VOV4.Xơ Đăng -   Tung rôh hôp tơpui tơno a tôh dêi mâu kăn ‘na kơxop hlá mơ-éa Pơkâ ‘na troăng hơlâ tài khoă, liăn ngân tŏng kum tơbleăng Tơdroăng ‘mâi mơnhông ƀă mơdêk cheăng kâ rêh ối pơlê pơla, tơdjâk troh kơvâ ‘no liăn cheăng tơdjuôm, pôa Trần Hoàng Ngân – Viê̆n trưởng Viện Hriăn ngăn mơnhông Pơlê kong kân Hồ Chí Minh tối tiah kố: Tung 2 rơtuh 870 rơpâu rơtal liăn ‘no cheăng tơdjuôm dêi lâp tơnêi têa hneăng hơnăm 2021 – 2025, ối dâng 297 rơpâu rơtal tá hâi xoăng, kal xúa ‘no cheăng ăm mâu kong pơlê ki ai tơdroăng ki pro mơdêk tâi tâng kơxô̆ liăn nâp.

Tiô pôa Trần Hoàng Ngân, kơpong ki mơni kô pro mơdêk nâp liăn cho Đông Nam bộ. Kơxô̆ liăn vâ ‘no hơnăm 2022, tâi tâng liăn nâp lâp tơnêi têa ai 1 rơtuh 500 rơpâu rơtal mê kơpong Đông Nam bộ châ troh 40%. Nôkố, Khu xiâm ngăn troăng prôk ƀă rơxế kơtâu hiăng pơtroh ăm Kuô̆k hô̆i 12 kơxop hlá xúa kơxô̆ liăn ‘no cheăng tơdjuôm tung tơdroăng ki pro troăng prôk sap ing peăng Kơnhŏng troh peăng Hdroh.

Tung mê, kơpong Đông Nam bộ ƀă Tơbăng kroăng Cửu Long bu ai 2 tơdroăng tơkêa, tung pơla nôkố hngêi trăng, troăng klông kơpong peăng Hdroh dế ôh tá mơnhông tâ tâng vâ pơchông ƀă kơpong peăng Kơnhŏng.

Katarina Nga tơplôu ƀă tơbleăng