VOV4.Sêdang - Apoăng măng tĭng kố, Khu pơkuâ ngăn lêng hiăng tơkŭm po Leh tơbleăng tơdroăng tơ’noăng ki tơviah pơxá “Khu lêng rơtế ƀă lâp tơnêi têa tơdjuôm ivá, môi hiâm mơno tơ’noăng hbrâ mơdât ƀă ƀlêi trâng pơreăng kân COVID-19”. Pêi pro tơdroăng leh tơbleăng, kăn ƀô̆ lêng a hên tíu pêi cheăng tung lâp tơnêi têa hiăng tiô pơkâ ki pơtroh mâu khu ƀok thái pơkeăng lêng ăm mâu kong pơlê peăng Hdroh pêi pro hnoăng cheăng hbrâ mơdât pơreăng COVID-19.

Teăng mâ Kuân ủy Tơnêi têa, Khu xiâm pơkuâ mô đô̆i, Hô̆i đong Tơ’noăng – Kheăn kơdeăn Khu xiâm pơkuâ mô đô̆i, mơhnhôk pêi pro tơdroăng tơ’noăng, Đăi tươ̆ng Lương Cường, Kăn pơkuâ Kơ koan xiâm kal kí Khu mô đô̆i kuăn pơlê tối nhên Tơdroăng tơ’noăng ki phá tơ-ê “Khu mô đô̆i rơtế lâp tơnêi têa tơdjuôm ivá, môi hiâm mơ’no tơ’noăng, hbrâ mơdât ƀă ƀlêi trâng pơreăng kân COVID-19’’, pro ăm rêm ngế kăn ƀô̆, mâu mô đô̆i plĕng trâu hơngế tơdroăng “hbrâ mơdât pơreăng môi tiah tơplâ mơdât khu lêng ‘mêi”, “rế pá puât mê rế thăm mơ’no ivá tơ’noăng tâ mê nếo”, “hiăng mơ-eăm rế mơ-eăm hên tâ mê nếo”, “hiăng môi tuăn rế môi tuăn tâ mê nếo”, “hiăng khŏm mơ-eăm rế khŏm mơ-eăm hên tâ mê nếo”, mơdêk hnoăng cheăng xua kuăn pơlê, xua tơnêi têa, hlê plĕng mơ-eăm xêh, khŏm mơ-eăm xêh, tơkâ hluâ pá puât, tơbrêi tơbrêh, hbrâ rơnáu djâ troăng ahdrối tung hbrâ, mơdât pơreăng, pêi kêi đeăng hnoăng cheăng kal kí tơ-ê kal khât, ngăn mê cho hnoăng cheăng tơplâ dêi mâu lêng mô đô̆i tung rơxông hơniâp lĕm.

Tâi tâng mâu kăn ƀô̆, mô đô̆i a mâu kong pơlê pơrá thăm pêi pro mâu tơdroăng tơrŭm, tŏng kum khu râ kăn pơkuâ hnê ngăn cheăng Đảng, khu râ kăn pơkuâ tơleăng pá puât, kum krí, pui xo tơmeăm ƀă tê tơmeăm khoăng pêi lo ing chiâk deăng, prá alâi, pro ăm ai mâu tơmeăm ki kal xúa rêm hâi kum ăm tơdroăng rêh ối ƀă rak ngăn ivá kuăn pơlê; hbrâ mâu troăng mơdât pơreăng râ a’ngêi tâ vâ teăm tơdrêng hbrâ mơdât, ôh tá ăm tot môi tíu, kơdrâ ai tơdroăng ki préa.

Đăi tươ̆ng Lương Cường tối nhên, tâi tâng mâu lêng tơkŭm tơ’noăng, mơhno tơdroăng ki khŏm mơ-eăm ƀlêi trâng, hbrâ xêh, pêi kơtăng, djâ troăng ahdrối tung tơdroăng veăng ƀă kêi đeăng hnoăng cheăng hbrâ, mơdât pơreăng:

“Pơtối pêi trâu hơngế achê ‘nâi tơdroăng pơreăng xông tâ tú, ki má lối cho mâu tiú ki ai hên pơreăng xông tâ tú vâ teăm tơbleăng tơdrêng ƀă Khu xiâm pơkuâ cheăng Đảng kơvâ cheăng lêng, Khu xiâm pơkuâ mô đô̆i, Tôh pêi cheăng ki rơhêng vâ tối dêi Chin phuh a kơpong peăng Hdroh tơnêi têa, khu râ kăn pơkuâ, khu hnê mơhno ƀă Khu hnê mơhno hbrâ, mơdât pơreăng mâu râ hnê mơhno châ tơƀrê tơdroăng hbrâ, mơdât pơreăng.

