VOV4.Sêdang - Hâi lơ 27/8, kong pơlê Dak Lak hiăng pơxiâm pêi pro túa pơkâ séa ngăn rĕng kháng nguyên SARS –CoV -2 ăm tâi tâng kuăn pơlê pơlê kong kơdrâm Ƀuôn Ma Thuột vâ séa ngăn hbrâ rơnáu, rĕng châ ‘nâi F0 tung pơlê pơla. Tung hâi ki apoăng, pơlê kong kơdrâm Ƀuôn Ma Thuột hiăng séa ngăn ăm dâng 10 rơpâu rơpŏng a bêng Thống Nhất ƀă Tự An ƀă 62 tíu ki pâk xo têa môh.

Pôa Đoàn Ngọc Thượng, kăn phŏ hnê ngăn Vi ƀan pơlê kong kơdrâm Ƀuôn Ma Thuột ăm ‘nâi, vâ hnoăng cheăng pâk xo têa môh test rĕng COVID-19 rak tơniăn tro tiô pơkâ, pơlê kong kơdrâm hiăng mơjiâng 70 tôh pâk xo têa môh séa ngăn ƀă 2 tôh pâk xo ki lăm prôk ukố umê a 21 to cheăm bêng. Rêm tôh pêi pro séa ngăn ăm dâng 400 ngế tung môi hâi. Tung pơla pâk xo têa môh tiô tối hdrối kô klêi tung pơla 5 troh 7 hâi ƀă kơxô̆ ngế séa ngăn dâng 375 rơpâu ngế. Hâi lơ 27/8, a mâu tôh pâk xo têa môh a 2 to bêng Thống Nhất ƀă Tự An tá hâi ai ngế ki lâi yương tĭnh ƀă SARS-CoV-2.

Kuăn pơlê bêng Thống Nhất test rĕng tung hâi lơ 27/8

*** Sap ing 18h, hâi lơ 26/8, pơlê kong kơdrâm Ƀuôn Ma Thuột, kong pơlê Dak Lak hiăng ăm klâ kơtăn pơlê pơla tiô pơkâ 16. Pơtối mê, tung 5 hâi apoăng, pơlê kong kơdrâm pơkâ thế kuăn pơlê ôh tá lo ing hngêi vâ tơkŭm tâi tâng mơngế pêi cheăng vâ test rĕng ti tăng F0 tung pơlê pơla. Tung pơla kố, Vi ƀan pơlê kong kơdrâm Ƀuôn Ma Thuột pơcháu mâu cheăm, bêng mơjiâng ‘’kơchơ siêu thĭ 0 liăn’’ vâ kum mâu rơpŏng pá puât, tơdrêng amê pêi pro tuá pêi ‘’Lăm kơchơ kuăn pơlê’’.

Roh apoăng, mâu siêu thĭ, tíu xiâm tê mơdró tung pơlê kong kơdrâm Ƀuôn Ma Thuột pêi pro tơdroăng tê tơmeăm tiô mâu ‘’combo tơmeăm kâ kal xúa rêm hâi’’ ai ƀă kơlo yă săp ing 100 rơpâu troh 500 rơpâu liăn vâ tơxâng tiô kal vâ xúa dêi kuăn pơlê. Nôkố ai 5 tiú tê mơdró tung pơlê kong kơdrâm mê cho kơchơ kân siêu thĭ Go Ƀuôn Ma Thuột, kơchơ kân siêu thĭ Co.opmart Ƀuôn Ma Thuột, kơchơ kân siêu thĭ MM Mega Ƀuôn Ma Thuột, tíu tê tơmeăm khoăng Vinmart, tíu tê tơmeăm khoăng Bách hóa xanh kô pêi pro troăng tê online, tê tiô combo ƀă pêi pro tơniăn yă ƀă hên tơmeăm khoăng ki kal xúa rêm hâi.

A Sa Ly - Katarina Nga tơplôu ƀă tơbleăng