VOV4.Sêdang - Vi ƀan hnê ngăn Pơlê kong kân Hồ Chí Minh nếo ai hlá mơ-éa pơtroh tơdrêng ăm Khu xiâm ngăn pơkeăng ƀă khăm pơlât tơbleăng ‘na tơdroăng roê vaccine hbrâ mơdât COVID-19 dêi Pơlê kong kân, ki nhên gá tơdroăng ki roê 5 rơtuh klŏng vaccine Moderna. Tiah mê, Vi ƀan hnê ngăn Pơlê kong kân Hồ Chí Minh pơkâ thế Khu xiâm ngăn pơkeăng ƀă khăm pơlât ăm phêp tơrŭm tơdjuôm – krê, tơkŭm xo liăn pâk vaccine.

‘Na tơdroăng ki tơpui tơno ƀă roê vaccine Moderna, klêi kơ’nâi châ tơdroăng ki môi tuăn dêi pôa Vũ Đức, Đam, Ngế pro xiâm phŏ hnê ngăn tơnêi têa a hâi lơ 15/6/2021 ‘na tơdroăng roê vaccine; Vi ƀan hnê ngăn Pơlê kong kân Hồ Chí Minh hiăng pơcháu ămKŏng ti Sapharco pêi pro hnoăng cheăng tơpui tơno, kĭ tơkêa hlá mơ-éa roê vaccine hbrâ mơdât COVID-19 a pơlê kong kân.

Tung tơdroăng mê, Kŏng ti Sapharco hiăng kĭ hlá mơ-éa ƀă tơdroăng ‘na kum vaccine hbrâ mơdât COVID-19 Moderna. Tá troh nôkố, Kŏng ti Sapharco dế tơkôm teăng mâ Moderna pơtroh hlá mơ-éa tơkêa vâ roê 5 rơtuh klŏng vaccine Moderna. Vâ rak tơniăn tơdroăng ki châ pâk vaccine ƀă mơdêk tơdroăng ki mơhnhôk tơlo liăn dêi pơlê pơla, Vi ƀan hnê ngăn Pơlê kong kân Hồ Chí Minh pâ thế Khu xiâm ngăn pơkeăng ƀă khăm pơlât kal ai tơdroăng ki khât ămphêp Kŏng ti Vina Capital pêi pro tơrŭm cheăng tơdjuôm – krê, tơkŭm xo liăn pâk vaccine tiô tơdroăng pơkâ roê 5 klŏng vaccine kô châ diâp ăm pơlê pơla 1 klŏng.

Katarina Nga tơplôu ƀă tơbleăng