VOV4.Sêdang - Kơxê lơ 17/8, pơtối rôh hôp má 2, Vi ƀan pơkuâ Kuô̆k hô̆i ăm rơkong tơpui tối ‘na tơdroăng pơkâ ƀă tơdroăng ki pơkâ kơlo xing xoăng liăn ngân Tơnêi têa hơnăm 2022. Ai mâu tơdroăng ki châ hên vâi tơpui tối a rôh hôp cho tơdroăng ‘na liăn ngân pơkâ. Chin phuh pơkâ mơ’no, mâu tíu pêi cheăng dế pêi pro mâu tơdroăng pơkâ liăn ngân, pêi lo liăn xiâm a mâu kơ koan kô pơtối châ pêi pro tung hơnăm 2022 tá troh drêng pêi pro hơ’lêh liăn khế a hâi lơ 1/7/2022.

Pôa Vương Đình Huệ, kăn xiâm hnê ngăn Kuô̆k hô̆i

Vi ƀan rak Liăn ngân tơnêi têa pơkâ thế Chin phuh pơtroh tối nhên tâ vâ rak tơniăn tơdroăng ki tơdâng ƀă tơtro pơla tơdroăng ki pơkâ rơhêng vâ pêi pro hơ’lêh liăn khế ƀă mâu tơdroăng ki kal tung kơxop hlá mơéa ‘na pơkâ, kơlo xing xoăng liăn khế dêi chal tơniăn liăn ngân 2022 – 2025.

‘Na tơdroăng kố, pôa Vương Đình Huệ, kăn xiâm hnê ngăn Kuô̆k hô̆i tối nhên, tơdroăng pơkâ dêi Tơnêi têa hiăng tối nhên tơdroăng ki hơ’lêh liăn khế athế pêi pro a hâi lơ 1/7/2022, tiah mê, tâi tâng mâu tơdroăng ki klâi pêi pro hdrối nah athế tah lôi.

Katarina Nga tơplôu ƀă tơbleăng