Đi đo tơrŭm krá tơniăn ƀă khu râ kăn pơkuâ hnê ngăn cheăng Đảng, khu râ kăn pơkuâ ƀă khu mô đô̆i kong pơlê pơtối rak krá tơniăn tơdroăng pêi cheăng dêi mâu tôh, tíu gâk a troăng tơkăng kong, têa kơxĭ, khŏm mơdât tơdroăng mot ôh tá tro luât. Tơkŭm pro tro mâu kơpong klâ kơtăn, hngêi pơkeăng pơtân, thăm veăng khăm ngăn ƀă pâk vaccine hbrâ mơdât pơreăng ăm kuăn pơlê, pơlât mâu ngế tro tâ pơreăng, ki má lối cho mâu ngế ki tro râ a mâu hngêi pơkeăng tung ƀă pa kong khu mô đô̆i…’’.

A leh mơhnhôk 220 tíu hrik hyôh um tiô troăng măng Internet tung tâi tâng khu mô đô̆i môi tuăn ó rơdêi leh mơhnhôk Tơdroăng tơ'noăng ki tơ-ê ƀă mơhno tơdroăng ki khŏm mơ-eăm, tá hiâm mơno, pôu râng hnoăng cheăng ƀă mâu tơdroăng pêi cheăng ki pơxúa tung tơdroăng hbrâ, mơdât pơreăng kân. Pro đông tung a mâu kong pơlê peăng Hdroh tơnêi têa dế ai pơreăng xông ôh tá tơniăn, tung mê, ai Pơlê kong kân Hồ Chí Minh, Thiê̆u tươ̆ng Nguyễn Trường Thắng, Kăn pơkuâ Kuân khu 7 tối ăm ‘nâi, mơhé drêng lâi khu mô đô̆i kuân khu kô djâ troăng ahdrối tung hbrâ mơdât pơreăng:

“Tâi tâng kuân khu po roh tơ’noăng hbrâ mơdât pơreăng tŏng kum kuăn pơlê, tơrŭm krá tơniăn ƀă khu râ kăn pơkuâ hnê ngăn cheăng Đảng, khu râ kăn pơkuâ, khu râ ƀă kuăn pơlê, mâu khu cheăng pêi pro kơtăng tơdâng tơ’mô, pêi pro kơtăng mâu troăng hbrâ mơdât pơreăng, po rơdâ kơpong ki ôh tá ai pơreăng tâ tú, pro chiâng kŭn kơpong ki ai pơreăng xông tâ tú, la ngiâ pro kơpong ki ai pơreăng tâ tú mê chiâng ôh tá ai xếo pơreăng tâ tú.

Tơdrêng amê, veăng châ tơƀrê tơdroăng tŏng kum kơklêa, tŏng kum tơdroăng châi, khŏm ôh tá ăm kuăn pơlê kơklêa pá puât, lơ ôh tá ai tŭm tơmeăm ƀă pá puât’’.

Ƀă khu mô đô̆i gak tơkăng kong, Khu xiâm pơkuâ Mô đô̆i gak tơkăng kong mâu kong pơlê peăng Kơnhŏng ƀă Peăng kơnhŏng pá tơdế tơnêi têa hiăng rah xo 58 ngế kăn ƀô̆, ƀok thái pơkeăng kơvâ cheăng lêng ki rơkê, rơkê chiâng pêi cheăng păng ‘nâng troh veăng lâm hnê mơhno dêi mâu thái cô, ƀok thái pơkeăng Viê̆n Y hok hbrâ hdrối khu mô đô̆i ƀă kăn ƀô̆ kơbong khu ƀok thái pơkeăng kơvâ mô đô̆i gak tơkăng kong.

