*** Rôh hôp tơniăn gâk kring mơnhông cheăng kâ rêh ối mâu kong pơlê Tây Nguyên 2024 a Lâm Đồng

Hâi 25/8/2024, a pơlê kong kơdrâm Đà Lạt, kong pơlê Lâm Đồng, pôa Phạm Minh Chính, Ngế pro xiâm hnê ngăn tơnêi têa pơkuâ po Rôh hôp rak vế tơniăn tung mơnhông cheăng kâ rêh ối pơlê pơla mâu kong pơlê kơpong Tây Nguyên. Rôh hôp tơkŭm tơpui ‘na rak vế gâk kring tơniăn vâ mơnhông cheăng kâ rêh ối pơlê pơla tung kơpong.

Mơgêi a rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên, Tây Nguyên cho kong pơlê tung la ngiâ malối kal khât ‘na cheăng kâ, kal kí, gâk kring, cheăng lêng ƀă kong prâi tơnêi tơníu dêi tơnêi têa. Đảng, Tơnêi têa, mâu kăn pơkuâ hnê ngăn Đảng ing mâu hneăng hdrối nah đi đo tơmâng ngăn, tŏng gum ăm tơdroăng mơnhông ƀă tơniăn dêi Tây Nguyên.

Ngế pro xiâm hnê ngăn Chin phuh tối nhên, tơdroăng kal má môi cho kuăn pơlê athế ai tơdroăng rêh ối phâi hơtôu; cho xiâm dêi rak vế gâk kring, tơniăn tơdroăng rêh ối, pêi lo liăn ngân, tuăn mơno dêi kuăn pơlê ôh tá la lâi pơtê pơhlêh.

Pôa Phạm Minh Chính, Ngế pro xiâm hnê ngăn tơnêi têa pơkâ thế tơkŭm pêi 6 tơdroăng cheăng ki kal, rak vế gâk kring, tơniăn ăm Tây Nguyên vâ gum tơdroăng mơnhông cheăng kâ rêh ối pơlê pơla; tŏng gum mâu tơdroăng cho ‘na tơnêi ối, tơnêi pêi; khŏm mơ-eăm ‘nhiê tah lôi hngêi tơ’nhiê xi kơchoh; tŏng gum túa rêh ối tơdroăng cheăng pêi; hnê cheăng ăm kuăn pơlê hdroâng kuăn ngo.

***Tơbleăng kơpong Tây Nguyên pơla hơnăm 2021-2030, mâu tơdroăng vâ pêi pro troh hơnăm 2050

Hâi lơ 23/6/2024, a pơlê kong kơdrâm Đà Lạt, kong pơlê Lâm Đồng, pôa Trần Lưu Quang - Ngế pro xiâm phŏ hnê ngăn tơnêi têa pơkuâ Hôp Hô̆i đong xing xoăng hnoăng cheăng pêi kơpong Tây Nguyên rôh má pái ƀă tơbleăng pơkâ kơpong Tây Nguyên pơla hơnăm 2021-2030, mâ ngăn tơdroăng vâ pêi troh hơnăm 2050.

A hneăng hôp, kăn hnê ngăn 5 to kong pơlê kơpong Tây Nguyên hiăng tơbleăng  tối mâu tơdroăng pêi pro tiô Pơkâ kơxô̆ 23 - NQ/TW na mơnhông cheăng kâ - rêh ối ƀă rak tơniăn cheăng lêng, kring tơniăn kơpong Tây Nguyên troh hơnăm 2030, mâu tơdroăng vâ pêi troh hơnăm 2045. Mâu tơdroăng hnê tối tiah kố, kơ’nâi lối 1 hơnăm pêi tơdroăng Pơkâ, hlê plĕng rêm râ, kơvâ cheăng, malối mâu cheăm, tơring, kong pơlê tung kơpong rế châ mơnhông tơƀrê; hên tíu ki pá tơvâ tơvân ‘na cheăng kâ chôa hlê plĕng mơnhông, tơ’lêi hlâu dêi kơpong ƀă tơring, kong pơlê tung kơpong dế châ pơtối rak vế pêi pro; pêi châ tơƀrê hên tơdroăng kal, tung tŭm tơdroăng  cheăng.

