*** Hbrâ tơmeăm ƀă ivá, khŏm mơ-eăm djâ tơnêi têa mot tung rơxông mơnhông dêi tơná

Mâu tơdroăng châ tơƀrê châ klêi kơ’nâi 40 hơnăm pơhlêh nếo ing pơkuâ dêi Đảng gum Việt Nam tơkŭm ‘măn ki vâ mơnhông ƀă ivá ăm tơdroăng mơnhông châ tơƀrê tung hneăng pơtối. Pôa Tô Lâm, Kăn xiâm pơkuâ hnê ngăn Đảng mơnhên kố cho roh ‘’tơkŭm’’ tâi tâng mâu tơdroăng ki tơ’lêi, ivá vâ tơnêi têa mot tung rơxông nếo, rơxông mơ-eăm dêi tơná dêi hdroâng mơngế pơtối klêi kơ’nâi rơxông tơniăn krê, tơniăn lĕm, mơjiâng chuh ngiah pơlê pơla ƀă rơxông pơhlêh nếo.

Hneăng hôp roh má 10, Khu pơkuâ xiâm Đảng hneăng má XIII mơnhên rơxông mơ-eăm dêi tơná dêi hdroâng mơngế Việt Nam kô pơxiâm sap ing Hneăng hôp má XIV dêi Đảng. Vâ châ pơkâ xiâm kố, sap ing nôkố, tâi tâng Đảng, tâi tâng kuăn pơlê kal tơkŭm 3 roh ‘nhiê troăng pêi ton xŏn cho pơhlêh mâu pơkâ, bro lế lĕm tro khu pêi cheăng ƀă mơdêk mơngế pêi cheăng, rế pơkuâ krá tơniăn, rế mơjiâng mơnhông, tơdrêng amê, mơnhông ó rơdêi tơdroăng ki rơdêi tơnôu dêi hdroâng mơngế, hiâm mơno pơkuâ xêh, loi tơngah, mơ-eăm xêh, tơdjêp krá tơniăn ivá hdroâng mơngế ƀă ivá rơxông nếo, djâ tơnêi têa mơnhông tâi tâng, ó rơdêi, tơkâ hluâ hlối ƀă xông kơneăng.

*** Pôa Nguyễn Phú Trọng, Kăn xiâm pơkuâ hnê ngăn cheăng Đảng hlâ

Hâi 19/7/2024, pôa Nguyễn Phú Trọng, Kăn xiâm pơkuâ hnê ngăn cheăng Đảng hlâ klêi kơ’nâi hâi khế châi tamo râ ƀă ‘măn chôu tơdroăng ki sĭng khéa ó khât ăm kuăn tâi tâng Đảng, tâi tâng kuăn pơlê ƀă tâi tâng mâu vâi pú lâp plâi tơnêi. Mơ-éa pơchuât a leh mơdâm pôa Nguyễn Phú Trọng, Kăn xiâm pơkuâ hnê ngăn cheăng Đảng tối nhên: “Đi đo plâ rơxông tung hiâm mơno tơmiât dêi pôa Nguyễn Phú Trọng cho Kuăn pơlê, cho kuăn mơngế, cho tâi hiâm mơno, tâi ivá gum Kuăn pơlê, mơjiâng kuăn mơngế nếo xah hô̆i chuh ngiah ƀă ôh tá la lâi pơtê ‘mâi mơnhông tơrŭm môi tuăn, hdrối tâ cho tơrŭm môi tuăn tung Đảng, tơrŭm kân tung tâi tâng kuăn hdroâng mơngế ƀă tơrŭm lâp plâi tơnêi bâ lĕm”.

Tơdroăng rêh ƀă tơdroăng cheăng dêi pôa Nguyễn Phú Trọng, Kăn xiâm pơkuâ hnê ngăn cheăng Đảng mơhno tơdroăng mơ-eăm tơplâ ôh tá la lâi pơtê dêi ngế kŏng san tơdrăng, plâ rơxông rêh kal tơdrăng, hiâm mơno pêi cheăng ôh tá tơmiât klâi, môi ngế ki lĕm ‘na hriâm tâp ƀă pêi tiô tuăn tơmiât, hiâm mơno, túa rêh ối Hồ Chí Minh.

