VOV4.Sêdang - Sap ing 12 chôu hâi lơ 6/8, pơlê kong kơdrâm Gia Nghĩa, kong pơlê Dak Nông mơgêi klâ kơtăn pơlê pơla tiô Pơkâ 16 dêi Ngế pro xiâm hnê ngăn Chin phuh, pơtối pêi pro pơkâ 15 vâ pơtối hbrâ mơdât pơreăng COVID 19. Tung 14 hâi pêi pro pơkâ mơdât ôh tá ăm lo pa gong, pơlê kong kơdrâm Gia Nghĩa ôh tá ai ngế tro yương tĭnh virus SARS-CoV2 a pơlê pơla. Kuăn pơlê a mâu tíu châ hlo ngế tro tâ pơreăng hiăng châ xo têa môh, têa hế khăm ngăn ăm hlo âm tĭnh.

Gia Nghĩa xuân pơtối rak 5 tíu gak mơdât pơreăng mot a tíu xiâm

Laga, drêng ai pơreăng xông tâ tú ó, pơreăng đi đo tơ’lêi tâ tú, pơlê kong kơdrâm xuân ối rak 5 tíu gak a mâu troăng kân mot tung tíu xiâm. Mâu tíu tê mơdró tơmeăm kâ châ phêp lôu péa laga bu tê djâ vêh. Pơlê kong kơdrâm pơtối pơtê tâi tâng mâu tơdroăng hôp, mâu tơdroăng ki kal tơkŭm lối 20 ngế tung 1 kơbong. Pakĭng tíu pêi cheăng, hngêi trung hriâm, hngêi pơkeăng ôh tá tơkŭm sap ing 10 ngế tơngi klêng, pơtê mâu tơdroăng khôp, tơdroăng tơkŭm sap ing 20 ngế tơngi klêng.

A Sa Ly tơplôu ƀă tơbleăng