VOV4.Xơ Đăng - A hneăng hôp roh má 5 Khu kăn xiâm Đảng hneăng 13 pơxiâm po a hâi lơ 4/5 ƀă tối hdrối kô hôp ton ta troh lơ 10/5, pôa Nguyễn Phú Trọng, Kăn xiâm pơkuâ hnê ngăn Đảng ăm ‘nâi, pêi pro tơdroăng cheăng hơnăm 2022 ƀă Mơgêi hneăng hôp má 21 dêi Khu hnê mơhno dêi Tíu xiâm ‘na hbrâ mơdât kâ kơluâ, pro ôh tá tro, Khu xiam kal kí pơcháu a khu xiâm tơnêi têa pơkuâ, tơrŭm ƀă tơnêi têa pơkuâ, tơrŭm ƀă mâu kơ koan thâ pêi, tí tăng ngăn, mơjiâng tơdroăng Tơkêa bro mơjiâng khu hnê mơhno cheăng râ kong pơlê ‘na hbrâ mơdât kâ kơluâ, pro ôh ta tro.

Klêi veăng hnê tối ‘na mơjiâng tơdroăng Tơkêa bro, hiăng ai tâi tâng 63/63 to kong pơlê, khu pơkuâ ngăn Đảng kong pơlê vâ môi tuăn ƀă troăng rơhlâ mơjiâng Khu hnê mơhno râ kong pơlê ‘na hbrâ mơdât kâ kơluâ, pro ôh tá tro. Pôa Nguyễn Phú Trọng, Kăn xiâm pơkuâ hnê ngăn Đảng pơkâ thế Tíu xiâm tí tăng ‘nâi plĕng, séa ngăn, ăm hnê tối ƀă pơkâ ‘na mâu tơdroăng pâ thế, chêh tung hlá mơ-éa pơtroh ăm khu xiâm kal kí, malối ‘na troăng rơhlâ mơjiâng khu hnê mơhno cheăng râ kong pơlê ‘na hbrâ mơdât kâ kơluâ, pro ôh tá tro vâ mơdêk hnoăng pơkuâ hnê mơhno tơbleăng pêi kơtăng, tơdrêng ing Tíu xiâm troh kong pơlê tơdroăng hbrâ mơdât kâ kơluâ, pro ôh tá tro tung tâi tâng Đảng, tâi tâng kuăn pơlê, tâi tâng mâu lêng pin.

Gương tơplôu ƀă tơbleăng