Mâu tơdroăng kơnía ki pôa Nguyễn Phú Trọng ‘măn chôu ‘na môi khu pơkuâ tơdroăng kal kí krá rơdêi, tơdroăng loi krá kâk tung ivá rơdêi tơrŭm hdroâng mơngế kô đi đo cho tơdroăng kơnía git ăm Đảng, Tơnêi têa ƀă Kuăn pơlê pin.

*** Roh pơhlêh bro lế lĕm tro khu pêi cheăng – tơdroăng ki pơhlêh kal tung pơkuâ tơnêi têa

Hluâ 7 hơnăm pêi pro Pơkâ 18 - NQ/TW hâi lơ 25/10/2017 dêi Khu pơkuâ xiâm Hneăng má XII ‘na pơhlêh nếo, bro lế lĕm tơtro khu pêi cheăng dêi khu cheăng kal kí, troh nôkố, pin hiăng châ mâu tơdroăng châ tơƀrê ki kal. Laga, khu pêi cheăng xuân ối tơvâ tơvân, hên râ, hên tơdroăng ki xiâm; xêt khât, châ tơƀrê tơdroăng tá hâi tơxâng pơkâ, hnoăng cheăng.

Hâi lơ 25/11, a hneăng hôp Khu pơkuâ Tơnêi têa hneăng má XIII, pôa Tô Lâm, Kăn xiâm pơkuâ hnê ngăn Đảng pơkâ mâu khu râ kăn pơkuâ hnê ngăn cheăng Đảng, khu pêi cheăng Đảng, kơ koan, tíu cheăng, mâu râ, mâu kơvâ cheăng, ahdrối cho kăn ƀô̆ pơkuâ, ngế ối a ko kal djâ troăng ahdrối, hbrâ xêh, kơtăng tung pêi pro hnoăng cheăng châ pơcháu tiô hiâm mơno ‘’rế kơtâu rế ối pơtăng’’; ‘’Tơnêi têa ôh tá tơkôm râ kong pơlê, râ kong pơlê ôh tá tơkôm râ tơring, râ tơring ôh tá tơkôm râ cheăm’’; khŏm mơ-eăm kêi đeăng tơdroăng mơgêi pêi pro Pơkâ 18 – NQ/TW ƀă tơbleăng Khu pơkuâ xiâm Tơnêi têa ‘na troăng pêi pro bro lế lĕm, kêi đeăng tâi tâng khu pêi cheăng kal kí tung Pái khế apoăng hơnăm 2025.

Tơdroăng bro lế lĕm tro khu pêi cheăng cho môi roh pơhlêh pơkâ thế tơdroăng ki khên tơnôu, pleăng hnoăng cheăng dêi kăn ƀô̆, kŏng chưk, viên chưk, pơkâ thế pêi pro ôh tá tơdjâk pa kong, tơdâng tơ’mô, khoa hok vâ hbrâ djâ tơnêi têa mot tung rơxông nếo.

*** Cheăng kâ tê mơdró Việt Nam tâk krá, GDP tâk dâng 7%

Cheăng kâ tê mơdró Việt Nam xuân rak vế ivá mơnhông tung hơnăm 2024. Tâk GDP tiô riân châ dâng 7%, pro mơhrê châ mơdât troh 4%, châ tiô tơdroăng pơkâ mơ’no. Tâi tâng kơxô̆ liăn châ xo ing roê ‘mot tơmeăm tung tơnêi têa ƀă tê tơmeăm ngi kong têa ê vâ chê a kơlo 800 rơtal dollars, tê tơmeăm tơdrăng ngi kong têa ê vâ chê 23 rơtal dollars, kơlo hên má môi ing nah troh nôkố. Tơ’mot liăn FDI châ lối 31 rơtal dollars, ối tung khu 15 to kong têa dế mơnhông tơ’mot kơxô̆ liăn FDI kân má môi lâp plâi tơnêi.

