A cheăm Bảo Lâm 1, tơdroăng môi tuăn dêi kuăn pơlê dế gum rah lôi mâu tơdroăng pá puât kân drêng pêi pro mâu tơmeăm troăng klông: tăng ƀăng tơnêi. Hên rơpŏng hbrâ tah lôi kơnâng, tơmeăm ngiâ hngêi vâ pơcháu ƀăng tơnêi vâ mơjiâng pro. Ai mâu rơpŏng thế mơ’no kơxô̆ liăn hên vâ rơnêu, vêh mơjiâng, laga xuân sôk ro tơdjuôm ivá xua pơxúa ton xŏn mê tơmeăm ki djâ ăm. Jâ Cao Thị Nghệ, kuăn pơlê cheăm Bảo Lâm 1, tối:

“Mơhé mơ’no liăn châ hrĭng rơtuh liăn, á hâk vâ môi tuăn. Nhŏng o mơjiâng pro troăng kân xuân kơhnâ, pêi pro plâ hâi plâ măng, kong mêi khía xuân ối pêi”.

Tơdroăng môi tuăn dêi kuăn pơlê gum rah lôi pá puât ‘na ƀăng tơnêi, pro tơ’lêi hlâu vâ khu ki mơjiâng pro tơkŭm mơngế pêi pro, kơmăi kơmok ƀă tơmeăm mơjiâng pro. A mâu troăng kân gum kơpong pêt mơjiâng tơmeăm pêi lo ing chiâk deăng, tơdroăng kơdroh hâi khế mơjiâng pro ai kơnâ drêng kuăn pơlê la ngiâ krí kơphế. Pôa Lê Quang Tuấn, teăng mâ tíu mơjiâng pro, tối ăm ‘nâi:

“Ngin tơkŭm mơngế pêi cheăng, kơmăi kơmok, tơmeăm vâ bro, hbrâ tŭm tâi tâng tơmeăm vâ rĕng kêi đeăng troăng klông. Nhŏng o tơkŭm tơ’nôm  chô pêi, pêi tá kơmăng, mơ-eăm rĕng kêi đeăng, djâ tơmeăm xúa, gum kuăn pơlê prôk lăm tơ’lêi hlâu tung rơnó mêi ƀă pơto kơphế a rơnó krí”.

Mơ-eăm tơ’nôm chôu pêi, tơ’nôm mơngế pêi dêi khu tơdah xo mơjiâng pro rơtế tơdroăng môi tuăn pơcháu ƀăng tơnêi dêi kuăn pơlê dế gum mơdêk rĕng tơdroăng mơjiâng pro mâu kế tơmeăm. Kố xuân cho mâu tơdroăng ki kal drêng Lâm Đồng mot hneăng ki thế rĕng mơ’no liăn ngân tơnêi têa vâ pro tơmeăm hơnăm 2026.

Pôa Trần Đình Phước, Phŏ Kăn hnê ngăn Vi ƀan cheăm Bảo Lâm 1 tối, tơdroăng môi tuăn dêi kuăn pơlê cho tơdroăng ki kal vâ tah lôi pá puât ‘na ƀăng tơnêi, mơdêk rĕng tơdroăng mơjiâng pro ƀă mơ’no liăn cheăng tơnêi têa:

“Vâ châ tơdroăng môi tuăn, ngin hiăng tơrŭm ƀă mâu ƀơrô cheăng, tíu cheăng hnê mơhno tơkŭm hôp kuăn pơlê, mơhnhôk mâu rơpŏng tơkêa tah lôi tơmeăm, pơcháu tơnêi. Ai mâu rơpŏng thế tah tá peăng pâ ngiâ, kơnâng tung ƀăng kân, laga kuăn pơlê xuân tâi hiâm vâ môi tuăn vâ tơmeăm rĕng châ mơjiâng pro, mơdêk rĕng mơ’no liăn cheăng tơnêi têa”.