VOV4.Sêdang - Klêi kơ’nâi Khu xiâm pơkuâ hnê hriâm ƀă hnê mơjiâng tuăn ngôa rơkê tơbleăng điêm tơ’noăng mơgêi râ má pái phôh thong hơnăm 2021, mâu hngêi trung đăi hok pơxiâm tơbleăng điêm châ plah mot hriâm đăi hok. Hơnăm kố, điêm ki châ tơdế tơ’noăng mơgêi râ má pái phôh thong tâk a hên môn tơ’noăng.

Rơtế amê, mâu hngêi trung đăi hok hiăng ‘măn hên kơxô̆ pơkâ rah xo ƀă mâu troăng ki phá tơ-ê, môi tiah: séa ngăn hok ƀă, séa ngăn điêm mơnhên ivá hriâm, ƀai tơ’noăng râ lâp plâi tơnêi ƀă hía hé, xua mê kơxô̆ pơkâ séa ngăn điêm mơgêi râ má pái phôh thong kô kơdroh hên. Xua mê, điêm rah xo mot đăi hok hơnăm kố châ tối hdrối kô tâk tâng pơchông ƀă mâu hơnăm hdrối. Ngin ai roh tơpui tơno ƀă Phŏ Yăo sư – Tiê̆n sih Nguyễn Thu Thủy, Kăn pơkuâ hnê hriâm đăi hok – Khu xiâm pơkuâ hnê hriâm ƀă hnê mơjiâng tuăn ngôa rơkê dêi tơnêi têa ‘na tơdroăng kố.

-Ô jâ Nguyễn Thu Thủy! Hơnăm kố, hên hngêi trung đăi hok pơtối hên tơdroăng vâ rah xo hok tro, rah điêm tơ’noăng mơgêi hriâm râ má pái ki vâ tối hên tâ hơnăm hdrối,  tơdroăng kố tơdjâk troh ti lâi điêm pơkâ đăi hok?

Jâ Nguyễn Thu Thủy:  Môi tiah tơdroăng ăm ‘nâi ing Khu xiâm ngăn hnê hriâm ƀă hnê mơjiâng tuăn ngôa rơkê hiăng tơbleăng hdrối mê, xo điêm tơ’noăng mơgêi râ má pái phôh thong hơnăm 2021 tâk a hên môn tơ’noăng. Tung mê, kơxô̆ ƀai tơ’noăng châ điêm hên a mâu môn môi tiah nâl Ănglê, Ngữ văn, Giáo dục công dân, Sinh học ...

Điêm ki pơkâ rah xo tiô ƀâng tơ’noăng mơgêi hriâm râ má pái phôh thong a kố cho điêm ki châ plah vâ mot hriâm a mâu hngêi trung ki ai hên tơdroăng pơkâ ngăn tiô kơxô̆ điêm tơ’noăng mơgêi râ má pái phôh thong (điêm dêi  mâu môn tơ’noăng râ má pái phôh thong cho tung khu điêm dêi tôh tơkŭm séa ngăn  rah xo điêm), kơxô̆ pơkâ rah xo hok tro mot hriâm, kơxô̆ hok tro chêh inâi vâ thế séa ngăn điêm mot hriâm môi kơvâ hriâm, môi tơdroăng hnê.

Điêm ki riân ngăn tơchoâm krâ tơdế ga hên, kơxô̆ ƀai tơ’noăng châ điêm 8 tơngi klêng xuân hên, mê tơdroăng séa ngăn điêm vâ rah xo ăm hriâm kô tơ’lêi tâ, mâu hngêi trung kô tơ’lêi tung mơnhên ki vâ rak tơniăn tơ-ƀrê ‘na kơxô̆ mot hriâm. Pakĭng điêm dêi mâu môn tơ’noăng hên tâ tâng vâ pơchông ƀă hơnăm 2020, mê tơdroăng mâu hngêi trung đại học hiăng ăm tiô pơkâ pro hên ăm mâu troăng rơhlâ môi tiah séa ngăn học bạ, séa ngăn điêm kô ‘nâi ivá hriâm, điêm ƀai tiô pơkâ dêi lâp plâi tơnêi...

Mê kơxô̆ ki vâ séa ngăn điêm tơ’noăng mơgêi hriâm râ má pái kô kơdroh hên. Kố xuân cho môi tung mâu tơdroăng ki kal pro điêm séa ngăn rah xo vâ mot hriâm đăi hok hơnăm kố kô thế hên tâ mâu hơnăm hdrối.

-Hok tro tối kơlo ki pá ƀă hlâu ai kơtăn dêi rơpó pơla mâu môn tung khu điêm kô pro pá ăm mâu hok tro tung tơdroăng pơ’lêh tơdroăng ki púi vâ, ƀă tối ti lâi ‘na tơdroăng kố?

Phŏ Yăo sư-Tiê̆n sih Nguyễn Thu Thủy, Ngế xiâm ngăn hnê hriâm đăi hok – Khu xiâm ngăn ‘na hnê hriâm ƀă hnê mơjiâng tuăn ngôa rơkê

Jâ Nguyễn Thu Thủy:  Luât pơkâ rah xo hok tro mot hriâm nôkố ăm phêp hok tro chiâng chêh séa ngăn ki ôh tá pơkâ kơxô̆ ki púi vâ, rêm khu tơkŭm a môi kơvâ cho môi tơdroăng púi vâ. Mâu hngêi trung ngăn a điêm ki mê vâ rah, rah ing điêm hên troh điêm iâ, ôh tá rah tiô kơ tơdroăng púi vâ mê  vâ rah, ôh tá riân mâu hok tro ki tơ’mô kơlo điêm a mơ’nui tung inâi, tiah mê hok tro kô chiâng chêh inâi séa ngăn rah xo ƀă hên a tôh hợp môi kơvâ cheăng.

