VOV4.Sêdang -Khu ngăn pơkeăng ƀă khăm pơlât Pơlê kong kân Hồ Chí Minh ăm ‘nâi, kơxo lơ 9/8 Pơlê kong kân Hồ Chí Minh châ Khu xiâm ngăn pơkeăng ƀă khăm pơlât ăm tơ’nôm 600 rơpâu klŏng vaccine AstraZeneca. Drêng châ xo vaccine kố, pơlê kong kân kô xoăng ăm mâu pơlê krâ, tơring, pơlê kong kơdrâm Thủ Đức vâ pơtối tơdroăng ki pâk vaccine. Riân sap ing hâi lơ 22/7 troh tâi hâi lơ 8/8, Pơlê kong kân Hồ Chí Minh hiăng pâk ăm vâ chê 2 rơtuh 300 rơpâu ngế. Tung khế 8 kố, tâng rak tơniăn ai tŭm vaccine, Pơlê kong kân Hồ Chí Minh mơni kô pâk tung pơlê pơla ƀă kơxô̆ 70 – 80% pơ’leăng mâ mơngế ki hiăng lối 18 hơnăm.

Tơdjâk troh hnoăng cheăng pâk vaccine, Khu ngăn pơkeăng ƀă khăm pơlât Pơlê kong kân Hồ Chí Minh ăm ‘nâi xuân nếo pơkâ thế mâu hngêi pơkeăng, tíu xiâm khăm pơlât, mâu tíu pâk pro tơ’lêi hlâu vâ kuăn pơlê châ pâk tơniăn; khăm séa ngăn mơnhên tro khu ki ôh tá chiâng pâk; tiâ mơnhên tơdroăng ki ôh tá chiâng pâk ki iâ hâi ƀă mâu ngế ki dế ôu, pâk pơkeăng, dế tro pơreăng ki ê.

Katarina Nga tơplôu ƀă tơbleăng