Tung pơla cheăng kâ tê mơdró lâp plâi tơnêi ôh tá tơniăn, tơdroăng mơdêk kố ôh ti xê cho ivá ăm tơdroăng mơnhông tung hơnăm 2025 mê ối ăm hlo troăng mơnhông rĕng dêi cheăng kâ tê mơdró Việt Nam.

*** Bro ăm tŭm mâu inâi kăn pơkuâ Đảng ƀă Tơnêi têa, pơtối ‘’ôh tá kơpong mơdât’’ tung pơxâu phâk kăn ƀô̆ pro xôi

Hơnăm 2024, tơdroăng bro ăm tŭm mơngế pêi cheăng râ xiâm dêi Đảng ƀă Tơnêi têa tơkŭm po ƀă tơdroăng môi tuăn hên, tơmiât troh pơkâ mơdêk châ tơƀrê hnê mơhno ƀă pơkuâ tơnêi têa, tơniăn tơdroăng mơnhông tơniăn. Hneăng hôp Khu pơkuâ xiâm tơnêi têa Đảng Kŏng san Việt Nam hneăng má XIII hiăng châ nhuô̆m, ƀă kơxô̆ phĭu ki tŭm tâi, rah xo Tô Lâm, Kăn cheăng tung Khu xiâm kal kí, Kăn xiâm hnê ngăn tơnêi têa to pro Kăn xiâm pơkuâ hnê ngăn Đảng. Kuô̆k hô̆i hneăng má XV hiăng rah xo pôa Trần Thanh Mẫn, Kăn xiâm hnê ngăn Kuô̆k hô̆i ƀă pôa Lương Cường, Kăn xiâm hnê ngăn tơnêi têa, rơtế amê cho bro tŭm mâu inâi kăn pơkuâ  a Kuô̆k hô̆i, Chin phuh ƀă mâu kơ koan hnê arak luât.

Tơdroăng mơjiâng, pơhlêh tung Đảng ƀă tơplâ mơdât kâ kơhveăm liăn ngân, tơdroăng ki ôh tá lĕm tro pơtối cho tơdroăng ki xiâm tung hơnăm 2024. Hên kăn ƀô̆ râ kăn xiâm dêi Đảng, Tơnêi têa hiăng tro pơxâu phâk, pơxâu ai xôi kân, ăm hlo troăng hơlâ “ôh tá ai kơpong mơdât, ôh tá ai kơpong pakong’’, mơhno tơdroăng khŏm mơ-eăm mơjiâng môi khu cheăng kal kí, krúa lĕm, krá tơniăn rơdêi.

*** Khía mot kân rôh má 3 pro tơ’nhiê tơmeăm, hlâ rong mơngế a peăng Kơnhŏng

Khía mơhot kân rôh má 3 (khía Yagi) cho khía mơhot têi má môi tung pơla 30 hơnăm hdrối a kơpong Biển Đông, plong mot peăng Kơnhŏng tơnêi têa pin hâi 7/9/2024 ƀă ivá dêi khía hrot râ 17, pro tơ’nhiê hngêi trăng, hlâ rong ‘na mơngế. Khía mơhot ƀă têa tâk đik klêi kơ’nâi khía mơhot kân hiăng pro ai kong mê kân, têa lân lu ƀă tơnêi tơhnah tơhnâp tung lâp lu, pro 323 ngế hlâ, 22 ngế hía ƀă 1.978 ngế tro rong, tro lŭp ‘na liăn ngân tiô riân lối 81.700 rơtal.

Chin phuh hiăng hnê mơhno, hbrâ ví ing hdrối, ing hơngế, teăm tơdrêng, kơhnâ hbrâ ví khía mơhot têa kân lân lu; pơkâ mâu tơdroăng pêi pro tŏng gum tơdrêng, rak vế ‘mâi pro mâu hngêi trăng vâ tơniăn tơdroăng rêh ối kuăn pơlê klêi kơ’nâi rôh kong mê khía mơhot. Tung rôh kong mê khía mơhot, tơdroăng “ngế pá gum ngế pá tâ” dêi hdroâng mơngế Việt Nam châ mơnhông rơdêi.

