A Rôh hôp, teăng mâ mâu khu xiâm, kơvâ cheăng hiăng tơpui tơno ‘na tơdroăng mơnhông mơdêk cheăng kâ rêh ối pơlê pơla, tơdroăng tơbleăng mâu tơdroăng cheăng pêi dêi Hô̆i đong pơkâ kơpong Tây Nguyên hơnăm 2024 ƀă tiô tối tơdroăng cheăng hơnăm 2025. Tơdrêng amê hlối pơkâ thế ‘na túa tơmiât, troăng hơlâ ki pơkâ pêi ki kal ƀă hnoăng cheăng pêi ki nhên kal pơcháu ăm mâu khu xiâm, kơvâ cheăng ƀă kong pơlê kơpong Tây Nguyên vâ tơkŭm tơrŭm mơnhông kơpong ƀă tơƀrê khât má môi.

Tung mê, tối nhên mâu tơdroăng ‘na mơjiâng pro on tơhrik ki ‘mâi pro, túa pơkâ ‘no liăn pro troăng prôk tơdjêp kơpong, túa pơkâ chiâ xo tơmeăm khoăng tung kơdâm tơnêi. Pôa Nguyễn Hòa Bình, Ngế pro xiâm phŏ hnê ngăn Chin phuh pơkâ thế mâu ngế cheăng tung Hô̆i đong pơkâ kơpong Tây Nguyên, mâu khu xiâm, kơvâ cheăng ki ai tơdjâk troh, mâu kong pơlê tung kơpong pơtối kơhnâ, hbrâ rơnáu tâ nếo tung tơbleăng mâu hnoăng cheăng, troăng hơlâ pêi pro hiăng châ pơkâ mơ’no, malối cho mơdêk mâu tơdroăng tơkêa pro troăng prôk dế ối hrá; hnê mơhno pêi pro tơƀrê hnoăng cheăng tơbleăng cheăng kâ rêh ối pơlê pơla tro ƀă rak vế gâk kring, tơdroăng cheăng lêng kơpong Tây Nguyên.