Tối mơgêi a hneăng Hôp, pôa Trần Lưu Quang - Ngế pro xiâm phŏ hnê ngăn tơnêi têa, pơkâ thế kơpong Tây Nguyên pơtối rak vế túa lĕm tro, vêa vong kuăn ngo, rak ki tơrŭm môi tuăn; pơtối pơhlêh nếo tuăn tơmiât tung mơnhông cheăng kâ. Tơdrêng amê, tơmâng mơnhông pro troăng prôk  tơdjêp; mơnhông ôm hyô tiô troăng; tối ăm dêi rơpó tơ’mot ‘no liăn cheăng, pro xiâm, tuăn loi dêi kuăn pơlê, khu mơdró.

*** Cheăng kâ, rêh ối dêi mâu kong pơlê tung kơpong Tây Nguyên châ tơƀrê tung hơnăm 2024

Hơnăm 2024, mâu kong pơlê kơpong Tây Nguyên pêi châ tơƀrê hên mâu tơdroăng; hên tơdroăng pơkâ pêi chiâng tơdroăng bâ tung pơkâ cheăng kâ kơpong; mâu tơdroăng cheăng mơhno túa lĕm tro, rêh ối pơlê, cheăng lêng, gâk kring, tơniăn tung pơlê pơla châ rak vế. Ối hdrối cho kong pơlê Kon Tum, ki têi ‘na GDP châ 8,2% tâng vâ pơchông ƀă khế kố hơnăm nah; châ ối a tơdế a kơpêng tíu pơxá mơdêk cheăng kâ dêi lâp tơnêi têa. Tâi tâng tơmeăm a kong pơlê tê châ lối 38 rơpâu rơtal liăn, kơxô̆ liăn châ xo ing tê tơmeăm ngi kong têa ê lối 406 rơtuh dollars, tâk lối 13% tâng vâ pơchông ƀă hơnăm nah.

Pơtối mê, cho kong pơlê Dak Nông, ƀă 7/11 khu pơkâ pêi klêi ƀă pêi tơkâ luâ túa pơcháu. Malối, pêi lo liăn rêm ngế dêi kong pơlê châ lối 81 rơtuh liăn. Kố cho ivá mơnhông tơƀrê, gum Dak Nông mơ-eăm châ ối má 43 tung 63 to kong pơlê, pơlê kong kân dêi lâp tơnêi têa.

Hơnăm 2024, ki tơƀrê a kong pơlê Gia Lai cho kơxô̆ rơpŏng kơtiê kơdroh lối 6% luâ túa pơkâ mơ’no. Nâp liăn châ dâng 5.890 rơtal, luâ tơdroăng pơkâ nâp liăn Tơnêi têa ƀă Hô̆i đong hnê ngăn kong pơlê pơcháu, tâk vâ chê 5,1% tâng vâ pơchông ƀă hơnăm nah. Tung pơla mê, kong pơlê Dak Lak ai 12/16 tơdroăng pơkâ pêi châ tơƀrê ƀă luâ túa pơcháu. Tung mê, nâp liăn tiô riân châ 8.500 rơtal liăn, GRDP rêm ngế tiô riân châ 72,8 rơtuh liăn, tâi tâng kơxô̆ liăn châ xo ing tê tơmeăm ngi kong têa ê châ 1 rơtal 650 rơtuh dollars.

Mơgêi rak vế, pêi pro Tơdroăng pơkâ kơxô̆ 18 - NQ/TW dêi Khu xiâm pơkuâ hnê ngăn cheăng Đảng hneăng XII, mâu kong pơlê kơpong Tây Nguyên khŏm mơ-eăm pêi pro kơtăng khât tơdroăng cheăng ki tơbleăng Tơkêa Pêi pơtối pơhlêh nếo, ‘mâi rah xo mơngế cheăng tung khu pơkuâ cheăng kal kí la athế bu ai iâ mơngế, pêi cheăng dâi khât, tơƀrê păng ‘nâng.

*** Khu xiâm Kŏng an tơbleăng mơjiâng pro 1.200 toăng hngêi  gum ăm rơpŏng kơtiê a Dak Lak

Năm 2024, Khu xiâm ngăn ‘na Kŏng an tơbleăng tơdroăng tơkêa pro mơjiâng 1.200 toăng hngêi tuăn pâ ăm mâu rơpŏng kơtiê, xơpá, kuăn ngo ƀă rơpŏng ai hnoăng ki kơtiê a kong pơlê Dak Lak. Ƀă hnoăng cheăng pêi rơtế mơ-eăm dêi kŏng an kong pơlê Dak Lak ƀă mâu kăn cheăm tơring, 1.200 toăng hngêi hiăng châ mơjiâng pro klêi a mơ’nui khế 7/2024, luâ tơdroăng pơcháu hnoăng gá pro bú 3 khế.

