Tung pơla hdrối kố nah, mâu hdroâng kuăn ngo ki iâ mơngế ƀă kong ngo tung lâp tơnêi têa hiăng kơdo mơ-eăm tung hnoăng cheăng pơkâ pêi pro, rak vế tơdrêng mâu troăng hơlâ tŏng gum a mâu pơlê cheăm ki ai hdroâng mơngê kuăn ngo ƀă kong ngo ƀă mâu troăng hơlâ ki tơveăng mơnhông tơdroăng rêh ối pơlê pơla mê tơdroăng rêh ối dêi kuăn pơlê đi đo xông mơdêk, túa cheăng kâ ai tơdroăng ki pơhlêh tơtro khât, túa cheăng kâ dêi kuăn pơlê gok gâ túa ki nếo, hên túa cheăng ki tơƀrê; kuăn pơlê rế hiá rế pêi lo kế tơmeăm, liăn ngân rế hên. Kơxô̆ rơpŏng kơtiê chu kơdroh; ‘na hnê hriâm, pơkeăng ƀă khăm pơlât châ mơdêk hên; túa lĕm tro, khôi túa, vêa vong ki lĕm tro châ pơtối rak vế ƀă mơnhông.

Tơdroăng kring vế, gak ngăn châ rak krá tơniăn; tơrŭm tơrôa pơla mâu hdroâng kuăn ngo pơrá châ ‘mâi mơnhông ƀă thăm rế tơtêk a ‘ngêi tâ. Kơlo ki pêi lo kế tơmeăm mâu kong pơlê kơpong hdroâng kuăn ngo ki iâ mơngế ƀă kong ngo hiăng châ mơdêk, tung mê, ai mâu kong pơlê kơpong Tây Bắc, tâng vâ riân tâk tơdjuôm châ 8,0%, Tây Nguyên tâk vâ chê 7,5% tung rêm hơnăm, Tây Nam Bộ tâk vâ riân tơdjuôm ai 7,0% rêm hơnăm ƀă hên mâu tơdroăng ki ê.

Tiô pôa Hầu A Lềnh, Ngế xiâm, pơkuâ ngăn Vi ƀan Kuăn ngo tối, hơnăm nah, hnoăng cheăng tŏng gum hdroâng kuăn ngo xuân u ối mâu tơdroăng ki tá hâi teăm châ mơnhông, tung mê, pơkâ pêi pro mâu tơdroăng tơkêa pêi, tơdroăng cheăng ki vâ mơnhông cheăng kâ-rêh ối dế trâm hên tơdroăng tơvâ tơvân, tung mê, Hnoăng cheăng xiâm tơnêi têa ki gum hdroâng kuăn ngo ƀă kong ngo ta hâi châ pêi pro tiô tơdroăng i pơcháu ahdrối:

“Tơkŭm po mâu tơdroăng cheăng dêi tơnêi têa troh a mâu kong pơlê, pơlê kong kơdrâm maluâ hiăng ai hên ki kơdo mơ-eăm, kơxô̆ liăn ki gum ăm mâu kơpong ki mê ga hên, ‘no liăn ki gum rêm khế xuân hên, laga, xuân u ối mâu kong pơlê xúa kơxô̆ liăn ki kố vâ gum mơdêk tơdroăng rêh ối, cheăng kâ dêi mâu pơlê cheăm ta hâi teăm châ mơnhông, tá hâi tro tiô tơdroăng cheăng pơcháu. Tâng vâ riân tơdjuôm tung lâp tơnêi têa, Hnoăng cheăng xiâm dêi tơnêi têa xuân ăm mung hên, la tâng vâ ngăn ƀă hnoăng cheăng ki kal dêi Chin ppuh hiăng mơ’no mê ta hâi teăm châ pêi pro tiô pơkâ. Tơdroăng ki hlê plĕng dêi kuăn pơlê, tơdroăng ki vâ tơrŭm môi tuăn dêi kuăn pơlê xuân ối trâm hên ki xahpá”.

Hơnăm 2025, Vi ƀan hdroâng mơngế kuăn ngo hiăng mơ’no 12 hnoăng cheăng ki xiâm, tung mê, khŏm mơ-eăm pơkâ pêi pro, pêi mơjiâng kêi tơdroăng ki ‘mâi axoăng, tăng rah mơngế pơkuâ cheăng ‘na kuăn ngo a Tíu xiâm tơnêi têa ƀă mâu  kong pơlê, pơlê kong kơdrâm vâ pêi cheăng tro tiô hnoăng cheăng ki nếo sap ing apoăng hơnăm 2025. A roh hôp mê, teăng mâ mâu kăn kong pơlê, pơlê kong kơdrâm xuân hiăng tối dêi mâu tơdroăng ki xahpá, tơvâ tơvân tung pơla pơkâ pêi pro hnoăng cheăng kuăn ngo a kong pơlê tơná, tơdrêng amê, pâ thế tŏng veăng ai troăng hơlâ ki vâ lêi tah ki tơvâ tơvân, ối kreăng mê.

