VOV4.Xơ Đăng - Vi ƀan pơlê kong kơdrâm Ƀuôn Ma Thuột, kong pơlê Dak Lak hiăng ai hlá mơ-éa ăm phêp xúa mâu troăng hbrâ mơdât pơreăng COVID-19 tung pơlê kong kơdrâm. Pơtối mê, pơxiâm sap 6 chôu hâi lơ 6/1, Vi ƀan pơlê kong kơdrâm Ƀuôn Ma Thuột kô ăm phêp tơkŭm po mâu tơdroăng xah hêi tung hngêi, pakong ƀă pơkâ: tơkŭm ôh tá chiâng hluâ 60 ngế tung môi tíu ƀă lối 90% mơngế veăng châ pâk tŭm péa trum vaccine lơ hiăng prêi lĕm COVID-19 ôh tá hluâ 6 khế, tơniăn pêi pro pơkâ 5K.

Krê tơkŭm mơdâm kiâ, pơloăng kơdroh kơxô̆ mơngế troh veăng ƀă ai séa ngăn dêi khu râ kăn pơkuâ. Ăm phêp rơxế kơtâu pơto tơmối tung pơlê kong kơdrâm ƀă tung kong pơlê, rơxế ƀus, taxi, hơp đông, ôm hyô; Mâu tíu tê mơdró tơmeăm ôu kâ pơrá chiâng phêp kơtâu laga thế pêi pro mâu troăng tơniăn hbrâ, mơdât pơreăng.

Krê mâu tíu tê mơdró tơmeăm ôu kâ bu chiâng tơdah ôh tá hluâ 20 ngế tung môi tíu. Ƀă mâu tơdroăng vêh hriâm a hngêi trung, mơ-éa pơkâ pơtê mâu tơdroăng hnê hriâm ƀă mâu râ mâm non. Tơkŭm po tơdroăng hnê hriâm tơdrêng ƀă mâu khô̆i lâm 9 ƀă khô̆i lâm 12, sap ing hâi lơ 10/1/2022. Ƀă mâu khô̆i lâm râ má I, II, III ki ế pơtối tơkŭm po hriâm tiô troăng tơdrêng.

A Sa Ly tơplôu ƀă tơbleăng