VOV4.Sêdang -Tơpui a Rôh hôp ‘no tơdrêng ki troăng hyôh internet lâp tơnêi têa dêi Ngế pro xiâm hnê ngăn Chin phuh ƀă kăn teăng mâ mâu khu mơdró kâ, khu tơrŭm ‘na mơdró kâ ƀă mâu kong pơlê ‘na mâu troăng hơlâ pơkâ tơleăng xơpá, mơdêk mơjiâng pro tê mơdró dêi khu mơdró kâ tung pơla ai pơreăng kân COVID-19, pôa Phạm Minh Chính, Ngế pro xiâm hnê ngăn tơnêi têa tối nhên, kố cho môi tơdroăng ki pơloăng mơnúa kân la loi tơngah tiah kố mâu khu mơdró kâ kô kâi tơkâ luâ pơreăng kân COVID-19, ƀă ối mơjiâng pro chiâng inâi krê ăm dêi tơná, ƀă tơdroăng ki mơdêk kơnía lĕm má môi dêi ngế mơdró kâ cho hiâm mơno lĕm, rơkê, loi tơngah.

Rôh hôp kố cho rôh vâ Chin phuh, Ngế pro xiâm hnê ngăn Chin phuh hmâng tơdroăng ki rơhêng vâ, loi tơngah, pơkâ mơ’no, pâ thế dêi mâu khu mơdró kâ, mâu khu tơrŭm, mâu kong pơlê, kơ koan, tíu pêi cheăng, tăng hlo ki kơnía ‘na mâu troăng hơlâ pơkâ tơleăng, ai pơxúa, tơƀrê tung tơdroăng ki kal pêi pro tơdrêng môi tiah dế nôkố.

Katarina Nga tơplôu ƀă tơbleăng