Tiô rơkong krếo thế dêi kăn xiâm pơkuâ hnê ngăn Đảng Nguyễn Phú Trọng prế kơdrâi pôa, kăn xiâm hnê ngăn tơnêi têa Võ Văn Thưởng prế kơdrâi, pơxiâm ing hâi lơ 12/12, kăn xiâm pơkuâ hnê ngăn Đảng, Kăn xiâm hnê ngăn tơnêi têa Sinuâ Tập Cận Bình prế kơdrâi pôa kô lăm pôu râ Tơnêi têa troh Việt Nam tung pơla 2 hâi.

Kố cho rôh pôu Việt Nam ki má 3 dêi pôa Tập Cận Bình tung hnoăng cheăng Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ, hdrối mê cho a mâu hơnăm 2015, 2017 ƀă Việt Nam cho tơnêi têa má 2 pôa Tập Cận Bình lăm pôu tung hơnăm kố ki ôh tá tơkŭm mâu hnoăng cheăng ki hên kơvâ.

Tiô tối hdrối tung rôh lăm pôu rôh kố, péa pâ kô tơpui ‘na tơdroăng mơdêk pơkâ nếo ăm tơrŭm cheăng pơla péa pâ, mơdêk tơrŭm cheăng tung la ngiâ tŭm têk pơla péa tơnêi têa trâu hngế ƀă ai pơxúa tâ. Rơtế ƀă tơdroăng ki bâ eăng tung tơrŭm cheăng péa tơnêi têa ‘na tơrŭm cheăng kâ – tê mơdró kâ, ‘na tơrŭm cheăng kal kí, tơrŭm ‘na Đảng, pơla péa Chin phuh, Kuô̆k hô̆i, Măt trâ̆n tơnêi têa xuân môi tiah pơla mâu Khu xiâm, kơvâ cheăng ki kal môi tiah Tơpui kâ, cheăng lêng, Kŏng an, mâu kong pơlê a tíu tơkăng kong ƀă trâm mâ kuăn pơlê péa tơnêi têa châ hên tơdroăng ki pêi pro ai pơxúa tơƀrê ăm kuăn pơlê péa tơnêi têa.