Tiô tơdroăng pơkâ mơ'no, tơdroăng tơkêa bro pêi pro sap ing nôkố troh 2035, klâ chiâng péa hneăng, ƀă tâi tâng kơxô̆ liăn  tối hdrối lối 214 rơtal liăn. Sap hơnăm 2026-2030, tiô tối hdrối 'no vâ chê 135 rơtal liăn 'mâi rơnêu troăng prôk tung kơpong kuăn pơlê rêh ối, kơpong pêi chiâk; pro hngêi trung mauh yăo, hngêi trung râ má môi, hngêi pơkeăng, hngêi kuăn pơlê vâ tơkŭm hôp tơdjuôm ƀă hngêi pêi cheăng thôn.  

Tơdroăng tơkêa bro mê hlối kơjo mơhnho tíu, tơniăn ăm 50 rơpŏng kuăn pơlê, pro hngêi ối, po pông tơnêi pêi chiâk, pêt báu klâng, pêt prá alâi ƀă kum ăm hdrê pêt, hdrê păn. Pơla hơnăm 2030-2035, tiô tối hdrối kô mơ'no 79 rơtal liăn vâ pơtối mơhno tíu ối, tơniăn ăm 50 rơpŏng kuăn pơlê rêh ối, rơtế ƀă tŏng kum pro hngêi ối, po pông tơnêi pêi chiâk deăng, ƀă mơnhông cheăng kâ .