Mâu tơdroăng tŏng gum tơmeăm hiăng tơdjâk troh lâp tơnêi têa, teăm gum kuăn pơlê kơpong tro khía mơhot têa kân lân lu tơkâ luâ xơpá, tơniăn tơdroăng rêh ối.

*** Pêi pro châ tơƀrê hluâ pơkâ ‘na troăng klông ƀă on tơhrik ing mâu tơdroăng tơkêa bro ton xŏn

Hơnăm 2024, mâu tơdroăng tơkêa bro ton xŏn ‘na troăng klông ƀă on tơhrik hiăng ƀă dế mơjiâng tơdroăng mơnhông cheăng kâ, tơniăn on tơhrik krá tơniăn, mơnhên troăng tơmiât pêi la ngiâ ton xŏn ăm tơdroăng mơnhông krá tơniăn dêi tơnêi têa. Troh nôkố, lối 2.000 km troăng kân ăm phêp rơxế kơtâu têi tung hơnăm 2025. Tơdroăng tơkêa bro troăng kơxái 500kV măch 3 Quảng Trạch - Phố Nối hiăng phiu ro mơjiâng pro kêi đeăng.

A Hneăng hôp má 8, Kuô̆k hô̆i hneăng má XV ing pơkâ ‘na troăng hơlâ mơ’no liăn pro troăng kân ăm phêp rơxế kơtâu têi Peăng kơnhŏng – Peăng hdroh, kêi đeăng pơkâ xiâm a hơnăm 2035. Kuô̆k hô̆i xuân pơkâ vêh pêi pro tơdroăng tơkêa bro in tơhrik trếo tik nik Ninh Thuận, vâ tơniăn bê on tơhrik ƀă tơmiât pêi troh pơkâ mơ’no trếo ‘mêi lo pa kong ƀă 0 a hơnăm 2050.

Ƀă tơdroăng tơkêa bro tơraih tơƀai Long Thành, Kuô̆k hô̆i môi tuăn hneăng má 1 mơ’no liăn mơjiâng pro péa troăng kân ăm tơƀai xông kơneăng, chu hdrâp a peăng Kơnhŏng tơnêi têa ƀă môi hngêi ăm tơmối tơkôm to rơtế ƀă mâu kế tơmeăm ki tơ’nôm tơdâng tơ’mô ƀă ivá 25 rơtuh tơmối/hơnăm, 1,2 rơtuh tâ̆n tơmeăm khoăng/hơnăm.

*** Pơhlêh nếo túa tơmiât pro luât ƀă mâu tơdroăng pơkâ gum tơƀrê

Kuô̆k hô̆i hneăng 15 hiăng ‘măn chôu tơdroăng rơdêi tung hơnăm 2024 ƀă hên hĭn mâu tơdroăng pơkâ pơhlêh nếo túa ki vâ mơjiâng pro luât ƀă pơkâ tơleăng tơdroăng ki kal dêi tơnêi têa. Ƀă 2 hneăng hôp tiah hmâ ƀă 2 hneăng hôp kơdrâ tung hơnăm 2024, Kuô̆k hô̆i hneăng 15 séa ngăn ƀă pơkâ hên hĭn troăng tŏng gum ki kal tơdjâk troh tơdroăng cheăng mơjiâng pro luât, séa ngăn arak luât ƀă pơkâ mâu tơdroăng ki kal dêi tơnêi têa.

18 luât ƀă 21 tơdroăng pơkâ hiăng châ tơbleăng, tung mê, mâu tơdroăng pơkâ tơƀrê môi tiah ăm phêp Luât tơnêi tơníu, Luât Hngêi ối ƀă Luât Tê mơdró hngêi trăng tơnêi tíu châ xêt khât rĕng tâ 5 khế, ing lơ 1/8/2024. Mâu luât ‘mâi rơnêu ki kal môi tiah Luât ‘No liăn pêi cheăng, Luât ‘No liăn pêi cheăng tơdjuôm ƀă Luât Pơkâ châ tơbleăng vâ tŏng gum mâu tơdroăng ki pá ‘na troăng pơkâ, mơdêk xoăng râ ƀă pro tơ’lêi hlâu ivá mơjiâng pro tơmeăm.

