1.Hên pơkâ ki kal tơdế hneăng hôp má XIII dêi Đảng

A hneăng hôp roh má 7, rơtế ƀă tơdroăng mơnhên tâi tâng, ôh tá tơdjâk pakong mâu tơdroăng châ tơƀrê, Khu xiâm pơkuâ tơnêi têa hiăng xo vế 5 tơdroăng hriâm ki rơkê tơtro; pơkâ 5 hnoăng cheăng ki xiâm tung tơdế mơ’nui dêi hneăng má XIII; xo phĭu ki loi tơngah mâu Kăn cheăng tung Khu xiâm kal kí ƀă Khu pơkuâ hnê ngăn cheăng Đảng. A hneăng hôp roh má 8, Khu xiâm pơkuâ tơnêi têa hiăng tơbleăng 4 Pơkâ ki kal; séa ngăn, tơpui pơkâ pêi Khu xiâm pơkuâ tơnêi têa Hneăng hơnăm 2026 – 2031. Hneăng hôp Tơnêi têa ki kal tung hơnăm pêi pro Pơkâ Hneăng hôp má XIII mơnhên tơdroăng pơkuâ, hnê mơhno krá tơniăn, tơmiât pêi rơkê dêi Khu xiâm pơkuâ Tơnêi têa, Khu xiâm kal kí, Khu xiâm pơkuâ hnê ngăn Đảng ƀă mâu khu râ kăn pơkuâ cheăng Đảng, khu cheăng Đảng tung tơdroăng po rơdâ pêi pro Pơkâ Hneăng hôp má XIII dêi Đảng, tơleăng teăm tơdrêng, châ tơƀrê hên tơdroăng nếo tung tơdroăng nôkố tá khu cheăng kal kí khŏm mơ-eăm pêi kêi đeăng, châ ƀlêi trâng mâu pơkâ mơnhông ki Hneăng hôp má XIII dêi Đảng hiăng pơkâ mơ’no.

2.Tơdroăng tơpui kâ tối nhên tíu ối ƀă tơdroăng tơngah dêi Việt Nam

Mâu rôh pôu râ tơnêi têa troh Việt Nam dêi Kăn xiâm pơkuâ hnê ngăn Đảng, Kăn xiâm hnê ngăn tơnêi têa Kŏng hoa Nhân yân Trung Hoa Tập Cận Bình, Kăn xiâm pơkuâ kong têa Mih Joe Biden ƀă hên mâu kăn xiâm pơkuâ mâu kong têa; mâu rôh lăm pôu păng ‘nâng dêi Kăn xiâm pơkuâ hnê ngăn Đảng, Tơnêi têa Việt Nam troh a hên kong têa pro chiâng mâu tơdroăng ki kal dêi tơpui kâ Việt Nam. Hơnăm 2023, Việt Nam ƀă Sinuâ môi tuăn mơjiâng “Kong têa veăng kum tung la ngiâ Việt Nam – Sinuâ”; mơdêk tơrŭm cheăng tâk troh a kong têa tơrŭm cheăng tung la ngiâ tŭm têk” ƀă Mih prế Nhuk, mơdêk tơrŭm cheăng tung la ngiâ tŭm têk, kong têa tơrŭm cheăng tung la ngiâ ƀă kong kong têa tơrŭm tŭm têk ƀă 30 to kong têa, tung ê ai 5 to kong têa ối tung Hô̆i đong Kring vế Khu lâp kong têa. Kơxop hlá mơéa “Mơjiâng ƀă mơnhông tơdroăng cheăng tơpui kâ Việt Nam tŭm têk, rơkê tiô chal nôkố, cho môi tiah khôi túa “kơlá Việt Nam” dêi Kăn xiâm pơkuâ hnê ngăn Đảng Nguyễn Phú Trọng mơhno mâ, cho tơdroăng ki kal ‘na lĭ luâ̆n ƀă ki ai khât, mơhno hiâm mơno hdrối, kơ’nâi xuân môi tiah môi dêi Đảng ‘na troăng tơpui kâ dêi Việt Nam. Ƀlêi chiâng dêi cheăng tơpui kâ hơnăm 2023 hiăng pro hơ’lêh troăng tơpui kâ Hneăng hôp 13 dêi Đảng, veăng kum bro chiâng tơdroăng rak vế hơniâp lĕm, tơniăn vâ mơnhông, mơdêk tíu cheăng ƀă tơdroăng tơngah dêi tơnêi têa.