Xua mê, mâu vâi o thế rah xêh mâu tôh hợp mâu môn tơ’noăng ki tơná châ điêm hên vâ veăng séa ngăn rah xo ƀă ai pơxúa. Ƀă tơdroăng xúa kŏng nghệ thông tin tung tơdroăng séa ngăn rah xo hok tro mot hriâm đăi hok, kao đẳng, hok tro ki ai hên rôh kô tơ’lêi, hên rôh vâ pơ’lêh tơdroăng púi vâ ăm tơtro, malối ngăn ing điêm tơ’noăng mơgêi hriâm râ má pái dêi tơná.

-Ô jâ, hơnăm kố mâu hngêi trung đăi hok ai hên tơdroăng séa ngăn điêm vâ rah xo mot hriâm ƀă tơdroăng pơkâ kơxô̆ mơngế hriâm hên tâ tâng vâ pơchông ƀă mâu hơnăm hdrối. Tơdroăng kố, hôm tơdjâk troh tơdroăng séa ngăn rah xo ƀă điêm tơ’noăng mơgêi hriâm râ má pái phôh thong há?

Jâ Nguyễn Thu Thủy: Tung tơdroăng tiô pơkâ tơná hngêi pơkâ rah xo dêi hok tro mot hriâm nôkố ƀă tơdroăng rế ton rế ai hên mâu hngêi trung hnê hriâm mâu kơvâ cheăng tối tơbleăng tơdroăng rah xo mâu hok tro mot hriâm krê lơ tơkŭm po tơ’noăng tiô khu kơxô̆ ki pơkâ rah xo mot hriâm ăm mâu ngế ki séa ngăn điêm ƀă điêm tơ’noăng mơgêi hriâm râ má pái kơdroh  tâ mâu hơnăm hdrối gá ai khât ƀă cho tung tơdroăng ki pin hiăng ‘nâi hdrối.

Tiô riân ngăn ăm hlo, hơnăm 2021 mâu hngêi trung hiăng pơkâ ăm mâu tơdroăng mơdêk rah xo mâu hok tro mot hriâm hên tâ tâng vâ pơchông ƀă mâu hơnăm hdrối. La tơdroăng rah xo tiô troăng rơhlâ mê ngăn tiô kơ hên tơdroăng môi tiah tiô pơkâ, kơxô̆ hok tro chêh inâi vâ rah xo, ki tơ-ƀrê ‘na xiâm rah xo, kơxô̆ hok tro châ rah xo mơnhên châ mot hriâm...

Mê xiâm ki rah xo cho 1 kơxô̆ ki ôh tá hên. Hok tro drêng hiăng châ séa ngăn điêm rah xo ƀă tơdroăng ki pơrá phá dêi rơpó hiăng châ vâ mot hriâm ƀă hlối mơnhên mot hriâm mê kơ ôh tá châ séa ngăn rah xo a mâu hngêi trung ki ê a mâu tơdroăng pơrá phá nếo. Mâu hngêi trung kô thế chêh ‘mot inâi mâu hok tro ki hiăng châ plah môn hriâm tung kơmăi rak ngăn ƀă mâu hok tro ki mê kô ôh tá chiâng veăng séa ngăn rah xo rôh má 1 ƀă tơdroăng ngăn điêm tơ’noăng ƀă kô ôh tá pro tơdjâk troh tơdroăng  kơxô̆ ki pơkâ  rah xo hok tro tiô troăng hơlâ séa ngăn điêm mê tiô tơdroăng ngăn điêm ơ’noăng mơgêi tơ’noăng râ má pái.

-Jâ hôm ai hnê tối ki klâi ăm mâu hok tro vâ ai tiô pơkâ môi tiah tơdroăng púi vâ tung rơnó rah xo hok tro mot hriâm đăi hok tung hơnăm kố?

Jâ Nguyễn Thu Thủy: Điêm tơ’noăng mơgêi hriâm râ ma pái phôh thong hơnăm kố hên tâ 1 iâ tâng vâ pơchông ƀă hơnăm hdrối, vâ tối kô ai mâu ngế ki ‘nâ châ 25,  26 điêm la xuân châ vâ mot hriâm đăi hok tâng ôh tá hbrâ rơnáu, tăng ‘nâi plĕng nhên tơdroăng púi vâ. Tơkéa vâ tối hok tro ôh tá chiâng tơngôu hlo điêm tơná châ to mê, tơngôu tơbriât a mâu hngêi trung ki rah xo điêm hên. Drêng pơ’lêh tơdroăng púi vâ, hok tro hôm kal séa ngăn há xua hlo điêm tơná tơ’mô ƀă điêm ki pơkâ dêi kơvâ cheăng hơnăm hdrối, xua  điêm hên tiô pơkâ dêi kong pơlê, ôh tá xê krê xêh môi tiah ai iâ ngế hok tro châ.

Ƀă vâi o ki khên tơnôu ‘nâi nhên dêi điêm ai hên khat mê tơ’nôm tơdroăng púi vâ, kô rah xo mâu kơvâ cheăng ki tơná vâ la a hnê a hngêi trung, kô chiâng rah mâu kơvâ cheăng ki tơná vâ a hngêi hngêi tung ki pơrá phá vâ mơdêk kơxô̆ mơngế châ rah xo.

-Mơnê jâ Nguyễn Thu Thủy, Ngế xiâm ngăn hnê hriâm đăi hok Khu xiâm ngăn hnê hriâm ƀă hnê mơjiâng tuăn ngôa rơkê ‘na tơdroăng tơpui tơno.

Gương tơplôu ƀă tơbleăng