A thôn 12, cheăm Bảo Lâm 1, hên rơpŏng kuăn pơlê hiăng hbrâ tah lôi kơnâng, tơmeăm khoăng peăng ngiâ hngêi vâ pơcháu tơnêi pro troăng prôk. Ai mâu rơpŏng athế tah lôi tơmeăm khoăng a tơnêi ki kân rơdâ, la drêng châ khu kăn pơkuâ mơhnhôk, tơpui tối 'na ki pơxúa ton xŏn, vâi krâ nhŏng o hiăng môi tuăn, pro tơ'lêi hlâu ăm khu ki mơjiâng pro vâ pêi pro. Hlo tơdroăng ki môi tuăn dêi vâi krâ nhŏng o, pôa Võ Chí Nhân, Kăn pơkuâ thôn 12, cheăm Bảo Lâm 1, phiu ro:

“Kuăn pơlê vâ môi tuăn ƀă phiu ro drêng châ tơdroăng pơkâ pro troăng kố. Kuăn pơlê nôkố ki hên cho hiăng tah lôi tơmeăm tung tơnêi vâ ăm khu ki mơjiâng pro tơdroăng tơkêa kố. Ngin pói tơngah klêi kơ'nâi troăng prôk klêi kô tơ'lêi hlâu tung tơdroăng prôk lăm dêi kuăn pơlê, hriâm tâp dêi mâu vâi muăn cháu.”

Ing môi tuăn tung môi tơdroăng tơkêa bro troăng prôk ăm hlo, drêng khu kăn pơkuâ hbrâ troh ƀă kuăn pơlê, tối nhên hnoăng ki pơxúa ƀă hnoăng cheăng pêi, mâu tơdroăng tơvâ tơvân ai tơ'nôm tơdroăng ki tơ'lêi hlâu. Troăng pêi mê xuân dế châ hên cheăm bêng a kong pơlê Lâm Đồng xúa tung tơleăng, tŏng gum mâu tơdroăng ki u ối tơdjâk tơdrêng troh tơdroăng rêh ối kuăn pơlê.

A cheăm Bảo Lâm 3, tơnêi tơníu cho môi tung mâu kơvâ cheăng ki ai hên rơkong pâ thế. Tung rôh trâm mâ kuăn pơlê 'na chuyên đê má mơ'nui khế 9, kuăn pơlê tối mâu tơdroăng ki ối tơvâ tơvân 'na ‘noăng chư chêh hlá mơ-éa tơnêi tơníu, pro hlá mơ-éa mơnhên xúa tơnêi, klâ xoăng ƀă yă chêl thiê̆n. Hlo tơdroăng ki ai khât kố, khu kăn pơkuâ cheăm tơkŭm klâ xoăng mâu tơdroăng, mơnhên hnoăng cheăng pêi, tơmiât troh kơdroh pá puât ƀă kơdroh hâi khế pêi pro. 'Na troăng hơlâ pêi pro mâu tơdroăng ki ối tơvâ kố, pôa Vũ Minh Đoàn, Kăn phŏ hnê ngăn Vi ƀan cheăm Bảo Lâm 3 tối nhên:

“Ngin dế tơkŭm tơleăng mơnhên mâu tơdroăng ki u ối, malối cho tơdroăng pro hlá mơ-éa 'na tơnêi tơníu. Mâu tơdroăng ki ton nah tá hâi châ tơleăng mơnhên dế châ séa ngăn, tơleăng mơnhên klêi, vâ pro tơ'lêi hlâu má môi ăm kuăn pơlê drêng pêi pro túa pơkâ khu kăn pơkuâ kong pơlê 2 râ.’’

Ôh tá xê to mâu tơdroăng pro hlá mơ-éa, mâu tơdroăng tơkêa bro mơ'no liăn cheăng ton hơnăm xuân dế pơkâ thế athế pơhlêh troăng pêi pro. A cheăm Dà Huoai 3, tơdroăng tơkêa bro Hngêi kơmăi on tơhrik Dà Huoai 2 ƀă mâu tơdroăng tơvâ tơvân lối 20 hơnăm cho môi tung mâu tơdroăng ki pá châ cheăm tơkŭm tơleăng mơnhên. Tơdroăng ki pá kân má môi cho pro tơdroăng ki môi tuăn tung chêl thiê̆n, xo tơnêi.