Ƀă tơdroăng ki pơhlêh nếo, khât tah lôi túa tơmiât “ôh tá pơkuâ mê mơdât”, Kuô̆k hô̆i mơjiâng pro luât ăm mâu kơvâ cheăng ki nếo, mơhnhôk tơmiât rơkê plĕng ƀă mơnhông phuâng ‘na liăn ngân, pro ivá ăm mơnhông krá tơniăn dêi tơnêi têa tung chal nếo.

*** Lâp tơnêi têa tơdjuôm ivá kơdroh tah lôi hngêi pơtân, hngêi xi kơchoh

Hâi lơ 5/10/2024, Chin phuh ƀă Khu Kăn xiâm hnê ngăn Vi ƀan Măt trâ̆n Tơnêi têa Việt Nam hiăng tơkŭm po tơdroăng mơhnhôk pêi pro tŏng gum xut tah lôi hngêi pơtân, hngêi xi kơchoh tung lâp tơnêi têa ƀă dó inâi ‘’Hngêi hơtô ăm kuăn pơlê á’’.

Pôa Phạm Minh Chính, Ngế pro xiâm hnê ngăn tơnêi têa kơbông krếo ‘’Kơbố ai ki klâi veăng tơlo ki mê, kơbố ai toh chôu veăng pêi mê veăng pêi, kơbố ai tơmeăm veăng tơlo tơmeăm, kơbố ai hên veăng tơlo hên, kơbố ai iâ veăng tơlo iâ’’ ƀă pơkâ kêi đeăng tơdroăng kơdroh tah lôi 153.000 toăng hngêi pơtân, hngêi xi kơchoh tung lâp tơnêi têa hdrối hâi lơ 31/12/2025.

Ngế pro xiâm hnê ngăn Chin phuh pơkâ mâu Khu xiâm, kơvâ cheăng, Vi ƀan kuăn pơlê mâu kong pơlê, pơlê kong kơdrâm ối tung Tơnêi têa tơkŭm pơkuâ, hnê mơhno, mơnhông hnoăng ƀă hnoăng dêi ngế ối a ko tung tơdroăng mơdêk ki dâi lĕm, châ tơƀrê mâu kơxô̆ liăn vâ pêi pro tơdroăng tŏng gum hngêi ối ăm mơngế ai hnoăng ƀă kăch măng, rơpŏng kơtiê, rơpŏng vâ chê kơtiê, mơjiâng pơkâ pêi inhên vâ tơkŭm po, pêi pro châ tơƀrê, gum pêi pro ƀlêi trâng pơkâ pêi plah kơdroh tah hngêi pơtân, hngêi xi kơchoh tung lâp tơnêi têa.

*** Tơdroăng tê mơdró hngêi trăng tơnêi tíu ƀă mêa pơhlêh ó

Hơnăm 2024 cho môi hơnăm ki ai hên pơhlêh ƀă tơdroăng ki tê mơdró hngêi trăng tơnêi tơníu ƀă mêa a Việt Nam drêng tá péa kơvâ cheăng kố pơrá châ hlo ‘na yă to rơdêi ƀă pá vâ ‘nâi. Yă hngêi hiăng tâk kơnâ troh a kơlo ki ôh tá tro tâng pơchông ƀă tơdroăng pêi lo liăn dêi kuăn pơlê, pro ôh tá tơdâng pơla ki kơnía ôh tá tơniăn ƀă xơpá vâ mơdât.

Kơchơ tê mơdró mêa xuân tâk kơnâ rơdêi, tơkâ luâ hơngế kơlo yă tơdâng dêi mâu hơnăm hdrối ai pơreăng kân pơreăng COVID-19. Mâu tơdroăng pơhlêh ki tối a kơpêng pâ thế kal ai troăng mơdât tơƀrê, tơmiât troh tơdroăng ki kơdroh iâ tơmiât ôh tá tro, mơhnhôk ‘no liăn cheăng ton hơnăm ƀă rak vế kơchơ tê mơdró mơnhông tơniăn lĕm ƀă ki pơxúa dêi kuăn pơlê ƀă tơdroăng cheăng kâ tê mơdró.