VOV4.Sêdang - Kơxê lơ (30/8), a Pơlê kong kân Hồ Chí Minh, pôa Vũ Đức Đam, Ngế pro xiâm phŏ hnê ngăn tơnêi têa rơtế ƀă tôh pêi cheăng  ki kal dêi Chin phuh ‘na tơdroăng hbrâ mơdât pơreăng COVID-19 hiăng séa ngăn tơdroăng khăm pơlât, ăm pơkeăng pơlât ăm mâu ngế tâ COVID-19 ki dế klâ krê, tơdroăng pơlât a hngêi, Klêi séa ngăn a pơlê Krâm 11 ƀă pơlê Krâm 8, pôa Vũ Đức Đam, Ngế pro xiâm phŏ hnê ngăn tơnêi têa tối pơchân ki khât pơla hdrối kố nah a mâu kong pơlê tơring cheăm ai mơngế F0 ki râ ó la ôh tá ai ngế lăm pôu khăm ngăn, châ ‘nâi teăm tơdrêng mê hiăng hlâ a hngêi.

Xua mê, ôh tá xê krếo phôn, mâu ƀok thái pơkeăng lêng kal thế tơrŭm ƀă mâu khu ngăn pơkeăng tơring cheăm đi lăm pôu ngăn mâu ki F0, malối a mâu rơpŏng ôh tá ai mâu rơxông ối nếo, rak ngăn ivá kuăn pơlê. Pôa Vũ Đức Đam, Ngế pro xiâm phŏ hnê ngăn tơnêi têa thế tung plâ 24 chôu la ngiâ, mâu ƀok thái pơkeăng lêng thế tơrŭm, tối tơbleăng tơdroăng ăm pơkeăng pơlât F0. Tâng ai pơkeăng la hâi teăm troh ăm mâu F0 mê thế pơtroh tơdrêng, tâng ôh tá ai thế rôe tơ’nôm hlối.

Gương tơplôu ƀă tơbleăng