Đăi tươ̆ng Lương Tam Quang - Ngế xiâm ngăn Kŏng an tối, 1.200 toăng hngêi ăm rơpŏng xơpá a Dak Lak châ mơjiâng pro luâ tơdroăng ăm hlo  ing tơdroăng pro thâ rĕng kêi, ai hnoăng pêi pro dêi mâu kŏng an, rêm râ kơvâ cheăng a cheăm, tơring; rơtế veăng ai hnoăng dêi hên khu mơdró tung pêi tơdroăng cheăng gum rêh ối pơlê pơla.

Tiô pôa Lương Tam Quang, Ngế xiâm pơkuâ Kŏng an kô pơtối pêi ahdrối tung mâu tơdroăng cheăng “Lâp tơnêi têa rơtế tơdjuôm tah hngêi pơtân, hngêi xi kơchoh tung kong pơlê’’. Vâ ôh tá ai ngế ki lâi lôi pá rŏng; veăng ‘no hnoăng ai pơxúa a tơdroăng pơkâ xut tah 153.000 toăng hngêi pơtân, hngêi xi kơchoh tung lâp tơnêi têa, malối a mâu cheăm hơngế hơngo ôh tá tơniăn, tung mê ai mâu tơring tung kơpong Tây Nguyên.

*** Dak Lak tơkŭm po Leh tơbâ 120 hơnăm Hâi mơjiâng kong pơlê

Hâi lơ 22/11/2024, a Plông kân Lơ 10 khế 3, pơlê kong kơdrâm Buôn Ma Thuột po leh Tơbâ 120 hơnăm Hâi mơjiâng kong pơlê Dak Lak.

Luâ 120 hơnăm mơjiâng ƀă mơnhông, troh nôkố Dak Lak hiăng chiâng kong pơlê xông tơƀrê dêi kơpong Tơdế Tơnêi têa - Tây Nguyên; cheăng kâ pơtối rak xông tơƀrê a kơlo ki hôm; tâi tâng kế tơmeăm pêi lo ing chiâk deăng ối má môi tung kơpong Tây Nguyên.

Veăng leh ƀă tơpui a rôh leh, pôa Nguyễn Hòa Bình - Ngế pro xiâm phŏ hnê ngăn tơnêi têa rơkâu, khê̆n kơdeăn khât mâu tơdroăng ki mơ-eăm, mâu hnoăng cheăng hiăng pêi châ tơƀrê dêi Đảng ƀô̆, mâu kăn, mâu lêng ƀă kuăn pơlê kong pơlê Dak Lak. Vâ mơnhông tơná xông rơdêi tơxâng ƀă tíu xiâm ối tơdế ƀă tíu xiâm pêi cheăng kâ kơpong Tây Nguyên, kong pơlê Dak Lak kal thế tơmâng pêi pro tro tiô hnê mơhno dêi Khu xiâm tơnêi têa, pêi mâu tơdroăng cheăng tiô pơkâ, pơcháu ai chêh tơbleăng tung Pơkâ hneăng hôp Đảng rêm râ, Mơgêi kơxô̆ 67 ƀă Pơkâ kơxô̆ 23 dêi Khu xiâm, Pơkâ kơxô̆ 72 dêi Kuô̆k hô̆i ƀă Pơkâ kơxô̆ 1.747 dêi Ngế pro xiâm hnê ngăn Chin phuh kĭ pơkâ ăm kong pơlê Dak Lak pêi, mơ-eăm pêi ai tiô pơkâ troh hơnăm 2050 Dak Lak kô "chiâng kong pơlê ki ai tơmeăm khoăng nhâ loăng kong kế, khôi túa vêa vong, tơdjêp hriăn plĕng ki nếo, cho tíu hên ngế vâ troh, tíu tơxâng rêh ối”.

*** Leh tơbâ 20 hơnăm Hâi vêh mơjiâng kong pơlê Dak Nông ƀă tơdah xo Me dái Tơniăn krê ối má Môi

Hâi lơ 23/3/2024, kong pơlê Dak Nông tơbâ 20 hơnăm hâi vêh mơjiâng ƀă tơdah xo Me dái Tơniăn krê ối má Môi.

