Hâi lơ 25/10, séa ngăn tơdroăng pêi pro ki xiâm ƀă pêi cheăng ƀă khu râ kăn pơkuâ kong pơlê An Giang, pôa Trần Thanh Mẫn, Kăn xiâm hnê ngăn Kuô̆k hô̆i tối rơdêi ihiâm mơno “3 ôh”: ôh tá ton tơrôu hdró hâi khế, ôh tá ju kơdroh tơdroăng pơkâ tơtro ki dâi lĕm, ôh tá ăm ai tơdroăng ki pro xôi. Mâu kơ koan, tíu pêi cheăng kal tơrŭm krá tơniăn, teăm tah lôi pá puât tơdrêng, mơnhên inhên hnoăng dêi ngế ối a kố ƀă mơdêk rĕng tơdroăng pêi pro rêm tơdroăng tơkêa bro.

Pôa Trần Thanh Mẫn, Kăn xiâm hnê ngăn Kuô̆k hô̆i pơkâ mâu tơmeăm, tơdroăng tơkêa bro gum Hneăng hôp tơdroăng kal râ kăn xiâm APEC 2027 a kơpong cheăng kâ Phú Quốc, kong pơlê An Giang, thế kêi đeăng hrá má môi hâi lơ 30/6/2027. Kăn xiâm hnê ngăn Kuô̆k hô̆i xuân pơkâ rak tơniăn mâu tơmeăm pêi pro tơdâng tơ’mô, tơtrŏng troăng klông, on tơhrik, têa, mơgrúa xok ki ‘no pa kong, kring tơniăn ƀă hbrâ mơdât on chếo, tơpâ on chếo.

Tơdroăng xĕn tíu ối châ pêi pro lĕm tro, tơniăn kuăn pơlê ăm tơnêi ăm tơdroăng tơkêa bro ai tíu ối tơniăn, tơ’mô lơ lĕm tro tâ tíu ối ton. Tơdroăng pêi pro tro tơdroăng pêi pro, dâi lĕm ƀă pơkâ luât kô gum tơniăn châ tơƀrê Hôp tơno tơdroăng kal râ kăn xiâm APEC 2027, tơdrêng amê mơđah tơbleăng um méa Việt Nam ƀă pú hmâ lâp plâi tơnêi.