Kơ’nâi 1 hơnăm pêi pro tơdroăng Pơkâ dêi khu xiâm kal kí ‘na kơpong ƀă tơdroăng cheăng dêi Hô̆i đong xing xoăng cheăng kơpong Tây Nguyên, Hô̆i đong kơpong hiăng pêi hên tơdroăng, pơkâ troăng hơlâ, luât mơnhông dêi kơpong Tây Nguyên. Vâ tối GRDP riân rêm ngế châ 78,5 rơtuh liăn/ngế, tâk 16% tâng vâ pơchông ƀă hơnăm 2023. A rôh hôp mâu kăn mâu kong pơlê kơpong Tây Nguyên hiăng ‘no hên hnoăng veăng hnê tối vâ mơnhông  kơpong Tây Nguyên tung la ngiâ.

Tối mơgêi hâi pêi cheăng, pôa Nguyễn Hòa Bình tối nhên, 6 tơdroăng tơkêa bro mâu tíu pêi cheăng dế tơbleăng pêi vâ tơdjêp kơpong Tây Nguyên ƀă mâu kơpong ki kal. Laga nôkố nếo ai tơdroăng tơkêa bro troăng Dak Lak - Nha Trang dế pêi tơniăn, ki u ối 5 tơdroăng tơkêa bro  dế pêi hrá, ai tơdroăng tơkêa pro troăng kân tơdrăng nếo xo liăn ngân 8% vâ pêi. Ngế pro xiâm phŏ hnê ngăn tơnêi têa pơkâ thế mâu kong pơlê tơrŭm ƀă mâu khu râ kơvâ cheăng vâ tăng troăng tah xơpá, mơdêk pêi rĕng klêi, pơtối rak tơmeăm khoăng ai hlâu dêi kơpong Tây Nguyên.