3.Pêi kêi đeăng troăng pơkuâ hnoăng chiâng pêi cheăng; mơdêk hbrâ, mơdât kâ kơhveăm liăn ngân

Hơnăm 2023, Khu xiâm kal kí tơbleăng hên pơkâ ‘na pơkuâ hnoăng chiâng pêi cheăng, hbrâ mơdât kâ kơhveăm liăn ngân, tơdroăng ki ôh tá tro tung tơdroăng pêi cheăng kăn ƀô̆; séa ngăn, xăm tối, tơleăng, pêi pro tơleăng tơdroăng xôi; séa ngăn, pêi pro pơxâu phak ki Đảng hiăng pơkâ ƀă tơdroăng séa ngăn, riân mơnhên. Mâu pơkâ kố kum thăm pơkuâ krá tơniăn hnoăng chiâng pêi cheăng dêi kăn ƀô̆, đảng viên, ki rơhêng vâ tối cho ngế ối a ko. Kơxop mơ-éa chêh “Khŏm pêi kơtăng, khŏm mơ-eăm tơplâ mơdât kâ kơhveăm liăn ngân, tơdroăng ki ôh tá lĕm tro, kum mơjiâng Đảng ƀă Tơnêi têa pin rế hía rế krúa lĕm, ó rơdêi” dêi Kăn xiâm pơkuâ hnê ngăn Đảng mơhno, veăng kum pro mơnhên troăng tơmiât lĭ luâ̆n dêi Đảng pin ‘na tơdroăng hbrâ, mơdât kâ kơhveăm liăn ngân, mâu tơdroăng ki ki ôh tá lĕm tro ƀă mơjiâng, pơ’lêh rơnêu Đảng. Tơdroăng pơtối séa ngăn po rơdâ hneăng má 2 roh tơdroăng tơdjâk Kŏng ti Việt Á, roh tơdroăng xôi a Kơ koan xiâm pơkuâ (Khu xiâm tơpui kâ); mâu roh tơdroăng xôi a Grup pơkuâ FLC, Tân Hoàng Minh, Hệ sinh thái Kŏng ti AIC; roh tơdroăng xôi a Hngêi arak liăn SCB, Grup pơkuâ Vạn Thịnh Phát, Kŏng ti An Đông... pơxâu phâk hên ngế xôi cho kăn ƀô̆ râ xiâm, tá mâu ngế dế ối pêi cheăng ƀă hiăng pơtê cheăng tiô hiâm mơno ‘’ôh tá ai kơpong mơdât, ngế ki lâi xuân pơxâu phâk tâng pro xôi, mơhé mê cho kơbố” kum thăm pro loi tơngah dêi kăn ƀô̆, đảng viên ƀă Kuăn pơlê ƀă Đảng, Tơnêi têa.

4.Cheăng kâ Việt Nam mơnhông tơniăn tung môi plâi tơnêi ki ôh tá tơniăn

Hơnăm 2023, mâu tơdroăng pơkâ kân dêi cheăng kâ hiăng pêi châ, cheăng kâ kân hlo tơniăn, tiô tối hdrối mơdêk GDP tiô riân châ lối 5%, mâu tơdroăng bro tơdâng tơ’mô châ rak vế. Hên hĭn troăng hơlâ ki kal, liăn ngân ối a kơlo ki hên sap nah troh nôkố châ tơbleăng tơdâng, kơtăng vâ tŏng kum ‘mâi mơnhông, mơdêk cheăng kâ rêh ối pơlê pơla; pêi klêi mâu troăng hơlâ tŏng kum, troăng hơlâ vâ hơ’lêh tơdroăng ki ‘no liăn cheăng, tê mơdró, pro tơniăn liăn rơtal yă, yă tê mâu kế tơmeăm khoăng ƀă tŏng kum xơpá ăm kơchơ tê mơdró liăn ngân, tơnêi, mơjiâng bro tơmeăm, tê mơdró hngêi trăng tơnêi tơníu. Maluâ ôh tá châ tiô pơkâ mơ’no, la kố xuân cho ivá ki kal châ tơmâng xo tung pơla cheăng kâ Việt Nam tro tơdjâk hên ing tơdroăng ki prôk tơrôu”.

