VOV4.Sêdang - Kơxo lơ 25/8, Khu xiâm pơkuâ ngăn lêng tơrŭm ƀă Khu pơtâng tối tơdroăng kal Tơnêi têa, Ƀơrô cheăng Chin phuh ƀă Khu pơkuâ ngăn Đảng Quảng Bình tơkŭm po ‘no tơdrêng ing troăng hyôh internet Rôh hôp khoa hok râ Tơnêi têa Tơbâ 110 hơnăm hâi kot mâ Đăi tươ̆ng Võ Nguyên Giáp. Rôh hôp kố ai inâi “Đăi tươ̆ng Võ Nguyên Giáp, Kăn xiâm pơkuâ ngăn lêng – Môi ngế ki rơkê ‘na lêng, kăn pơkuâ ki rơkê khât dêi kăch măng Việt Nam”.

Tơpui hnê mơhno a Rôh hôp ‘no tơdrêng ing troăng hyôh internet Tíu xiâm mơ’no Khu xiâm pơkuâ ngăn lêng a Hà Nội, Đăi tươ̆ng Phan Văn Giang, ngế cheăng tung Khu xiâm pơkuâ tơdroăng kal kí, kăn xiâm pơkuâ ngăn lêng tối nhên: “Rôh hôp cho môi tung mâu tơdroăng cheăng ki kal, ai pơxúa kal tung mâu tơdroăng pêi pro tơbâ 110 hơnăm hâi kot mâ Đăi tươ̆ng.

Tâ tá Rôh hôp Khoa hok râ tơnêi têa a tíu xiâm mơ’no kong pơlê Quảng Bình

Mâu rơkong ki veăng tơpui tối a Rôh hôp veăng kum ‘mot tơ’nôm mâu tơdroăng ki kal, hlá mơ-éa vâ tối nhên trâu hơngế tơdroăng rêh ối, hnoăng cheăng kăch măng kơhnâ, dêi Đăi tươ̆ng Võ Nguyên Giáp; pơ-ôu pơ-eăng ƀă pâ mơnê mâu hnoăng cheăng, tơdroăng ki pleăng kân malối cho kơhnâ rơkê dêi pôa ƀă tơdroăng cheăng kăch măng dêi Đảng ƀă hdroâng mơngế. Veăng kum ‘mâi mơnhông loi tơngah dêi kuăn pơlê ƀă rôh hơ’lêh nếo tơnêi têa xua Đảng pin pơxiâm ƀă pơkuâ.

Katarina Nga tơplôu ƀă tơbleăng