VOV4.Xơ Đăng - Hâi lơ 7/6, kơ koan kăn sát séa ngăn, cheăng tung Khu xiâm kŏng an hiăng pơkâ kô săm phoăng, tơleăng pơxâu, rup phâk pôa Nguyễn Thanh Long, ngế xiâm ngăn ‘na pơkeăng ƀă khăm pơkât,  pôa Chu Ngọc Anh,  kăn  hnê ngăn Vi ƀan pơklê kong kân Hà Nội, pôa Phạm Công Tạc, Ngế xiâm phŏ ngăn ‘na khoa hok ƀă kơmăi kơmok vâ séa ngăn mâu tơdroăng ki mâu ki mê pro xôi troh tơdjâk ‘na Kŏng ti Việt Á mơdêk hmâng vâ yă kit mơnhên pơreăng COVID-19.

Hdrối mê, kơxo lơ 7/6, Kuô̆k hô̆i hiăng têk kŏng vâ tơbleăng pơkâ dêi Kuô̆k hô̆i ‘na tơdroăng mơ’no mâu kăn Kuô̆k hô̆i hneăng 15 ƀă pôa Nguyễn Thanh Long, khu kăn Kuô̆k hô̆i kong pơlê Vĩnh Long ƀă tơbleăng pơkâ dêi Kuô̆k hô̆i kĭ pâ thế Ngế pro xiâm hnê ngăn Chin phuh ‘na tơdroăng mơ’no ƀă Ngế xiâm ngăn pơkeăng ƀă khăm pơlât hneăng pêi cheăng 2021-2026.

Hô̆i đong hnê ngăn pơlê kong kân Hà Nội hneăng 16 hiăng tơbleăng pơkâ vâ mơ’no kăn hnê ngăn Vi ƀan pơlê kong kân Hà Nội hneăng 16, hneăng hơnăm 2021-2026 ƀă pôa Chu Ngọc Anh. Hlo tơdroăng mê, hên mâu kăn Kuô̆k hô̆i tối tiah kố, mê cho tơdroăng vâ tối thế mơnhên ‘na tuăn mơno dêi kăn ƀô̆ ƀă môi hdroh nếo pơtâng tối, tơdroăn cheăng plâ mơdât khu ngế kâ kơluâ, tơdroăng tơplâ ƀă khu ngế pro xôi “ôh tá ai kơpong mơdât, ôh tá ai tơdroăng ki ê, mơhé vâ mơngế ki mê cho kơbố xuân athế rup tơleăng tâng lơ hiăng ai xôi’’.

   Gương tơplôu ƀă tơbleăng