păn chu kă’'’; ‘’Hnê mơhno, tŏng kum kih thuât ƀă rak ngăn kơphế’’, ƀă hía hé, hiăng kum kuăn pơlê tung cheăm pơ’lêh tơdroăng tơmiât, troăng pêi kâ mơ-eăm hluăn kơtiê.

Troh nôkố mâu tuá pêi xua Khu pơkuâ râng liăn mơjiâng hiăng troh lâp lu troh mâu thôn pơlê, châ hên rơpŏng hriâm tâp, pêi tiô. Hên rơpŏng kuăn pơlê hdrối nah cho ối tung inâi ‘’kơtiê ton’’, nôkố hiăng pêi lo liăn tơniăn hluăn ing kơklêa kơtiê. Pôa A Hùng, Kăn hnê ngăn Vi ƀan cheăm Văn Lem tối ăm ‘nâi:

‘’Tung pơla kố nah Khu pơkuâ râng liăn mơhá hnoăng rak ngăn ƀă mơnhông pêt kong hiăng tơrŭm krá tơniăn ƀă khu râ kăn pơkuâ cheăm tung tơdroăng pơkuâ rak ngăn kong xuân môi tiah tơmâng, tŏng kum vâi krâ kuăn pơlê tung cheăm Văn Lem ‘na mơnhông cheăng kâ – rêh ối pơlê pơla. Khu pơkuâ râng liăn mơhá hnoăng rak ngăn ƀă mơnhông pêt kong kum ăm vâi krâ xăm kơklêa, kơdroh kơtiê xuân môi tiah rak tơniăn tơdroăng rêh ối dêi vâi krâ kuăn pơlê. 

Khu râng liăn mơhá hnoăng rak ngăn ƀă mơnhông pêt kong kong pơlê Kon Tum kum ăm cheăm ‘na tơdroăng xăm kơklêa kơdroh kơtiê xuân môi tiah ‘na tŏng kum rêh ối pơlê pơla’’.

Tiô xêo ngăn dêi Khu pơkuâ liăn mơhá hnoăng rak ngăn ƀă mơnhông pêt kong dêi kong pơlê Kon Tum ăm hlo tung 5 hơnăm pêi pro tơdroăng pro nhŏng o, mơjiâng cheăm pá puât Văn Lem, Khu pơkuâ liăn mơhá hnoăng rak ngăn ƀă mơnhông pêt kong hiăng pêi pro tro tơdroăng kum rêh ối pơlê pơla ƀă tâi tâng kơxô̆ liăn tŏng kum hrĭng rơtuh liăn.

Ki má lối cho mâu tơdroăng xua Chi ƀô̆ ƀă Chi đoân dêi Khu pơkuâ râng liăn mơhnhôk, môi tiah pâ mơnê mâu ngế ai hnoăng, rak ngăn ăm mơngế kơtiê, vâi hdrêng, hok tro ai tơdroăng rêh ối pá puât; rêm hơnăm tŏng kum cheăm tơkŭm po Hâi kơxuô kơƀăn tơxông ngiât ƀă hiá hé. Tối ‘na tơdroăng pro nhŏng o, mơjiâng cheăm Văn Lem dêi Khu râng kơxô̆ liăn mơhá hnoăng rak ngăn ƀă mơnhông pêt kong dêi kong pơlê Kon Tum, pôa Lê Trọng Thọ, Kăn pơkuâ hnê ngăn cheăng Đảng cheăm, tối ăm ‘nâi:

‘’Khu pơkuâ kơxô̆ liăn mơhá hnoăng rak ngăn ƀă mơnhông pêt kong hiăng đi đo tơmâng tŏng kum tơrŭm ƀă Đảng ủy cheăm Văn Lem tơkŭm po, pêi pro mâu hnoăng cheăng ‘na mơnhông cheăng kâ, rêh ối pơlê pơla, tơniăn cheăng lêng, kring vế, gak ngăn xuân môi tiah mơjiâng tơdroăng cheăng kal kí dêi cheăm. Khu pơkuâ râng kơxô̆ liăn mơhá hnoăng rak ngăn ƀă mơnhông pêt kong đi đo tơmâng sap ing apoăng hơnăm tơrŭm ƀă mơjiâng pơkâ ăm tơtro ƀă tơdroăng nôkố dêi cheăm.

Tiah hmâ rêm khế, pái khế môi xôh xing xoăng kăn ƀô̆ troh pêi cheăng tơrŭm vâ mơnhên tơdroăng pêi pro mâu hnoăng cheăng. Tung tơdroăng pêi pro ai mâu tơdroăng pá puât, tơvâ tơvân mê ngin kum tah lôi mâu tơdroăng pá puât lơ tối ăm troh mâu khu râ kăn pơkuâ’’.

Klêi kơ’nâi 5 hơnăm pro nhŏng o, rơtế ƀă Đảng ủy, khu râ kăn pơkuâ, mâu khu râ ƀă kuăn pơlê cheăm Văn Lem, Khu râng liăn mơhá hnoăng rak ngăn ƀă mơnhông pêt kong dêi kong pơlê Kon Tum hiăng veăng kum kal khât ƀă tơdroăng mơnhông mơdêk tơdjuôm dêi cheăm. Ing môi cheăm ối tung khu ki pá puât, vâi krâ mâu hdroâng kuăn ngo châ troh 98% pơ’leăng mâ mơngế, troh nôkố Văn Lem hiăng kơdroh kơxô̆ rơpŏng kơtiê chu u ối 19,57%. Cheăm xuân hiăng châ 14/19 tuá pơkâ tung mơjiâng thôn pơlê nếo.

Gương - A Sa Ly tơplôu ƀă tơbleăng