VOV4.Sêdang -Kơxo kố lơ 17/8, a Hngêi Kuô̆k hô̆i, pơxiâm po rôh hôp má 2 dêi Vi ƀan pơkuâ Kuô̆k hô̆i. Po tung pơla 2 hâi, rôh hôp kố, Vi ƀan pơkuâ Kuô̆k hô̆i kô ăm rơkong veăng tơpui tối tung 4 tơdroăng ki xiâm, tung mê ai tá rơkong veăng tơpui tối ki apoăng ‘na tơdroăng ki hbrâ ăm Hneăng hôp má 2, Kuô̆k hô̆i hneăng má 15. A rôh hôp kố, Vi ƀan pơkuâ Kuô̆k hô̆i ăm rơkong veăng tơpui tối ‘na hlá mơ-éa tơbleăng dêi Chin phuh ‘na tơdroăng ki pêi pro mâu tơdroăng pơkâ, troăng hơlâ ƀaoh hiêm pơlê pơla, rak ngăn ƀă xúa liăn ƀaoh hiêm pơlê hơnăm 2020; séa ngăn, pơkâ ‘na tơdroăng pơkâ ƀă kơlo xing xoăng liăn hrê đi đo dêi liăn ngân tơnêi têa hơnăm 2022.

A rôh hôp, Vi ƀan pơkuâ Kuô̆k hô̆i kô mơgêi hneăng hôp má môi, Kuô̆k hô̆i hneăng 15; ăm rơkong tơpui tối tung tơdroăng ki apoăng ‘na hbrâ ăm rôh hôp má péa, Kuô̆k hô̆i hneăng má 15; ăm rơkong veăng tơpui tối kơxop hlá mơ-éa pơkâ pêi cheăng dêi Hô̆i đong Hdroâng kuăn ngo, mâu Vi ƀan dêi Kuô̆k hô̆i; séa ngăn, pơkâ tơdroăng ki mơjiâng, pơtê Kơ koan séa ngăn tơdroăng xôi Kuân khu ƀă kơ koan ki tơdâng, Kơ koan séa ngăn tơdroăng xôi kơpong tung Khu lêng kuăn pơlê ƀă hên ki ê.

Katarina Nga tơplôu ƀă tơbleăng