Mơgêi rôh hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa khĕn kơdeăn tung pơla hdrối kố nah, tơdroăng tơpui kâ ƀă kong têa ê ƀă tơrŭm cheăng lâp plâi tơnêi châ hên tơdroăng ki tơƀrê, ai pơhlêh 'na ki rơkê tơpui kâ, tơrŭm ƀă tơkŭm pêi pro, veăng kum rak tơniăn tơdroăng hơniâp lĕm, tơniăn, po rơdâ tơrŭm cheăng ƀă pro tơ'nôm ivá mơnhông tơnêi têa.

Tơpui kâ ƀă kong têa ê tung mâu troăng, mâu kơvâ cheăng châ tơbleăng tơdâng tơ'mô, tơdroăng cheăng tiô séa ngăn mâu tơdroăng tơhrâ, tơkêa rêm râ pơhlêh ing séa ngăn tơdroăng pêi pro chiâng mơnhên tơdroăng pêi pro, mơnhên hnoăng cheăng. Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế mâu Khu tơrŭm cheăng pơtối mơdêk hnoăng cheăng tí tăng 'nâi plĕng, tơrŭm vâ pơtối mơdêk ki dâi lĕm, krá tơniăn dêi mâu tơdroăng hiăng châ pêi pro.

Mâu kơ koan ki ai tơdjâk troh kal tơkŭm pêi pro mâu hnoăng cheăng ki xiâm tung mâu khế mơ'nui hơnăm, mơdêk tơƀrê tơdroăng cheăng tơpui kâ, pơhlêh mâu tơdroăng tơhrâ chiâng tơdroăng tơkêa bro, tơmeăm khoăng ƀă kơchơ tê mơdró ki ai khât kum pơxúa tơdroăng rêh ối Kuăn pơlê; hbrâ rơnáu tro ăm hnoăng cheăng ki pơtối, tung mê ai APEC 2027.