Hâi 18/4/1976, mâu đô̆i viên apoăng dêi trăm Gia Lai apoăng ai mâ a Nam Ban. Pơtối mê, mâu khu droh rơtăm lo ing Từ Liêm, Đông Anh, Tranh Trì, Ba Đình, Đống Đa ƀă hên cheăm bêng ki ê dêi Hà Nội hiăng troh akố. Bu tung pơla lối 2 hơnăm, lối 2.600 ngế droh rơtăm apoăng hiăng ko muih, po pông lối 1.900 ha tơnêi, po lối hrĭng km troăng prôk, rơtế ƀă mâu kuăn pơlê hdrông kuăn ngo a cheăm kố pro hngêi, pêi chiâk deăng, mơjiâng pro mâu pơlê cheăm nếo.

Tơkâ luâ 50 hơnăm mơjiâng ƀă mơnhông, kơpong cheăng kâ nếo Hà Nội a Lâm Đồng hiăng mơjiâng mâu kơpong pêt kơphế, pêt loăng yâu păn hdrong, pêi chiâk deăng xúa kơmăi kơmok chal nếo; pro hngêi trăng, troăng prôk, hngêi trung hriâm, hngêi pơkeăng cheăm, tơdroăng rêh ối kuăn pơlê rế hía rế pơhlêh. Inâi khĕn Lâm Hà, tơrŭm pơla ing Lâm Đồng ƀă Hà Nội drêng tơring châ mơjiâng a hơnăm 1987, chiâng tơdroăng ki tơrŭm pơla 2 cheăm bêng. Tơpui a leh tơbâ, pôa Hồ Văn Mơpfi, Ngế cheăng tung xiâm Đảng, Kăn hnê ngăn Vi ƀan kong pơlê Lâm Đồng, tối nhên ki tơƀrê tung 50 hơnăm cho tơdroăng tơrŭm ing ivá, tơdroăng ki pleăng ƀă hiâm mơno tơrŭm dêi hên rơxông.

“Hvái ngăn tung pơla 50 hơnăm, pin ai tíu vâ tối rơdêi mê ôh tá xê tung pơla rôh ko muih, po pông môi kơpong tơnêi, mê ối cho rôh vâ pơhlêh tơdroăng rêh ối, pro chiâng tơdroăng loi ƀă tơbêng mâu tơdroăng tung la ngiâ ăm hên rơxông. Tơdroăng tơƀrê mê ôh tá xê vê ƀă mâu tơdroăng ki pêi pro, troăng prôk, lơ mâu kơpong pêt nếo ối ai tung mâu rơpŏng hngêi ki krá rơdêi, mâu lâm hriâm ai kơdrâm ngế hriâm, rêm rơpŏng hngêi hiăng pơrá ai tơdroăng rêh ối tơniăn lĕm tâ”.

Tơbâ 50 hơnăm kơpong cheăng kâ nếo Hà Nội a tơnêi Lâm Đồng, hên tơdroăng cheăng túa lĕm tro, tơ’noăng ivá hiăng châ tơkŭm po. Akố, tơkŭm hên tơdroăng ton nah, mơđah tơbleăng mâu kế tơmeăm ki kal ƀă tơbleăng mâu tơmeăm OCOP châ tơkŭm po a kơpong Lâm Hà, vê mơhno rôh ki mơjiâng kơpong cheăng kâ nếo ƀă tơdroăng ki tơrŭm pơla túa lĕm tro dêi 2 cheăm bêng.

Rôh kố, kong pơlê Lâm Đồng ƀă pơlê kong kân Hà Nội hiăng kĭ tơkêa hlá mơ-éa chôu vế tơrŭm cheăng tŭm têk. Vi ƀan Măt trâ̆n Tơnêi têa Việt Nam pơlê kong kân Hà Nội diâp tơmeăm tŏng gum lối 1,3 rơtal liăn pro 22 toăng hngêi tơrŭm ăm mâu rơpŏng xơpá. Kong pơlê ối khĕn kơdeăn rêm râ, ngế krê ƀă rơpŏng ai hên ivá veăng gum tung mơjiâng, mơnhông kơpong cheăng kâ nếo.

Tơdế chal hdrối, mâu ngế kuăn Hà Nội djâ vế ivá hơnăm ối nếo ƀă tơdroăng púi rơhêng vâ troh a kong ngo Lâm Đồng ko muih, po pông tơnêi pêi cheăng. Hâi kố, mâu rơxông pơtối dế mơdêk tơdroăng tơƀrê ƀă tơdroăng rơkê, kong ngê̆ ƀă hiâm mơno pơhlêh nếo.