Mâu ngế ki veăng lâm hnê mơhno hiăng châ hnê tơ’nôm mơdêk tơdroăng pêi cheăng, mơdêk ivá pêi cheăng tung hbrâ, mơdât COVID-19, hbrâ vâ lăm pêi cheăng kum ƀă khu mô đô̆i peăng hdroh tơnêi têa, hbrâ nhên khât tŭm vâ rĕng tơrŭm pêi pro mâu tơdroăng pêi cheăng, mơ-eăm veăng kum rơtế khu ngế mơdât pơreăng vâ thâ mơdât, troh tah ƀă mơdât châ tơƀrê pơreăng COVID-19 tiô tơdroăng hnê mơhno dêi Ngế pro xiâm hnê ngăn Chin phuh.

A leh lo lăm pêi cheăng, Trung tươ̆ng Đỗ Danh Vượng, Chính ủy, Mô đô̆i gak kring tơkăng kong tối nhên:

“Teăng mâ Đảng uỷ, Khu xiâm pơkuâ mô đô̆i á pơcháu hnoăng cheăng ăm nhŏng o, pói vâ Đảng ủy, Khu xiâm pơkuâ mô đô̆i, ahdrối cho nhŏng o ‘nâi nhên ki rơ-iô, pơkâ thâ dêi hnoăng cheăng hbrâ, mơdât ƀă hlê plĕng tŭm tơdroăng, hnoăng cheăng ki kân dêi khu mô đô̆i tối tơdjuôm, dêi mô đô̆i gak tơkăng kong tối krê ƀă ki rơhêng vâ tối cho khu ƀok thái pơkeăng kơvâ mô đô̆i gâk tơkăng kong tung roh tơplâ kố; hlo nhên tơdroăng ki phiu ro kân, pôu râng hnoăng cheăng, ing mê, mơnhên khŏm mơ-eăm, tơdroăng mơ-eăm dêi pin rơtế tâi tâng khu mô đô̆i, tâi tâng kuăn pơlê hbrâ, mơdât ƀă ƀlêi trâng pơreăng kân.

Xuân hbrâ tơdah tâi tâng hnoăng cheăng ki lâi tiô pơkâ dêi rêm kơ koan, tíu cheăng tung tơdroăng ki pin châ ăm pêi cheăng, vâ pro ti lâi pin hbrâ mơdât  tơtro má môi ƀă ƀlêi trâng rĕng má môi pơreăng kân COVID-19, tơniăn ivá, tơdroăng ki tơniăn châ chăn dêi kuăn pơlê lâp tơnêi têa pin”.

Kô chiâng vâ tối vâ chê 2 hơnăm hiăng hluâ, mô đô̆i gak kring tơkăng kong hiăng đi đo cho khu ki djâ troăng ahdrối dêi khu ki mơdât pơreăng, mơjiâng kơpong drô kĭng tơkăng kong ƀă 1.974 khu ki gak, lối 8.221 ngế kăn ƀô̆, mô đô̆i gak tơkăng kong veăng mơdât mơngế mot tung tơnêi têa ôh tá tro luât ƀă hbrâ, mơdât pơreăng; mơhnhôk tơdroăng tâi tâng kuăn pơlê veăng hbrâ, mơdât pơreăng COVID-19 ƀă tơdroăng mot lo ôh tá tro luât lâp lu a mâu troăng tơkăng kong ƀă ai troăng tơmiât xing xoăng mơngế mơdât tơdroăng mot lo tung tơnêi têa châ tơƀrê, rak tơniăn hbrâ mơdât pơreăng a mâu tíu tê mơdró ngi kong têa ê; ôh tá bê tơmâng xâu pá puât, tơ’lêi tro tâ pơreăng tâ tú vâ veăng kum kuăn pơlê a mâu kơpong klâ kơtăn, kơpong kâng kơxái ôh tá ăm lo pa gong.

Roh leh ăm mâu mô đô̆i lăm pêi cheăg roh kố cho mơhno ăm tơdroăng hbrâ rơnáu lăm kum ăm mâu tíu ki ai pơreăng xông tâ tú ó “prôk troh lâp lu, pêi tŭm tơdroăng cheăng drêng Tơnêi têa kal” dêi mơngế mô đô̆i kơlŏng ngiât.

VOV rah chêh

A Sa Ly tơplôu ƀă tơbleăng