Klêi kơ'nâi 8 rôh hôp, tơpui tơno tơdrêng, khu kăn pơkuâ cheăm rế hía rế tơleăng mơnhên mâu rơkong pâ thế dêi kuăn pơlê, pro tơ'lêi hlâu tơbleăng séa ngăn, riân ngăn ƀă pêi pro mâu tơdroăng pơtối. Tơpui tối mâu tơdroăng ki hơ'lêh tung pơla tơleăng mơnhên tơdroăng tơkêa bro, pôa Nguyễn Văn Trinh - Kăn hnê ngăn Vi ƀan cheăm Dà Huoai 3 tối ăm 'nâi:

“Klêi kơ'nâi 8 rôh hôp, ngin mơhnhôk tâi tâng khu pơkuâ tơdroăng kal kí hnê tối, tơpui leăng ƀă tơleăng mâu tơdroăng tơvâ tơvân dêi kuăn pơlê. Troh nôkố, tơdroăng tơkêa bro hiăng châ tơdroăng môi tuăn. Tơring dế tơrŭm tơbleăng séa ngăn, riân ngăn vâ pêi pro chêl thiê̆n, xo tơnêi, mơ-eăm vâ tơdroăng tơkêa bro pơxiâm mơjiâng pro tung hơnăm 2026 ‘’.

Mâu tơdroăng ki hơ'lêh a Bảo Lâm 1, Bảo Lâm 3 ƀă Dà Huoai 3 cho mâu tơdroăng ki hơ'lêh tung tơdroăng mơ-eăm tah lôi pá puât, mơhnhôk ivá mơnhông dêi Lâm Đồng.

Tối tơbleăng 'na cheăng kâ - rêh ối pơlê pơla 9 khế hơnăm 2026 ăm hlo, tâi tâng kơxô̆ liăn 'no pêi pro tâi tâng pơlê pơla dêi kong pơlê châ lối 84.100 rơtal liăn, tâk lối 12% tâng vâ pơchông ƀă roh kố hơnăm nah. Lâp kong pơlê ai vâ chê 3.000 tơdroăng tơkêa bro 'no liăn cheăng ối xêt khât, tâi tâng kơxô̆ liăn chêh inâi lối 947.000 rơtal liăn. Laga, mâu tơdroăng ki tơvâ 'na tơnêi tơníu, tăng tơnêi, pro hlá mơ-éa 'no liăn cheăng ƀă ivá pêi cheăng xuân ối tơdjâk troh tơdroăng ki hên tơdroăng tơkêa bro.

Hlo tơdroăng pơkâ mơhnhôk mâu kơxô̆ liăn mơnhông mơdêk, pôa Y Thanh Hà Niê Kdăm, Ngế cheăng tung tíu xiâm Đảng, Kăn pơkuâ hnê ngăn cheăng Đảng kong pơlê Lâm Đồng pơkâ thế pơhlêh nếo troăng tơmiât pơkuâ, mơdêk hnoăng cheăng pôu râng ƀă tơƀrê pêi pro tung tâi tâng khu cheăng kal kí:

“Tâi tâng khu cheăng kal kí thế pơhlêh rơdêi ing tơdroăng tơmiât pơkuâ chiâng tơdroăng tơmiât mơnhông mơdêk, ing tơdroăng pơkâ mơ'no chiâng tơdroăng châ tơƀrê khât. Tơkŭm tah lôi mâu tíu ki kreăng mơnhông mơdêk, mơdêk rĕng tơdroăng pêi pro mâu tơdroăng tơkêa bro ki xiâm, mâu tơdroăng tơkêa bro ki u ối, ki ton ƀă mơdêk tơƀrê 'no liăn cheăng tơnêi têa. Pơtối mơdêk hiâm mơno pôu râng hnoăng cheăng, tơpui tơdrăng ƀă tơdroăng pêi pro, tiô tơdroăng cheăng châ pơcháu, đi đo séa ngăn, mơhnhôk, teăm tah lôi pá puât, tơvâ tơvân, khŏm mơ-eăm pro pơhlêh nhên tung mâu khế mơ'nui hơnăm 2026, pêi klêi hên má môi mâu pơkâ hiăng pơkâ mơ’no”.

Ing mâu tơdroăng cheăng rêh ối pơlê pơla troh mâu tơdroăng tơkêa bro ki u ối ton hơnăm, hơ'lêh a tíu pêi cheăng ăm hlo tơƀrê apoăng tung pêi cheăng khu kăn pơkuâ kong pơlê 2 râ a Lâm Đồng. Vâ mâu tơdroăng châ tơƀrê mê châ po rơdâ ƀă mơnhông, ki kal cho pơtối tơleăng tơdroăng cheăng troh tá tui lui, pơhlêh tơdroăng khŏm mơ-eăm chiâng tơdroăng châ tơƀrê nhên, pro tơ'nôm ivá ăm Lâm Đồng mơnhông mơdêk.