VOV4.Xơ Đăng - Hâi kố, lơ 8/7, hok tro tơ’noăng tung lâp tơnêi têa mot tung hâi tơ’noăng má 2, xuân cho hâi tơ’noăng má mơ’nui dêi hneăng tơ’noăng râ má pái phôh thong hơnăm 2022. Kơxo, mâu hok tro tơ’noăng ƀai tơ’noăng tổ hợp Khoa học tự nhiên, lơ Khoa học xã hội, kơxê hok tro tơ’noăng Ngoại ngữ. Mâu ƀai tơ’noăng kố pơrá tiô tơdroăng ki tơ’noăng trắc nghiệm.

Tiô tối tơbleăng rĕng dêi Khu xiâm ngăn hnê hriâm ƀă hnê mơjiâng tuăn ngoâ rơkê, tung hâi tơ’noăng apoăng ƀă 2 môn tơ’noăng Ngữ văn prếi Toán, kơxô̆ hok tro troh tơ’noăng pơrá châ lối 99%. Kơxô̆ hok tro ối tung F0 ai 79 ngế dêi 20 Hô̆i đong tơ’noăng. Tung mê, ai 18 ngế hok troh tơ’noăng, 61 ngế hok tro ôh tá troh tơ’noăng. Laga tiah mê, hiăng ai 22 ngế hok tro pro xôi túa pơkâ tro thâ pơtê tơ’noăng, tung mê ai 5 ngế hok tro djâ tơvế ƀă ngăn hlá mơ-éa tung lâm tơ’noăng, 17 ngế djâ phôn râng kŏng mot tung lâm tơ’noăng. Ôh tá ai kăn ƀô̆ ki lâi pro xôi túa pơkâ.

Katarina Nga tơplôu ƀă tơbleăng