Klêi kơ’nâi 20 hơnăm mơjiâng ƀă mơnhông, Dak Nông pêi châ tơƀrê hên tơdroăng ki kal ƀă hiăng pêi chía vâ tŭm, hluăn ing tơdroăng dêi môi kong pơlê kơtiê. Ki têi mơdêk cheăng kâ đi đo châ a kơlo ki hên, túa tâi tâng tơmeăm tâk 12 xôh; tâi tâng liăn ‘no mơnhông tung lâp pơlê pơla tâk 20 xôh apoăng hâi vêh mơjiâng.

Tơkŭm pơhlêh tơdroăng ‘no liăn pêi cheăng tê mơdró, tơdroăng tung la ngiâ ‘na ‘no liăn cheăng pro hngêi trăng, troăng klông, rah xo tro mâu tơdroăng ki kal mơdêk, Dak Nông hiăng ƀă dế cho tíu troh tơ’mot hên khu ‘no liăn tung tơnêi têa ƀă kong têa ê. Ngiâ méa thôn pơlê, kơphô̆ hlo mơnhông tơƀrê rơdêi, lĕm, ivá rêh ối nếo ƀă tơdroăng púi vâ mơ-eăm, tơhrâ kô chiâng ivá mơdêk nếo dêi kơpong Tây Nguyên ƀă lâp tơnêi têa.

Troh hơnăm 2030, Dak Nông mơ-eăm chiâng kong pơlê chía mơnhông dêi kơpong Tây Nguyên; cho tíu xiâm cheăng kơmăi kơmok bauxite-alumin-nhôm dêi tơnêi têa, tíu xiâm on tơhrik ‘mâi pro dêi kơpong; mơnhông tơdroăng pêi chiâk deăng xúa kơmăi kmok chal nếo, tơrŭm tiô túa kơnía tro ƀă kơchơ tê mơdró.

*** Festival reăng Đà Lạt rôh má 10, pơxá “Reăng Đà Lạt - Idrâp prôa ai hên mơngiơk lĕm”

Sap hâi lơ 5 troh hâi lơ 31/12/2024 po Festival reăng Đà Lạt rôh má 10, pơxá “Reăng Đà Lạt- Idrâp prôa ai hên mơngiơk lĕm”.

Đà Lạt pơlê kong kơdrâm Festival Reăng dêi Việt Nam, cho leh mơdĭng ki ro tơviah dêi pơlê kong kơdrâm tơbăng ngo lĕm tung tuăn mơno ƀă mâ ngăn, pơlê kong kong kơdrâm hriăn plĕng ki nếo tung mâu tơdrá prôa hơdruê xuăng dêi UNESCO ƀă cho pơlê kong kơdrâm ối tung “Khu 5 pơlê kong kân Festival ki tơviah ro dêi châu Á”.

Festival reăng Đà Lạt pơtối pơ-eăng mâu tơmeăm khoăng kơnía git ‘na reăng ƀă tơdroăng cheăng pêt reăng; gum ăm rôh vâ kơvâ pêt reăng Đà Lạt tơrŭm ƀă, tơbleăng lâp lu, mơnhông ƀă kơvâ ôm hyô, tơdrêng ƀă cheăng kơkăi kơmok mơhno túa lĕm tro hlối tơrŭm cheăng ƀă lâp plâi tơnêi.

Tơbleăng a rôh Leh pơxiâm po, pôa Nguyễn Hòa Bình, Ngế pro xiâm phŏ hnê ngăn Chin phuh khê̆n kơdeăn ki kơdôu mơ-eăm pêi tơƀrê tơdroăng kal ki Đảng ƀô̆, mâu Kăn ƀă kuăn pơlê mâu hdroâng kuăn ngo kong pơlê Lâm Đồng, pơlê kong kơdrâm Đà Lạt hiăng pêi châ rơhéa tung mâu hơhnăm hdrối mê hía nah. Pakĭng mê, tơdrŏng tung la ngiâ, kong pơlê kal pơtối tơmâng khât troh kring vế hyôh kong prâi, tơmâng troh kŏng ngê̆ pêi cheăng kơmăi kơmok, rah, rôe mâu hdrê reăng kơnía, tơtro ƀă tơdroăng kal vâ dêi kơchơ mơdró vâ mơdêk tơbriât tê ƀă mơnhông kơvâ pêt reăng krá tơniăn; mơhnhôk mâu khu mơdró tơrŭm cheăng, pơla khu mơdró ƀă mơngế pêi pro, kring vế ƀă mơnhông inâi vâ tơrŭm ƀă kơchơ mơdró lâp plâi tơnêi.