Tơpui a Roh hôp mê, pôa Nguyễn Hoà Bình, Phŏ Ngế pro xiâm hnê ngăn vêh mơnhên, hnoăng cheăng tong gum ‘na kuăn ngo ƀă troăng hơlâ tŏng gum kuăn ngo đi đo châ Đảng ƀă Tơnêi têa tŏng gum tối tơbleăng hnoăng cheăng xiâm dêi tơnêi têa hiăng mot tung tơdroăng rêh kâ ối dêi hdroâng kuăn ngo ƀă kong ngo. Tơdroăng pêi cheăng kâ, pêi lo kế tơmeăm hiăng tâk hên, tơdroăng rêh kâ ối dêi kuăn pơlê hdroâng kuăn ngo ƀă kong ngo châ mơnhông hên khât, ing mê, vâ mơhno tối troăng tơdjâ dêi Đảng ƀă Tơnêi têa hiăng mot tung rêh kâ ối rêm hâi.

Maluâ ti mê, tung hơnăm 2024, Vi ƀan hdroâng Kuăn ngo xuân u ối 7/14 hnoăng cheăng ta hâi teăm kâi kêi, xua mê, pôa Nguyễn Hoà Bình hiăng pơkâ thế pêi pro kêi mâu hnoăng cheăng kố tung 3 khế apoăng hơnăm 2025. Vi ƀan ngăn ‘na hdroâng kuăn ngo kal vêh mơnhên hnoăng cheăng, khŏm mơ-eăm, pôu râng hnoăng cheăng kal kí ƀă mâu hdroâng kuăn ngo ki iâ mơngế ƀă kong ngo, mơnhên ngăn troăng tơdjâ cheăng kal kí ƀă mâu hdroâng kuăn ngo ki iâ mơngế ƀă kong ngo, mơnhên ngăn, pêi pro tiô troăng tơdjâ, dêi Đảng, troăng pơkâ dêi Kuô̆k hô̆i ƀă mâu troăng hơlâ ki kân dêi tơnêi têa:

“Troăng hơlâ hên, mơngế, liăn ngân ga hên, xua mê, tâng pin ôh tá pêi pro ki klâi ki rơhéa ăm vâi krâ-nhŏng o, ăm hdroâng kuăn ngo mê pin ai tơdroăng xôi. Xua mê, pin athế hriăn, hlê plĕng khu pơkuâ ngăn dế nôkố pin kal athế ‘mâi axoăng, rah xo mơngế ki rơkê khât, ƀă khu pơkuâ mê athế hbrâ rơnáu ăm tơdroăng ki koh tơdah xo hnoăng cheăng ki nê. Ai ki tơ’lêi hlâu la xuân ai hên tơdroăng ki pá puât. Ki pá puât akố hnoăng cheăng ga hên, pá puât xua khu ngăn ối ai hên tơdroăng ki pa puât, môi tiah tơdroăng ing ‘ngêi chu, la ki kal má môi mê cho thăm mơdêk tơdroăng ki rơkê dêi mâu kăn pơkuâ, vâ ai troăng hơlâ ki rơkê vâ mơdêk tơdroăng rêh kâ ối dêi vâi krâ-nhŏng o hên tâ nếo”.

Pôa Nguyễn Hoà Bình xuân pơkâ thế, hơnăm 2025, khŏm mơ-eăm athế pêi pro klêi hnoăng cheăng tŏng gum ăm mơngế kơtiê ƀă hên túa cheăng ƀă kal athế kơdo mơ-eăm; tơdrêng amê, hơnăm 2025 athế mơgêi Hnoăng cheăng xiâm tơnêi têa mơnhông pêi cheăng kâ, rêh ối pơlê pơla a kopong hdroâng kuăn ngo ki iâ mơngế ƀă kong ngo hneăng má 1 ƀă hbrâ tơniăn khât ăm hneăng má 2 dêi Tơdroăng kố, ôh ta ăm ai tơdroăng cheăng hneăng má môi kố ối chĕn, ối kreăng.