Pôa Lê Minh Hưng, Ngế pro xiâm hnê ngăn tơnêi têa tối nhên ki pơxúa kal khât dêi tơdroăng drêng tơkŭm po klêi kơ'nâi pơkâ mơdêk tơrŭm cheăng pơla péa pâ. Ngế pro xiâm hnê ngăn tơnêi têa ăm 'nâi, Ba Lan nôkố cho kong têa tơrŭm cheăng kâ kân má môi dêi Việt Nam a Trung Đông Âu.

Ƀă ki rơdêi kŏng ngê̆, pơkeăng, gâk kring tơnêi têa, on tơhrik dêi Ba Lan tơrŭm ƀă troăng hơlâ 18 tơdroăng tơkêa tê mơdró tơ'lêi hlâu (FTA) ƀă kơchơ mơdró rơdêi dêi Việt Nam, pơkâ mơdêk pêi lo liăn péa tơnêi têa tâk 6 rơtal dollars cho tơ'lêi hlâu khât. Mơhnhôk khu tê mơdró péa tơnêi têa tơrŭm ton xŏn, pơhlêh xúa kŏng ngê̆ ngiât, pro tơ'lêi hlâu ăm khu tê mơdró Việt Nam veăng trâu hơngế tâ tung tơdroăng ki kơnâ lâp plâi tơnêi, Ngế pro xiâm hnê ngăn tơnêi têa mơnhên Chin phuh Việt Nam đi đo rơtế prôk, pro rêm tơdroăng tơ'lêi hlâu má môi vâ mâu khu 'no liăn cheăng Ba Lan pêi cheăng tơniăn, krá ton.

Peăng dêi tơná, pôa Donald Tusk mơnhên tối khât hnoăng cheăng ƀă tíu ối dêi Việt Nam - tơdroăng cheăng kâ rơdêi má môi châu Á. Ngế pro xiâm hnê ngăn kong têa Ba Lan pơkâ mâu kơvâ tơrŭm cheăng ton xŏn 'na kơmăi kơmok khăm pơlât ƀă pơkeăng, điê̆n tưh, hriăn plĕng tơdjuôm 'na vê̆ tinh séa ngăn tơnêi tơníu mơnhên mâu tơdroăng vâ xúa tung pêi cheăng krúa lĕm. Pôa ăm 'nâi, Ba Lan hbrâ rơnáu cho troăng kân vâ khu mơdró ƀă tơmeăm Việt Nam châ achê tâi tâng kơchơ mơdró dêi Khu tơrŭm châu Âu (EU).