*** Mơđah tơbleăng Sầu riêng Krông Pač rôh má II ƀă inâi “Sầu riêng Krông Pač: Mơnhông ƀă tơrŭm” ƀlêi chiâng

Mơđah tơbleăng Sầu riêng Krông Pač rôh má II hơnăm 2024 ai inâi “Sầu riêng Krông Pač: Mơnhông ƀă tơrŭm” po ing hâi lơ 31/8 troh lơ 2/9/2024, ƀă 12 tơdroăng cheăng ki păng ‘nâng hiăng ‘măn chôu hên tơdroăng ki ƀlêi trâng ăm kuăn pơlê.

Mơđah tơbleăng hiăng tơdah dâng 200 rơpâu ngế kuăn pơlê, tơmối tung kong pơlê ƀă tơmối ing kong pơlê ki ê ƀă ing kong têa ê veăng troh a rôh mơđah tơbleăng hiăng ‘măn chôu tơdroăng ki lĕm tro má môi. Mơđah tơbleăng xuân tơ’mot lối 350 kơbong tơbleăng tê tơmeăm dêi mâu khu mơdró kâ, khu pêi cheăng tơrŭm, pêt mơjiâng – tê mơdró mâu tơmeăm sầu riêng, tơmeăm OCOP ƀă pêi chiâk deăng, tơmeăm xúa tung pêi chiâk ƀă hên ki ê dêi kong pơlê kong pơlê ki ê, veăng gum mơđah tơbleăng hên tơmeăm, hên plâi kâ ki lĕm dâi dêi tơring.

A rôh hôp mơjiâng ƀă mơnhông xiâm loăng, tơkâng sầu riêng krá ton hiăng po tê tơbriât ƀlêi chiâng 3 pŭm plâi “Nữ hoàng sầu riêng”, ƀă kơxô̆ liăn lối 2,8 rơtal. Tâi tâng kơxô̆ liăn kố châ xúa vâ pêi tơdroăng cheăng tŏng gum pơlê pơla, hnê hriâm, gum kuăn pơlê pêt sầu riêng tơring Krông Pač ‘na kih thuât pêt, rak ngăn sầu riêng mơdêk ki lĕm, yă kơnâ dêi kơvâ cheăng, pêi pro châ tơdroăng púi vâ tê ngi kong têa ê.

*** Hên tơdroăng po mơdĭng túa lĕm tro mâu kuăn ngo Tây Nguyên

Măng tĭng mơhno túa lěm tro - Ôm hyô roh má 5 ƀă tơ’noăng tŏn chêng kroăng, xuăng dêi mâu hdroâng kuăn ngo kong pơlê Kon Tum rôh má 2  pơxá “Ngăn túa lěm tro - Tăng ngăn kong kế’’ po sap hâi lơ 11 troh hâi lơ 14/12/2024.

Măng tĭng mơhno túa lěm  tro - Ôm hyô roh má 5 ƀă tơ’noăng tŏn chêng koăng, kơhnhon xuăng mâu dêi hdroâng kuăn ngo kong pơlê Kon Tum rôh má 2 hơnăm 2024 ai lối 1.000 ngê̆ nhân, ngê̆ sih dêi 10 tơring, pơlê kong kơdrâm Kon Tum, mâu hok tro Lếo, Kul ƀă mâu ngê̆ sih kong pơlê An Giang veăng leh.

A kố hiăng pêi pro hên tơdroăng trâm mâ, mơđah túa lěm tro hơdruê xuăng pơla mâu ngế ki rơkê ki kuăn pơlê ô eăng, tơbleăng túa lěm tro  dêi kuăn mơngế Kon Tum.

