Sap ing hâi lơ 1/11/2025 troh nôkố, khu ki ai tơdjâk troh kong pơlê Gia Lai hiăng lăm ngăn, tăng rôu a 37 kơpong tung tơnêi têa ƀă 4 kơpong a kong têa ê, tơkŭm châ 85 to kơxêng kiâ mố đô̆i. Kong pơlê xuân hiăng tơdah xo 3.100 kơxêng, xâk mâu nhŏng o vâi; lăm ngăn, rôu xo kơxêng, xâk dêi lối 12.000 to kơxêng kiâ mố đô̆i a mâu ilâng, xo 7.800 túa ki ai tŭm tơdroăng vâ séa ngăn ADN.

Đăi tă Võ Tấn Tài – Kăn pơkuâ Đảng lêng Khu pơkuâ mố đô̆i kong pơlê, Phŏ pơkuâ Khu hnê mơhno 515 kong pơlê Gia Lai mơnhên tối, tơrŭm pơla khu lêng ƀă kăn pơkuâ rêm râ tung kong pơlê hiăng veăng gum pêi pro klêi hnoăng cheăng dêi Hneăng má 1. Mot tung hneăng má 2 tơdroăng cheăng pêi thâ 500 hâi măng tăng rôu, tơkŭm ƀă mơnhên inâi kơxêng kiâ mố đô̆i, mâu khu lêng pơtối mơ-eăm:

“Tung la ngiâ ah, Khu pơkuâ hnê mơhno pơtối tí tăng ‘nâi plĕng đi đo, Khu pơkuâ cheăng Đảng kong pơlê hnê mơhno mâu khu râ, kơvâ cheăng ai tơdroăng tơrŭm, veăng gum kơtăng ƀă krâ hnoăng cheăng pôu râng 6 nhên ƀă mâu khu râ kơvâ cheăng, ƀă rêm to cheăm, bêng mê athế pêi pro kơtăng tâ nếo, malối cho mơdêk hnoăng dêi Kuăn pơlê xuân môi tiah mâu tơdroăng ki rơkê plĕng ki mâu ngế ki ‘nâi, hlo hiăng tăng rôu, mơnhên inâi kơxêng kiâ mố đô̆i ƀă tơkŭm nôkố vâ pro tiah lâi pin pro chiâng tơdroăng ki ôh tá kâi piu ƀă pêi châ tơdroăng pơcháu ki Khu pơkuâ hnê mơhno tơnêi têa pơcháu ăm kong pơlê Gia Lai”.

Mot tung hơnăm 2027, Khu hnê mơhno 515 kong pơlê Gia Lai kô tơkŭm tâi ivá ăm hneăng má 2 ƀă mâu tơdroăng pơkâ pêi ki kal: pêi klêi tâi tâng tơdroăng pơkâ tăng tơkŭm, chêh ‘mot mâu tơdroăng ki kal dêi tâi tâng mâu mố đô̆i ki tá hâi ‘nâi nhên inâi ƀă xo túa vâ séa ngăn ADN dêi nhŏng o vâi peăng nôu vâ séa mơnhên ngăn tung Tơdroăng kal dêi tơnêi têa. Tơbleăng tơdrêng hnoăng cheăng ki xiâm, Thươ̆ng tă Hoàng Viết Ngọc – Chính trị viên Đô̆i K52 tối ivá khŏm mơ-eăm pêi pro:

“Hneăng má mơ’nui dêi tơdroăng ngin kô thăm mơdêk rĕng pêi pro hnoăng cheăng tí tăng tá tung tơnêi têa ƀă a kong têa ê. Ngin pơkâ pêi kơtăng ăm tâi tâng mâu kăn ƀô̆, mố đô̆i mơdêk hiâm mơno pôu râng, mơnhên nhên hnoăng cheăng, ôh tá xâu hâi măng, khŏm mơ-eăm tơkâ luâ mâu xơpá vâ pêi klêi mâu hnoăng cheăng châ pơcháu”.

Rôh kố, 14 to kơxêng kiâ mố ƀă 32 ngế krê ai hnoăng cheăng pêi cheăng rơkê tung cheăng tăng tơkŭm, ƀă mơnhên inâi kơxêng kiâ mố đô̆i châ xo ƀâng khên kơdeăn dêi Kăn hnê ngăn tơnêi têa Vi ƀan kong pơlê Gia Lai.