Ảnh: 4

5.Mơnhông tung mơjiâng hngêi trăng, troăng klông – mơjiâng tơdroăng tơtêk

Hơnăm 2023, Việt Nam hiăng mơ-eăm tah lôi pá puât ‘na troăng pơkâ pêi, troăng hơlâ, mơjiâng tơdroăng ki mơnhông ‘na mâu kế tơmeăm hngêi trăng troăng klông ki kal môi tiah pơxiâm mơjiâng pro tơdroăng tơkêa bro hngêi tơkôm vâ tăng troăng tơƀai hdrâp chu Long Thành; pêi kêi đeăng 730 km troăng ăm phêp rơxế kơtâu têi, mơdêk ki xŏn troăng ăm phêp rơxế kơtâu têi lâp tơnêi têa nôkố tâk vâ chê 1.900 km; nôkố dế mơjiâng pro vâ chê 1.700 km troăng kân ăm phêp rơxế kơtâu têi Bắc Nam, Đông Tây. Rơtế amê cho hên mâu hngêi trăng troăng klông ki ê ƀă tâi tâng kơxô̆ liăn mơ’no lối 94.000 rơtal liăn, kum tah lôi mâu tíu ki kreăng troăng klông, chôa ‘lâng kêi đeăng tơdjêp kơpong, mơjiâng tơdroăng vâ tơtêk mơnhông cheăng kâ – rêh ối pơlê pơla. Ƀă tơdroăng hnê mơhno kơtăng dêi Chin phuh, mâu Khu xiâm, kơvâ cheăng, mâu kong pơlê hiăng ai pơ’lêh kân tung tơmiât, ai troăng pêi rơkê, kơdroh pro mơ-éa ƀă khu ki ối tung dế, mơdêk hiâm mơno pôu râng hnoăng cheăng, tơniăn tơdroăng pro mâu kế tơmeăm khoăng, troăng klông.

6.-80 hơnăm Đề cương ‘na túa lĕm tro Việt Nam

Đề cương ‘na túa lĕm tro Việt Nam, ƀă pái tơdroăng pơkâ túa lĕm tro kăch măng Việt Nam: hdroâng mơngế, khoa hok ƀă kuăn pơlê, luâ 80 hơnăm ing rôh ki ai mâ, xuân ối bâ eăng mâu tơdroăng ki kơnía xiâm dêi môi hlá mơ-éa tơxâng cương lĩnh, xuân ối tiah mê ki kơnía ‘na lĭ luâ̆n ƀă tơdroăng ki chal nôkố, pơtối séa troăng ăm rôh mơjiâng ƀă rak vế Tơnêi têa. Tơdroăng cheăng tơbâ 80 hơnăm ai mâ hlá mơéa Đề cương ‘na túa lĕm tro Việt Nam hiăng pơtroh hên tơdroăng pơxúa, vâ pơtối mơdêk ki kơnía ton nah, ki kơnía tung tơdroăng ki ai khât dêi hlá mơ-éa Đề cương, vâ túa lĕm tro chiâng hên ivá hiâm mơno, ivá rơdêi tơdroăng rêh, ivá mơnhông tơnêi têa ƀă rak vế Tơnêi têa môi tiah tơdroăng Pơkâ Hneăng hôp 13 dêi Đảng.