Măng tĭng Reăng mâ hâi kong - Ngo on Chư Đăng Ya hơnăm 2024 châ Vi ƀan kuăn pơlê kong pơlê Gia Lai tơkŭm po ing hâi lơ 6 troh hâi lơ 12/11/2024 ƀă hên tơdroăng pêi pro mơhno túa lĕm tro, ngê̆ thuât, tơ’noăng ivá, hơniâp ro  mê cho: Tơdroăng  mơđah ‘’Kơ’râu xuăng Reăng mâ hâi kong - Ngo Chư Đăng Ya hơnăm 2024”,  mơđah tŏn chêng koăng, xuăng tiô chal krâ; mơđah teăn tơmeăm ƀă rái, phêa, kơlá, pong rơgi um loăng, teăn hmôu, ếo pơtâk kuăn ngo, pro mâu rơvŏng, prôa kuăn ngo, pong rơgi pro um loăng tiô chal krâ nah, pro prôa kuăn ngo ton nah; tơbleăng mâu tơmeăm túa lĕm tro ki krê xêh tiô vâi krâ rôh nah dêi mâu hdroâng kuăn ngo; pơtối po mơdĭng tơbâ xối tĭng kâ báu nếo dêi mơngế Bơhnéa; Tơ’noăng kơtâu troh a hdôu ngo Chư Đăng Ya, ƀă tơdroăng kơtâu hlối hếo ngo; kơ’nêi pum plum; tơ’noăng kơtâu Half Marathon hơnăm 2024 “Tơbâ kơpong pơlê xiâm ton nah Chư Pah - Lăm pro tơdroăng tơdjêp Ngo ƀă Reăng” ƀă hên tơdroăng ki ê...

Hâi lơ 26/12, a pơlê kong kơdrâm Gia Nghiã, Vi ƀan kong pơlê Dak Nông tơkŭm po leh tơdah inâi pơxá Kŏng viên tơnêi tơníu UNESCO Dak Nông rôh má 2.  Châ pơxá inâi “Pơlê xiâm dêi mâu Idrâp ro tơniâ’’, Kŏng viên tơnêi tơníu lâp plâi tơnêi UNESCO Dak Nông hiăng mơhno ki rơdêi tung lơ gât tơmeăm khoăng lâp plâi tơnêi, veăng pơ-eăng mâu tơdroăng ki kơnía git tơnêi tơníu, túa lĕm tro a lơgât tơmeăm khoăng lâp plâi tơnêi veăng pơ-eăng  ki kơnía git ‘na tơnêi tơníu, túa lĕm tro ƀă nhâ loăng, kong kế tơviah lĕm dêi kơpong Tây Nguyên.

*** Hơniâp ro tơdroăng pêi pro mơhnhôk tê mơdró a mâu kong pơlê tung kơpong Tây Nguyên

Hơnăm 2024, a mâu kong pơlê kơpong Tây Nguyên pêi pro hên tơdroăng cheăng tê mơdró.

Sap hâi lơ 6 troh lơ 12/9/2024, Tíu xiâm Mơhnhôk tê mơdró - Khu xiâm ngăn tê mơdró tơrŭm ƀă Khu ngăn ‘na tê mơdró kong pơlê Kon Tum tơkŭm po Kơchơ Tê mơdró kơpong Tây Nguyên a pơlê kong kơdrâm Kon Tum, tơ’mot 250 khu tơbleăng tê tơmeăm dêi lối 110 khu mơdró tung tơnêi têa ƀă kong têa ê tơbleăng mâu tơmeăm kơmăi kok pêi chiâk deăng ki xúa hên, tơmeăm OCOP, tơmeăm pêi lo hên dêi mâu kơpong, mâu kong pơlê.

Hâi lơ 23/8/2024 a Lâm Đồng po Hôp mơgêi tơdjêp tê mơdró ƀă ‘no liăn cheăng pơla mâu khu mơdró Lâm Đồng ƀă khu mơdró pơlê kong kân Hồ Chí Minh. Mâu kăn hiăng tơpui tối mâu tơdroăng tăng tíu mơdró ƀă tăng khu ki vâ rôe tơmeăm - khu ‘no liăn pêi cheăng. Hiăng ai 12 khu mơdró, tơrŭm cheăng dêi Lâm Đồng kĭ vâ tơrŭm cheăng ƀă mâu tíu pêi cheăng a Pơlê kong kân Hồ Chí Minh.

Sap hâi lơ 23 troh hâi lơ 24/9/2024 a Ƀuôn Ma Thuột, Hâi pơxiâm pêi cheăng pơ’lêh nếo hriăn plĕng ki nếo kong pơlê Dak Lak hơnăm 2024, ƀă hên tơdroăng pêi pro, mê cho: mơhno, tơbleăng tơdroăng Tơkêa bro, tơmeăm pêi lo drêng pơxiâm pêi cheăng, tơmeăm châ mơnhên OCOP, tơmeăm kơmăi kơmok xúa tung pêi chiâk, tơmeăm pro pơxúa tung ôm hyô a cheăm tơring tung kong pơlê; Hôp tơpui mơhnhôk khu mơdró Dak Lak pơxiâm pêi cheăng, pơ’lêh nếo ƀă mơnhông krá tơniăn.