Kơxo hâi lơ 7/9/2023, pôa Phạm Minh Chính, Ngế pro xiâm hnê ngăn Chin phuh rơtế ƀă mâu kăn dêi mâu kong têa ASEAN  ƀă Khu tơrŭm cheăng veăng Hôp to mâu râ kăn xiâm ASEAN - Ấn Độ rôh má 20 ƀă Hôp to khu râ kăn Đông Á ( EAS) rôh má 18. A hneăng hôp mau kăn xiâm ASEAN - Ấn Độ rôh má 20, rêm pâ tơpui tơdroăng tơrŭm cheăng tung tâi tâng mâu tơdroăng mơjiâng hơnăm 2022.

Pôa Narendra Modi, Ngế pro xiâm hnê ngăn kong têa Ấn Độ tối ASEAN cho xiâm tung mâu luât pơkâ pêi pro troăng hơlâ peăng mâ hâi lo ƀă cho ki kal tung tơdroăng hriăn plĕng Ấn Độ Dương - Thái Bình Dương dêi Ấn Độ - ASEAN ƀă Ấn Độ vâ môi tuăn tơkŭm pêi ahdrối tơrŭm cheăng krá ton xŏn, cheăng kâ châ tơluâ, plâ mơdât khu ‘mêi ai xôi tơkâ luâ tơnêi têa, mơdêk ivá cheăng khăm pơlât, mơdêk tơdjêp, xúa khoa hok kŏng ngê̆, pơ’lêh kơxô̆, hlối po rơdâ tơrŭm cheăng ‘na pơ’lêh on tơhrik, hbrâ ví hyôh kong prâi.

Ngế pro xiâm hnê ngăn kong têa Ấn Độ tơbleăng mơjiâng liăn ‘măn kơdĭng ASEAN - Ấn Độ xua tung la ngiâ kơxô̆. A hneăng hôp mâu kăn siâm ASEAN Đông Á rôh má 18 (EAS - 18), mâu kong têa ki tơrŭm veăng môi tuăn hnoăng cheăng xiâm dêi ASEAN, tơdrêng ƀă mơjiâng kơpong po rơdâ hnoăng cheăng xiâm dêi ASEAN, rơtế mơjiâng kơpong po, tơdrăng, tá mâu tơdroăng ngăn tiô luât lâp plâi tơnêi ƀă Luât khu lâp kong têa.