7.Hên roh on chếo, kế pơtôu pro tơdjâk râ ó

Vâ chê 2.000 roh on chếo kế pơtôu, vâ chê 150 ngế hlâ, tro lup kế tơmeăm hên ó tung hơnăm 2023, tung mê râ ó cho roh chếo hngêi ối tơdjuôm kŭn a hâi lơ 12 khế 9 a pơlê krâm Thanh Xuân, pơlê kong kân Hà Nội, pro 56 ngế hlâ ƀă 37 ngế tro rong. Mâu kơxô̆ kố pro xâu ‘nâng tơdroăng chếo pơtôu tung tơdroăng hbrâ mơdât on chếo, tung mê, ai tơdroăng pro pơhôi pơkuâ lôi ai tơdroăng mơjiâng hên tơmeăm ôh tá tro luât, ôh tá tơniăn ‘na hbrâ mơdât on chếo; tơdroăng séa ngăn tá hâi tơkăng chiâng pro xôi ton xŏn; hlê plĕng tơniăn, hbrâ mơdât on chếo dêi kuăn pơlê tá hâi kơtăng... pơkâ thế kal ‘mâi rơnêu, pơhlêh kơtăng.

8.Tơdroăng ôh ti ai tŭm pơkeăng, tơmeăm xúa tung khăm pơlât tá hâi châ tŏng kum khât

Maluâ Kuô̆k hô̆i, Chin phuh ƀă Khu xiâm ngăn pơkeăng ƀă khăm pơlât hiăng pơkâ hên mơ-éa vâ “kum xơpá” ăm kơvâ ngăn pơkeăng, la tơdroăng ki ôh ti ai tŭm pơkeăng, kế tơmeăm xúa tung khăm pơlât a mâu hngêi pơkeăng ing tơnêi têa troh kong pơlê xuân tá hâi châ tŏng kum khât. Xiâm kối cho xua tơdjâk ing pơreăng kân COVID-19, xua hlá mơ-éa luât ối ôh tá tơniăn; tơdroăng ki pêi pro tê tơbriât roê, malối cho tơbriât tê tơkŭm ối tơvâ, malối cho ối ai hiâm mơno kơxiâp, xâu ôh ti tro a hên ngế krê, tíu pêi cheăng, kong pơlê ƀă hên tíu ki ê. ‘Na ki ton xŏn pâ thế kal ai mâu troăng hơlâ pơkâ rơdêi tâ vâ pơkâ tơleăng klêi hlối tơdroăng kố.

9.Pơkâ hâi khế ‘mâi pơhlêh troăng hơlâ kâ liăn khế

Tơdroăng pêi pro pơ’lêh tâi tâng troăng hơlâ kâ liăn khế tiô a tíu pêi cheăng, tơniăn ôh tá iâ tâ liăn khế ki dế châ kâ nôkố kô châ pêi pro sap ing hâi lơ 1/7/2024. Pơkâ xiâm apoăng dêi troăng hơlâ kố cho vâ liăn khế thế cho tíu ki pêi lo liăn xiâm tơniăn tơdroăng rêh ối mơngế pêi cheăng ƀă rơpŏng; mơhá tro vâ mơ’no ăm mơjiâng mơngế pêi cheăng, mơjiâng ivá mơdêk tung pêi cheăng ƀă châ tơƀrê pêi cheăng, kum kal khât pêi pro tơdroăng rơkê nôkố ƀă tơdâng pơlê pơla, rak tơniăn cheăng kal kí – rêh ối pơlê pơla, mơdêk tơdroăng ki tơtêk ƀă mơnhông mơdêk krá tơniăn.

10.Tơniăn mâu môn tơ’noăng mơgêi râ má pái Trung hok phôh thong ing hơnăm 2025

Hneăng tơ’noăng mơgêi râ má pái Trung hok phôh thong ing hơnăm 2025 kô châ tơkŭm po ƀă 4 môn, mê cho 2 môn ki pơklât cho Toán, Ngữ văn ƀă 2 môn ki tơná rah xo tung mâu môn hriâm a lâm 12. Túa pơkâ kố cho kơdroh ki pá ‘na tơ’noăng ƀă séa ngăn hiâm mơno hơ’lêh nếo dêi tơdroăng hnê hriâm phôh thong, mơnhên tối tơdrăng ivá, tung pơla hriâm tâp dêi hok tro môi túa ki khât, kum hok tro mơdêk ivá tơná hâk vâ tro ƀă troăng pơkâ cheăng pêi a râ Trung hok phôh thong. Châ pêi pro sap ing hơnăm 2025, túa pơkâ kố châ xo tơdroăng ki môi tuăn khât dêi hên hok tro, nôu pâ ƀă thái cô.