Tiô rơkong krếo thế dêi pôa Lê Minh Hưng, Ngế pro xiâm hnê ngăn tơnêi têa, pôa Donald Tusk, Ngế pro xiâm hnê ngăn Kŏng hòa Ba Lan pôu păng ‘nâng Việt Nam ing hâi 24-26/10/2026. Kơxo lơ 26/10, a Hà Nội, klêi leh tơdah ƀă tơpui tơno, pôa Lê Minh Hưng, Ngế pro xiâm hnê ngăn tơnêi têa prế pôa Donald Tusk, Ngế pro xiâm hnê ngăn kong têa Ba Lan hiăng pơkuâ po rôh hôp tơbleăng tơdjuôm, păng ‘nâng tơbleăng mơdêk tơrŭm cheăng péa tơnêi têa tâk troh tơrŭm cheăng tung la ngiâ.

Tơdroăng ki mơdêk tơrŭm cheăng mơhno ivá khŏm mơ-eăm dêi kăn pơkuâ péa tơnêi têa tung cheăng thăm mơdêk loi cheăng kal kí, po rơdâ tơrŭm cheăng ai pơxúa ƀă tơrŭm châ tơƀrê tung mâu tơdroăng ki ai hlâu dêi rêm pâ.

Péa tơnêi têa kô pơtối mơdêk tơpui tơno pơtroh khu râ kăn, thăm mơdêk tơrŭm pơla mâu kơ koan, khu tơrŭm ƀă kong pơlê; hlối po rơdâ tơrŭm cheăng a mâu rôh hôp hên troăng, malối cho Khu lâp kong têa. Tung kơvâ cheăng kâ, tê mơdró ƀă ‘no liăn cheăng, Việt Nam ƀă Ba Lan tơmiât troh mơdêk tơrŭm cheăng tung mâu tơdroăng tơkêa tê mơdró tơniăn krê Việt Nam – Khu tơrŭm châu Âu, pro tơ’lêi hlâu ăm khu mơdró kâ péa tơnêi têa.

Mâu kơvâ cheăng ki ai hên tơdroăng ki ai hlâu mê cho pêi chiâk deăng, kơmăi kơmok uâ pơliê tơmeăm, on tơhrik vêh pro, pơhlêh xúa kong ngê̆ kơxô̆, troăng prôk, pơkeăng ƀă tơmeăm xúa tung khăm pơlât. Péa pâ tơtrŏng mơdêk tơrŭm cheăng hnê hriâm, khoa hok, túa lĕm tro, ôm hyô ƀă trâm mâ kuăn pơlê; hlối thăm mơdêk tơrŭm tung mâu tơdroăng kong têa ê, tung kơpong tiô luât lâp plâi tơnêi ƀă Luât Khu lâp kong têa.